'ଭାରତୀୟ ଟେଷ୍ଟ୍ ଟିମ୍ ଶକ୍ତିଶାଳୀ ନୁହେଁ' : ଗମ୍ଭୀରଙ୍କ କୋଚିଂକୁ ଟାର୍ଗେଟ୍ କଲେ ପୂର୍ବତନ ଇଂଲଣ୍ଡ କ୍ୟାପଟେନ୍

ନୂଆଦିଲ୍ଲୀ, ୨୯/୧୨: ଇଂଲଣ୍ଡର ପୂର୍ବତନ କ୍ରିକେଟରଙ୍କ ଟାର୍ଗେଟରେ ଗୌତମ ଗମ୍ଭୀର । ଆସେସ ସିରିଜ ପରାଜୟ ପରେ ଏବେ ଭାରତୀୟ ଟିମକୁ ଟାର୍ଗେଟ୍ କରିଛନ୍ତି ଆଲିଷ୍ଟର କୁକ୍ । ଜୁନ ମାସରେ ଇଂଲଣ୍ଡ ଗସ୍ତ କରିଥିଲା ଟିମ୍ ଇଣ୍ଡିଆ । ଶୁଭମନ ଗିଲଙ୍କ ନେତୃତ୍ୱରେ ଖେଳିଥିଲା ଟେଷ୍ଟ୍ ସିରିଜ୍ । ସିରିଜ୍ ୨-୨ରେ ବରାବର ରହିଥିଲା । କିନ୍ତୁ ସିରିଜ୍ ଖେଳିଥିବା ଭାରତୀୟ ଟିମ୍ ସେତେ ଦମଦାର୍ ନଥିବା କୁକ୍ କହିଛନ୍ତି ।

ଚାଲିଛି ଆସେସ୍ । ଟ୍ରଫି ଆଗୁଆ ହାତେଇ ସାରିଛି ଅଷ୍ଟ୍ରେଲିଆ । କଙ୍ଗାରୁ ଟିମ୍ ୩-୦ରେ ସିରିଜ୍ ହାତେଇ ନେଇଥିଲା । ପରେ ବକ୍ସି ଡେ ଟେଷ୍ଟରେ ଇଂଲଣ୍ଡ ପ୍ରତ୍ୟାବର୍ତ୍ତନ କରି ସିରିଜକୁ ୩-୧ ସ୍ଥିତିକୁ ଆଣିଛି । ଯାହାକୁ ନେଇ କୁକ୍ କହିଛନ୍ତି ଯେ, ମ୍ୟାକକୁଲମ୍ ଏବଂ ଷ୍ଟୋକ୍ସଙ୍କ ଅଧିନରେ ଇଂଲଣ୍ଡ ଟିମ୍ ଭଲ ଆରମ୍ଭ କରିଥିଲା । ବର୍ଷର ପ୍ରଥମ ୮ଟି ମୁକାବିଲାରେ ଦଳ ଜବରଦସ୍ତ ଖେଳ ପ୍ରଦର୍ଶନ କରିଥିଲା । ଏହାପରେ କିନ୍ତୁ ଦଳର ପ୍ରଦର୍ଶନ ଖରାପ ହେଲା । ଇଂଲଣ୍ଡ ଟିମର ବିଜୟ ହାର ୩୦ ପ୍ରତିଶତକୁ ଖସି ଆସିଥିଲା ।

ସେ ଆହୁରି କହିଛନ୍ତି ଯେ, ଇଂଲଣ୍ଡ ଟିମ୍ ପ୍ରଥମେ ବାଜବଲକୁ ଫୋକସ କରିଥିଲା । ଧିରେଧିରେ ଏହା ଫ୍ଲପ୍ ହେବାକୁ ଲାଗିଲା । ଭାରତ ବିପକ୍ଷ ୫ ଟିକିଆ ସିରିଜକୁ ଇଂଲଣ୍ଡ ଜିତିପାରିଥାନ୍ତା । ସେତେବେଳେ ଭାରତୀୟ ଦଳ ଖାସ୍ ନଥିଲା । ତଳ ଅପେକ୍ଷାକୃତ ଦୁର୍ବଳ ଥିଲା । ଦକ୍ଷିଣ ଆଫ୍ରିକା ବିପକ୍ଷରେ ଭାରତ କ୍ଲିନ୍ ସ୍ୱିପ୍ ହୋଇଛି ।

କୁକ୍ ଆହୁରି କହିଛନ୍ତି ଯେ, ଏବେବି ସମୟ ଅଛି । ଦଳରେ କିଛି ପରିବର୍ତ୍ତନ ହୋଇପାରେ । ଅଷ୍ଟ୍ରେଲିଆ ବିପକ୍ଷ ପ୍ରଥମ ତିନୋଟି ଟେଷ୍ଟରେ ଇଂଲଣ୍ଡ ଖରାପ ଖେଳିଥିଲା । ଯାହା ପାଇଁ ଆସେସରେ ପରାସ୍ତ ହେଲା ।

ସୂଚନାଯୋଗ୍ୟ, ଭାରତର ଟେଷ୍ଟ୍ ଟିମ୍ ଏବେ ଖରାପ ସ୍ଥିତିରେ ରହିଛି । ବିରାଟ କୋହଲି ଏବଂ ରୋହିତ ଶର୍ମା ଅବସର ନେଲା ପରେ ଦଳର ସନ୍ତୁଳନ ବିଗିଡି ଯାଇଛି । ଅନେକ ଫ୍ଲପ୍ ପ୍ଲେୟାରଙ୍କୁ ବାରମ୍ବାର ସୁଯୋଗ ମିଳୁଛି । ଯେଉଁଥିପାଇଁ ଦଳ ଦକ୍ଷିଣ ଆଫ୍ରିକା ବିପକ୍ଷରେ ଘରୋଇ ମାଟିରେ ମାତ୍ ଖାଇଥିଲା । ଦକ୍ଷିଣ ଆଫ୍ରିକା ଭାରତକୁ ଭାରତରେ ପରାସ୍ତ କରି ଇତିହାସ ରଚିବାରେ ସଫଳ ହୋଇଥିଲା । ଶୁଭମନ ଗିଲଙ୍କ ଟିମର ପରାଜୟ ପଛରେ ଅନେକ କ୍ରିକେଟର କୋଚ୍ ଗୌତମ ଗମ୍ଭୀରଙ୍କୁ ଦାୟୀ କରିଥିଲେ ।