ମୁମ୍ବାଇ: ଭାରତୀୟ କ୍ରିକେଟ୍ ଦଳର ସ୍ପିନର ୟୁଜବେନ୍ଦ୍ର ଚହଲ ଓ ଧନଶ୍ରୀ ବର୍ମାଙ୍କ ଛାଡପତ୍ର ଉପରେ ବାଜିଲା କୋର୍ଟଙ୍କ ମୋହର। ଏଥିସହ ଉଭୟଙ୍କ ୪ ବର୍ଷର ବୈବାହିକ ଜୀବନ ଉପରେ ପଡ଼ିଛି ପୂର୍ଣ୍ଣଛେଦ। ଆଜି ଚହଲ ଓ ଧନଶ୍ରୀ ବମ୍ବେ ହାଇକୋର୍ଟଙ୍କ ନିର୍ଦ୍ଦେଶ ଅନୁସାରେ ବୁଧବାର ମଧ୍ୟାହ୍ଣରେ ବାନ୍ଦ୍ରା ଫ୍ୟାମିଲି କୋର୍ଟରେ ପହଞ୍ଚିଥିଲେ। ଚହଲଙ୍କ ଆଇପିଏଲ୍‌କୁ ଦୃଷ୍ଟିରେ ରଖି ତୁରନ୍ତ ଶୁଣାଣି ସାରିବାକୁ ହାଇକୋର୍ଟ ନିର୍ଦ୍ଦେଶ ଦେଇଥିଲେ। ଆଜି ବାନ୍ଦ୍ରା ଫ୍ୟାମିଲି କୋର୍ଟରେ ଶୁଣାଣି ବେଳେ ଚହଲ ଓ ଧନଶ୍ରୀ ମାଜିଷ୍ଟ୍ରେଟ୍‌ଙ୍କ ସାମ୍ନାରେ ଉପସ୍ଥିତ ଥିଲେ। 

ଉଲ୍ଲେଖନୀୟ ଚହଲ ଓ ଧନଶ୍ରୀ ପରସ୍ପର ସହମତିରେ ଛାଡ଼ପତ୍ର ନେଇଛନ୍ତି। ଉଭୟଙ୍କ ମଧ୍ୟରେ ଭରଣପୋଷଣ ବାବଦରେ ୪.୭୫ କୋଟି ଟଙ୍କାର ସହମତି ପ୍ରକାଶ ପାଇଛି। ମିଡିଆ ରିପୋର୍ଟ ଅନୁଯାୟୀ, ଧନଶ୍ରୀଙ୍କୁ ଚହଲ ପ୍ରଥମ କିସ୍ତିରେ ୨.୩୭ କୋଟି ଟଙ୍କା ଦେଇ ସାରିଛନ୍ତି। ଅବଶିଷ୍ଟ ରାଶି ଆଗାମୀ ଦିନରେ ଦେବେ। ଦୀର୍ଘ ସମୟରୁ ଉଭୟଙ୍କ ମଧ୍ୟରେ ଛାଡ଼ପତ୍ର ଖବର ଚର୍ଚ୍ଚାର ବିଷୟ ପାଲଟିଥିଲା। 

ସୂଚନାଯୋଗ୍ୟ, ଚହଲ ଧନଶ୍ରୀଙ୍କଠୁ ଡ୍ୟାନ୍ସ ଶିଖିବାକୁ ଚାହୁଁଥିଲେ। ଏହାକୁ ନେଇ ଉଭୟଙ୍କ ମଧ୍ୟରେ କଥାବାର୍ତ୍ତା ଚାଲିଥିଲା। ଡ୍ୟାନ୍ସ କରୁ କରୁ ପରସ୍ପରର ନିକଟତର ହୋଇଥିଲେ ଚହଲ ଓ ଧନଶ୍ରୀ। ପୁଣି ଉଭୟ ପରସ୍ପରର ପ୍ରେମରେ ପଡ଼ିଥିଲେ। ୨୦୨୦ରେ ଦୁହେଁ ବିବାହ ବନ୍ଧନରେ ବାନ୍ଧି ହୋଇଥିଲେ। ବିବାହର କିଛି ମାସ ପରେ ଦୁହିଁଙ୍କ ମଧ୍ୟରେ ଫାଟ ସୃଷ୍ଟି ହୋଇଥିଲା। ଫଳରେ ଦୁହିଁଙ୍କ ବୈବାହିକ ଜୀବନ ବେଶି ସମୟ ତିଷ୍ଠି ପାରି ନ ଥିଲା। କୋର୍ଟରେ ଦାଖଲ କାଗଜପତ୍ର ଅନୁସାରେ ଦୁହେଁ ୨୦୨୨ରୁ ପରସ୍ପରଠୁ ଅଲଗା ରହୁଥିଲେ। 

Also read: ୟୁଜଭେନ୍ଦ୍ର ଚହଲଙ୍କୁ ବଡ ଝଟକା, ଭରଣପୋଷଣ ପାଇଁ ଧନଶ୍ରୀଙ୍କୁ ଦେବେ ୪.୭୫ କୋଟି

ପରସ୍ପରକୁ ଛାଡ଼ପତ୍ର ଦେବା ପୂର୍ବରୁ ଚହଲ ପ୍ରଥମେ ନିଜର ଇନଷ୍ଟାଗ୍ରାମରେ ଧନଶ୍ରୀଙ୍କୁ ଅନଫୋଲ କରିଥିଲେ। ଏହା ପରେ ହିଁ ଦୁହିଁଙ୍କ ମଧ୍ୟରେ ସଂପର୍କ ଠିକ୍ ନ ଥିବା ଖବର ସାମ୍ନାକୁ ଆସିଥିଲା। ଏହାକୁ ନେଇ ଚର୍ଚ୍ଚା ଲାଗି ରହିଥିଲା। ଏସବୁ ଚର୍ଚ୍ଚା ଉପରେ ଚହଲ ଏକ ପୋଡକାଷ୍ଟରେ ଆଲୋଚନା ସମୟରେ ମୋହର ମାରିଥିଲେ।