ମହିଳା କନଷ୍ଟେବଲ୍‌ଙ୍କୁ ହତ୍ୟା ଘଟଣାରେ ନୂଆ ଟ୍ବିଷ୍ଟ୍ : ସାମ୍ନାକୁ ଆସିଲା ଦୀପକ-ଶୁଭମିତ୍ରାଙ୍କ ମ୍ୟାରେଜ୍ ସାର୍ଟିଫିକେଟ୍, ପୂର୍ବରୁ ପତ୍ନୀଙ୍କର ହୋଇଛି ମୃତ୍ୟୁ

ଭୁବନେଶ୍ବର ୧୭।୯: ମହିଳା କନଷ୍ଟେବଲ୍ ଶୁଭମିତ୍ରା ସାହୁଙ୍କୁ ହତ୍ୟା ଘଟଣାରେ ଆଉ ଏକ ନୂଆ ଟ୍ବିଷ୍ଟ୍ । ପୂର୍ବରୁ ବିବାହିତ ଥିଲେ ଅଭିଯୁକ୍ତ ଦୀପକ ରାଉତ । ୨୦୨୨ରେ ଦୀପକଙ୍କ ପତ୍ନୀ ଖୁଣ୍ଟୁଣୀ ନିକଟରେ ଦୁର୍ଘଟଣାରେ ମୃତ୍ୟୁବରଣ କରିଥିଲେ । ଏହାପରେ ପତ୍ନୀଙ୍କ ନାଁରେ ଥିବା ଇନ୍ସ୍ୟୁରାନ୍ସ କମ୍ପାନୀରୁ ୧ କୋଟି ଟଙ୍କା ପାଇଥିଲେ ଦୀପକ । ୨୦୨୪ ମସିହାରେ ଶୁଭମିତ୍ରାଙ୍କ ସହ ଦୀପକଙ୍କର ସମ୍ପର୍କ ଗଢି ଉଠିଥିଲା । ଏହି ସମୟରେ ଦୀପକ ଶୁଭମିତ୍ରାଙ୍କୁ ପ୍ରାୟ ୧୦ ଲକ୍ଷ ଟଙ୍କା ଦେଇଥିଲେ । ଶୁଭମିତ୍ରା କିନ୍ତୁ ଅନ୍ୟ ଜଣେ ଯୁବକ ସହ ସମ୍ପର୍କ ରଖିବାରୁ ଉଭୟଙ୍କ ମଧ୍ୟରେ ଗଣ୍ଡଗୋଳ ସୃଷ୍ଟି ହୋଇଥିଲା । ଏହା ଜାଣିବା ପରେ ଦୀପକ ଶୁଭମିତ୍ରାଙ୍କୁ ରାସ୍ତାରୁ ହଟାଇବାକୁ ଯୋଜନା କରିଥିଲା । ଗତ ୬ ତାରିଖ ଦିନ ୨ଟାରେ ଟ୍ରାଫିକ୍ ଡିସିପିଙ୍କ କାର୍ଯ୍ୟାଳୟରୁ ଶୁଭମିତ୍ରାଙ୍କୁ ଏକ କାର୍‌ରେ ନେଇ କୁଆଡେ ଚାଲି ଯାଇଥିଲେ ଦୀପକ । ଏହାପରେ ଶୁଭମିତ୍ରାଙ୍କ ପତ୍ତା ମିଳିନଥିଲା । ଏନେଇ ପରିବାର ପକ୍ଷରୁ ଥାନାରେ ଅଭିଯୋଗ ହୋଇଥିଲା । ବହୁ ଖୋଜାଖୋଜି ପରେ କେନ୍ଦୁଝର ଘଟଗାଁ ଜଙ୍ଗଲରୁ ଶୁଭମିତ୍ରାଙ୍କ ମୃତଦେହ ମିଳିଛି ।

ସେପଟେ ଦୀପକ-ଶୁଭମିତ୍ରାଙ୍କ ମ୍ୟାରେଜ ସାର୍ଟିଫିକେଟ୍ ସାମ୍ନାକୁ ଆସିଛି । ୨୩ ଜୁଲାଇ ୨୦୨୪ରେ ଶୁଭମିତ୍ରାକୁ ରେଜିଷ୍ଟ୍ରି ମ୍ୟାରେଜ କରିଥିଲା ଦୀପକ । ଖଣ୍ଡଗିରିରେ ଥିବା ରେଜିଷ୍ଟ୍ରି ମ୍ୟାରେଜ ଅଫିସରେ ଦୁହେଁ ବିବାହ କରିଥିଲେ । ୩ ଜଣ ସାକ୍ଷୀଙ୍କ ଉପସ୍ଥିତିରେ ବିବାହ ହୋଇଥିଲା । ଦୀପକଙ୍କ ପ୍ରକୃତ ଘର ଯାଜପୁର ଜିଲ୍ଲା ଟମକା ଏବଂ ଶୁଭମିତ୍ରାଙ୍କ ଘର ଖୋର୍ଦ୍ଧା ବେଗୁନିଆ ଥାନା ଅଞ୍ଚଳରେ ବୋଲି ଜଣାପଡିଛି । ଦୀପକ ଭୁବନେଶ୍ବର ଚନ୍ଦ୍ରଶେଖରପୁର ସ୍ଥିତ ସରକାରୀ ପୋଲିସରେ ରହୁଥିଲେ ।

ସେପଟେ ପୋଲିସ କମିଶନର ସୁରେଶ ଦେବଦତ୍ତ ସିଂ କହିଛନ୍ତି, ଏହି କେସ୍ ଉନ୍ମୋଚିତ ହୋଇସାରିଛି । ଫିଲ୍ଡରେ କିଛି ତଥ୍ୟ ଯାଞ୍ଚ ବାକି ଅଛି । ଯେଉଁଥି ପାଇଁ ପୋଲିସ ଟିମ୍ କେନ୍ଦୁଝର ଯାଇଛି । ଟିମ୍ ଫେରିବା ପରେ ବିସ୍ତୃତ ତଥ୍ୟ ଦିଆଯିବ ।

ସୂଚନାଯୋଗ୍ୟ ଯେ, ଗତ ୬ ତାରିଖରେ ଶୁଭମିତ୍ରା ନିଖୋଜ ହୋଇଥିଲେ । ସେହିଦିନ ଭୁବନେଶ୍ବରରେ ହିଁ ଶୁଭମିତ୍ରାଙ୍କୁ ହତ୍ୟା କରିଥିଲା ଦୀପକ । ଶୁଭମିତ୍ରାଙ୍କ ମୃତଦେହକୁ କାର୍‌ ଯୋଗେ ଘଟଗାଁ ନେଇ ଯାଇଥିଲା ଅଭିଯୁକ୍ତ । ଘଟଗାଁ ଅଞ୍ଚଳର ଏକ ଜଙ୍ଗଲରେ ଶୁଭମିତ୍ରାଙ୍କ ମୃତଦେହ ପୋତି ଦେଇଥିଲା ଦୀପକ ।