ନୂଆଦିଲ୍ଲୀ: ଲସ ଆଞ୍ଜେଲସ୍ରେ ଭୟଙ୍କର ଅଗ୍ନିକାଣ୍ଡ ବିଶ୍ୱବ୍ୟାପୀ ଅନେକ ପ୍ରଶ୍ନ ଛିଡା କରିଛି। ୧୦ ହଜାରରୁ ଅଧିକ ଘର, ବ୍ୟବସାୟ ଆଉଟଲେଟ୍ ଏବଂ ଦାମୀ ଘର ନଷ୍ଟ ହୋଇଯାଇଛି। କେବଳ ଏତିକି ନୁହେଁ, ଏହି ଅଗ୍ନିକାଣ୍ଡ ଯୋଗୁଁ ଅତି କମରେ ୧୦ ଜଣଙ୍କ ମୃତ୍ୟୁ ହୋଇଛି। ପ୍ରାୟ ୧ ଲକ୍ଷ ୮୦ ହଜାର ଲୋକ ନିଜ ଘର ଛାଡ଼ିବାକୁ ବାଧ୍ୟ ହୋଇଥିଲେ।
ଗୁରୁବାର ସନ୍ଧ୍ୟାରେ ପୁନର୍ବାର ଅଗ୍ନିକାଣ୍ଡ ଘଟିବା ପରେ ଭୟ ଆହୁରି ବଢ଼ିଯାଇଛି ଯେ ଆଗାମୀ ଦିନରେ ସଙ୍କଟ ଆହୁରି ଗୁରୁତର ହୋଇପାରେ। ଏହି ବିପର୍ଯ୍ୟୟ ବେଳେ ଆଉ ଏକ ସୁଯୋଗ ପାଇଛନ୍ତି ଡକାୟତ ଗ୍ୟାଙ୍ଗ। ସେମାନେ ଅନେକ ଘରେ ଓ ହୋଟେଲରେ ପଶି ଲୁଟ୍ କରିଚାଲିଛନ୍ତି। ମଙ୍ଗଳବାର ପ୍ରଥମ ଅଗ୍ନିକାଣ୍ଡ ଘଟିବା ପରେ ବିପର୍ଯ୍ୟୟ ଅଞ୍ଚଳରେ ଲୁଟ୍ ହୋଇଥିବା ଖବର ଆସିଥିଲା। ଏହି ଅଭିଯୋଗରେ ପ୍ରାୟ ୨୦ ଜଣଙ୍କୁ ପୋଲିସ ଗିରଫ କରିଛି। ଏନେଇ ସୂଚନା ଦେଇଛନ୍ତି ଲସ୍ ଆଞ୍ଜେଲସ୍ କାଉଣ୍ଟି ସେରିଫ୍ ରବର୍ଟ ଲୁନା।
ସେ ଆହୁରି କହିଛନ୍ତି ଯେ ପୋଡିଯାଇଥିବା ସ୍ଥାନଗୁଡିକୁ ଖୋଜାଚାଲିଛି। ମୃତ୍ୟୁ ସଂଖ୍ୟା ବଢ଼ିବାର ସମ୍ଭାବନା ରହିଛି। ଲସ୍ ଆଞ୍ଜେଲସ୍ ମେୟର କରିନା ବ୍ୟାସ୍ କହିଛନ୍ତି ଯେ ଗୁରୁବାର ସନ୍ଧ୍ୟାରେ ପ୍ରବଳ ପବନ ହେତୁ ନିଆଁ ଆହୁରି ଜଳିଯାଇଛି ଏବଂ ଏହାକୁ ନିୟନ୍ତ୍ରଣ କରିବା କଷ୍ଟକର ହୋଇପଡିଛି।
ରାଷ୍ଟ୍ରପତି ଜୋ ବାଇଡେନ ଅଗ୍ନିକାଣ୍ଡର ମୁକାବିଲା ପାଇଁ ଫେଡେରାଲ୍ ସହାୟତା ପାଇଁ ପ୍ରତିଶ୍ରୁତି ଦେଇଛନ୍ତି, ବର୍ତ୍ତମାନର ପରିସ୍ଥିତିକୁ "କାଲିଫର୍ଣ୍ଣିଆ ଇତିହାସରେ ସବୁଠାରୁ ବ୍ୟାପକ, ବିନାଶକାରୀ ଅଗ୍ନିକାଣ୍ଡ" ବୋଲି କହିଛନ୍ତି।
