ଅହମ୍ମଦାବାଦରେ ବିମାନ ଦୁର୍ଘଟଣାର ପୀଡିତଙ୍କୁ କ୍ଷତିପୂରଣ ପ୍ରଦାନ ପ୍ରକ୍ରିୟାକୁ ଆସିଥିବା ଅଭିଯୋଗକୁ ପ୍ରତ୍ୟାଖାନ କରିଛି ଏୟାର ଇଣ୍ଡିଆ। ଏୟାର ଇଣ୍ଡିଆ ପକ୍ଷରୁ କୁହାଯାଇଛି ଯେ କ୍ଷତିପୂରଣ ସମ୍ପର୍କରେ ଆସିଥିବା ଅଭିଯୋଗ ଭିତ୍ତିହୀନ। ସେମାନଙ୍କ ଦ୍ୱାରା ଦିଆଯାଇଥିବା ପ୍ରଶ୍ନାବଳୀର ଉଦ୍ଦେଶ୍ୟ କେବଳ ପରିବାର ସମ୍ପର୍କକୁ ସ୍ପଷ୍ଟ କରିବା ଥିଲା। ଏହା ଦ୍ଵାରା କ୍ଷତିପୂରଣ ରାଶି ସଠିକ୍ ଭାବରେ ବଣ୍ଟନ କରାଯାଇପାରିବ। ଅର୍ଥାତ ସହାୟତା ରାଶି ସଠିକ୍ ହିତାଧିକାରୀଙ୍କ ପାଖକୁ ଯାଇପାରିବ।

ଏୟାର ଇଣ୍ଡିଆ ଆହୁରି କହିଛି ଯେ ଏଗୁଡ଼ିକ କିଛି ଅପିସିଆଲ ପ୍ରୋସେସ, ଯାହାକୁ ଅନୁସରଣ କରିବା ଆବଶ୍ୟକ। କିନ୍ତୁ ଆମେ ପୀଡିତ ପରିବାରକୁ ପ୍ରତ୍ୟେକ ପ୍ରକାରେ ସାହାଯ୍ୟ କରିବାରେ ନିୟୋଜିତ। ଏୟାରଲାଇନ୍ସ ଏହା ମଧ୍ୟ ସ୍ପଷ୍ଟ କରିଛି ଯେ ଫର୍ମଟି ଇ-ମେଲ୍ ମାଧ୍ୟମରେ କିମ୍ବା ବ୍ୟକ୍ତିଗତ ଭାବରେ ଦାଖଲ କରାଯାଇପାରିବ। ଘରକୁ କୌଣସି ଭିଜିଟ କରାଯିବ ନାହିଁ। ବିଭିନ୍ନ ଟିମ୍ ଗଠନ କରାଯାଇଛି, ଯେଉଁମାନେ ଶେଷକୃତ୍ୟ, ବାସସ୍ଥାନ ଏବଂ ଅନ୍ୟାନ୍ୟ ବ୍ୟବସ୍ଥାରେ ପୀଡିତଙ୍କ ପରିବାରକୁ ସାହାଯ୍ୟ କରୁଛନ୍ତି। ଏୟାର ଇଣ୍ଡିଆ କହିଛି ଯେ ଏପର୍ଯ୍ୟନ୍ତ ୪୭ ପରିବାରକୁ ଆଗୁଆ ସହାୟତା ରାଶି ଦିଆଯାଇଛି ଏବଂ ୫୫ ପରିବାରକୁ ଦେୟ ଦେବା ପ୍ରକ୍ରିୟା ଜାରି ରହିଛି।

୪୦ ରୁ ଅଧିକ ପୀଡିତ ପରିବାରର ପ୍ରତିନିଧିତ୍ୱ କରୁଥିବା ୟୁକେ-ଭିତ୍ତିକ ଆଇନଗତ ସଂସ୍ଥା ଷ୍ଟୁଆର୍ଟସ୍ ଦାବି କରିଛି ଯେ ଏୟାର ଇଣ୍ଡିଆ ଏପରି ପ୍ରଶ୍ନପତ୍ର ପଠାଇଛି ଯାହା ପରିବାର ଉପରେ ଆଇନଗତ ଭାବରେ ଆର୍ଥିକ ବିବରଣୀ ଦେବା ପାଇଁ ଚାପ ସୃଷ୍ଟି କରୁଛି।

ଷ୍ଟେୱାର୍ଟସର ଜଣେ ଅଂଶୀଦାର ପିଟର ନିନାନ୍ ଏୟାର ଇଣ୍ଡିଆକୁ ସମାଲୋଚନା କରି କହିଛନ୍ତି ପରିବାରଠାରୁ ଆଇନଗତ ରୂପରେ ଗୁରୁତ୍ୱପୂର୍ଣ୍ଣ ସୂଚନା ମଗାଯାଇଥିଲା, ଯେଉଁଥିରେ ଆଇନଗତ ପରିଭାଷା ସହିତ ଶବ୍ଦ ବ୍ୟବହାର କରାଯାଇଥିଲା। ପରେ ଏହି ସୂଚନା ସେମାନଙ୍କ ବିରୁଦ୍ଧରେ ବ୍ୟବହାର କରାଯାଇପାରିବ। 

ଏୟାର ଇଣ୍ଡିଆର ବିମାନ AI 171 ଜୁନ୍ ୧୨ରେ ଅହମ୍ମଦାବାଦରେ ଦୁର୍ଘଟଣା ହୋଇଥିଲା। ଏହି ବିମାନରେ ଜଣେ ଯାତ୍ରୀ ବ୍ୟତୀତ ସମସ୍ତ ଯାତ୍ରୀ ଏବଂ କ୍ରୁ ସଦସ୍ୟଙ୍କ ମୃତ୍ୟୁ ହୋଇଥିଲା। ଏହା ପରେ ଟାଟା ଗ୍ରୁପ୍ ଘୋଷଣା କରିଥିଲା ଯେ ପ୍ରତ୍ୟେକ ମୃତକଙ୍କ ପରିବାରକୁ କ୍ଷତିପୂରଣ ଭାବରେ ୧ କୋଟି ଟଙ୍କା ପ୍ରଦାନ କରିବ। ଏହା ସହିତ, ଏହା ମଧ୍ୟ କୁହାଯାଇଥିଲା ଯେ ୫୦୦ କୋଟି ଟଙ୍କାର ଏକ ଟ୍ରଷ୍ଟ ପ୍ରତିଷ୍ଠା କରାଯିବ। ଏହି ଟ୍ରଷ୍ଟ ମାଧ୍ୟମରେ ଶିକ୍ଷା, ସ୍ୱାସ୍ଥ୍ୟ ଏବଂ ପୁନର୍ବାସ ଭଳି ସେବା ଯୋଗାଇ ଦିଆଯିବ।