Delhi Blast: ଦିଲ୍ଲୀ କାର ବିସ୍ଫୋରଣ ମାମଲାର ତଦନ୍ତ କରିବ NIA, ଗୃହ ମନ୍ତ୍ରଣାଳୟ ନିଷ୍ପତ୍ତି

ନୂଆଦିଲ୍ଲୀ: ଦିଲ୍ଲୀରେ ସୋମବାର ସଂଧ୍ୟାରେ ଲାଲକିଲ୍ଲା ନିକଟରେ ହୋଇଥିବା କାର୍ ଦୁର୍ଘଟଣାର ତଦନ୍ତ ରାଷ୍ଟ୍ରୀୟ ତଦନ୍ତକାରୀ ଏଜେନ୍ସି କରିବ । କେନ୍ଦ୍ର ଗୃହ ମନ୍ତ୍ରଣାଳୟ ଏହି ନିଷ୍ପତ୍ତି ନେଇଛି ଓ ତଦନ୍ତ ଦାୟିତ୍ୱ ଏନଆଇଏକୁ ହସ୍ତାନ୍ତର କରାଯାଇଛି । ଏହା ପୂର୍ବରୁ କେନ୍ଦ୍ର ଗୃହ ମନ୍ତ୍ରୀ ଅମିତ୍ ଶାହ ଆଜି ଉଚ୍ଚ ସ୍ତରୀୟ ବୈଠକ କରିଥିଲେ, ଯେଉଁଥିରେ ବିସ୍ଫୋରଣ ତଦନ୍ତ ଏନଆଇଏ କରିବ ବୋଲି ନିଷ୍ପତ୍ତି ନିଆଯାଇଥିଲା । ବର୍ତ୍ତମାନ ତଦନ୍ତକାରୀ ଏଜେନ୍ସି ବିସ୍ଫୋରଣ ସ୍ଥଳରେ ପ୍ରମାଣ ଏକାଠି କରୁଛନ୍ତି । ବିସ୍ଫୋରଣ ଲିଙ୍କ୍ ଏକାଧିକ ରାଜ୍ୟ ସହ ଜଡ଼ିତ ଥିବା କାରଣରୁ ଏନଆଇଏ ତଦନ୍ତ ପାଇଁ ନିଷ୍ପତ୍ତି ନିଆଯାଇଥିବା ଜଣାପଡିଛି ।

ସୂତ୍ର ଅନୁସାରେ କେନ୍ଦ୍ର ଗୃହ ମନ୍ତ୍ରୀ ଅମିତ୍ ଶାହଙ୍କ ଅଧ୍ୟକ୍ଷତାରେ ଉଚ୍ଚ ସ୍ତରୀୟ ସମୀକ୍ଷା ବୈଠକ ହୋଇଥିଲା । ଏଥିରେ ଗୃହ ସଚିବ ଗୋବିନ୍ଦ ମୋହନ, ଆଇବି ନିର୍ଦ୍ଦେଶକ ତପନ ଡେକା, ଦିଲ୍ଲୀ ପୋଲିସ କମିଶନର ସତୀଶ ଗୋଲଚା ଓ ଏନଆଇଏ ମହାନିର୍ଦ୍ଦେଶକ ବସନ୍ତ ଦାତେ ପ୍ରମୁଖ ସାମିଲ ଥିଲେ । ଅନ୍ୟପଟେ ଜମ୍ମୁ କାଶ୍ମୀର ପୋଲିସ ମହାନିର୍ଦ୍ଦେଶକ ନଲିନ ପ୍ରଭାତ ଡିଜିଟାଲ୍ ମାଧ୍ୟମରେ ବୈଠକରେ ସାମିଲ ହୋଇଥିଲେ ।

ଦିଲ୍ଲୀ ପୋଲିସ ଏହି ମାମଲାରେ ବେଆଇନ ଗତିବିଧି (ନିରୋଧ) ଅଧିନିୟମ ଓ ବିସ୍ଫୋଟକ ଅଧିନିୟମରେ ଆତଙ୍କବାଦୀ ଆକ୍ରମଣ ମାମଲାର ଷଡ଼ଯନ୍ତ୍ରରେ ଏକ ଏଫଆଇଆର୍ ରୁଜୁ କରାଯାଇଛି । ପ୍ରାଥମିକ ସୂଚନା ଅନୁସାରେ, ଲାଲକିଲ୍ଲା ନିକଟରେ ଯେଉଁ କାରରେ ସୋମବାର ସଂଧ୍ୟାରେ ବିସ୍ଫୋରଣ ହୋଇଥିଲା, ତାର ଚାଳକ କଥିତ ରୂପେ ଫରିଦାବାଦ ଆତଙ୍କବାଦୀ ମଡ୍ୟୁଲ ସହ ଜଡ଼ିତ ଥିଲା । ପୋଲିସ ସୂତ୍ର ଅନୁସାରେ ପ୍ରାଥମିକ ଯାଞ୍ଚର ସଂକେତ ମିଳିଛି ଯେ ଲାଲକିଲ୍ଲା ନିକଟରେ ହୋଇଥିବା ବିସ୍ଫୋରଣରେ ସମ୍ଭବତଃ ଅମୋନିୟମ ନାଇଟ୍ରେଟ୍, ଇନ୍ଧନ ତୈଳ ଓ ଡେଟୋନେଟର ବ୍ୟବହାର କରାଯାଇଛି । ଉଲ୍ଲେଖଯୋଗ୍ୟ ଯେ ସୋମବାର ସଂଧ୍ୟା ୬.୫୨ ମିନିଟରେ ଲାଲକିଲ୍ଲା ନିକଟରେ ଏକ ଶକ୍ତିଶାଳୀ ବିସ୍ଫୋରଣ ହୋଇଥିଲା । କାର୍ ବିସ୍ଫୋରଣ ଘଟି ୧୦ ଜଣଙ୍କ ମୃତ୍ୟୁ ହୋଇଥିବା ବେଳେ ୨୪ ଜଣ ଗୁରୁତର ଅବସ୍ଥାରେ ଏଲଏନଜେପି ହସ୍ପିଟାଲରେ ଚିକିତ୍ସାଧୀନ ଅଛନ୍ତି ।