ଯୋଗୀଙ୍କ ରାସ୍ତାରେ ଫଡ଼ନବୀସ; ଧର୍ମାନ୍ତରୀକରଣ ବିରୋଧୀ ଆଇନ୍ ଆଣିବାକୁ ପ୍ରସ୍ତୁତି ଚୂଡ଼ାନ୍ତ

ମୁମ୍ବାଇ: ଦେଶରେ ‘ଲଭ୍ ଜିହାଦ’ର ବଢ଼ୁଥିବା ମାମଲାଗୁଡ଼ିକର ସମାଧାନ ପାଇଁ ଅନେକ ରାଜ୍ୟ ଧର୍ମାନ୍ତରୀକରଣ ବିରୋଧୀ ଆଇନ ଆଣୁଛନ୍ତି। ଏହି ଧାରାରେ ଯୋଡ଼ି ହୋଇଛି ମହାରାଷ୍ଟ୍ର । ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନଭୀସଙ୍କ ଅଧ୍ୟକ୍ଷତାରେ ଗୁରୁବାର ଅନୁଷ୍ଠିତ ରାଜ୍ୟ କ୍ୟାବିନେଟ୍ ବୈଠକରେ ମହାରାଷ୍ଟ୍ରରେ ଧର୍ମାନ୍ତରୀକରଣ ବିରୋଧୀ ଆଇନ ପାଇଁ ଏକ ପ୍ରସ୍ତାବକୁ ମଞ୍ଜୁରୀ ମିଳିଛି। ଏହି କ୍ୟାବିନେଟ୍ ନିଷ୍ପତ୍ତି ପରେ, ଆଇନ ବିଭାଗ ଏକ ପ୍ରସ୍ତାବ ପ୍ରସ୍ତୁତ କରିବ ଏବଂ ରାଜ୍ୟ ବିଧାନସଭାରେ ବିଲ୍ ଉପସ୍ଥାପନ କରିବ। ଉଭୟ ଗୃହ (ବିଧାନସଭା ଏବଂ ବିଧାନ ପରିଷଦ)ର ଅନୁମୋଦନ ଏବଂ ରାଜ୍ୟପାଳଙ୍କ ସ୍ୱାକ୍ଷର ପରେ ଏହି ଆଇନ କାର୍ଯ୍ୟକାରୀ ହେବ।

ଫଡନବୀସ ସରକାରଙ୍କ ଏହି ନିଷ୍ପତ୍ତିରେ ବିଜେପି ବିଧାୟକ ନୀତେଶ ରାଣେ ଖୁସି ପ୍ରକାଶ କରିଛନ୍ତି। ସେ କହିଛନ୍ତି ଯେ, ଏହା ରାଜ୍ୟବାସୀଙ୍କ ଦୀର୍ଘଦିନର ଦାବି ଥିଲା, ଯାହା ଏବେ ପୂରଣ ହେବାକୁ ଯାଉଛି। ଏହି ଆଇନ ପ୍ରଣୟନ ହେବା ଦ୍ୱାରା ଲଭ୍ ଜିହାଦର ଘଟଣା ହ୍ରାସ ପାଇବ ଏବଂ ଦୋଷୀଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ପାଇଁ ପଥ ପ୍ରଶସ୍ତ ହେବ। ସେ ଆହୁରି ମଧ୍ୟ କହିଛନ୍ତି ଯେ, ମହାରାଷ୍ଟ୍ର ସରକାରଙ୍କ ଧର୍ମାନ୍ତରୀକରଣ ବିରୋଧୀ ଆଇନ ରାଜ୍ୟର ଝିଅମାନଙ୍କୁ ସୁରକ୍ଷା ପ୍ରଦାନ କରିବ।

ପ୍ରସ୍ତାବ ସହିତ ଜଡିତ ଅଧିକାରୀଙ୍କ ଅନୁଯାୟୀ, ପ୍ରସ୍ତାବିତ ଆଇନ ବଳପୂର୍ବକ କିମ୍ବା ପ୍ରେରିତ ଧର୍ମାନ୍ତରୀକରଣକୁ ରୋକିବା ପାଇଁ ଲକ୍ଷ୍ୟ ରଖିଛି। ଗୃହ ଏବଂ ଆଇନ ବିଭାଗ ମଧ୍ୟରେ ଆଲୋଚନା ପରେ ଡ୍ରାଫ୍ଟ ଆଇନ ପ୍ରସ୍ତୁତ କରାଯାଉଛି। ଚୂଡ଼ାନ୍ତ ହେବା ପରେ, ଏହାକୁ ଆଲୋଚନା ପାଇଁ ବିଧାନସଭାରେ ଉପସ୍ଥାପିତ କରାଯିବ। ବିଧେୟକ ପାସ୍ ହେବା ପରେ ଲଭ୍ ଜିହାଦ ଭଳି ଘଟଣା ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରିବ । ଏହି ଆଇନ ଆସିବା ପରେ ପ୍ରତାରଣା କିମ୍ବା ବଳପୂର୍ବକ ବିବାହ ମାଧ୍ୟମରେ କାହାର ଧର୍ମାନ୍ତରୀକରଣ କରିବା ଅସମ୍ଭବ ହେବ ।

ରିପୋର୍ଟ ଅନୁଯାୟୀ, ଏହି ବିଲ୍ର ବିବରଣୀ ଏପର୍ଯ୍ୟନ୍ତ ପ୍ରକାଶ କରାଯାଇ ନାହିଁ। ଏହା ଉତ୍ତର ପ୍ରଦେଶ ଆଇନ ସହିତ ସମାନ ହୋଇପାରେ । ଏହି ବିଲ୍ର ପ୍ରମୁଖ ବ୍ୟବସ୍ଥା ମଧ୍ୟରେ, ଯେକୌଣସି ଧର୍ମ ପରିବର୍ତ୍ତନ ପୂର୍ବରୁ ଜିଲ୍ଲା ମାଜିଷ୍ଟ୍ରେଟଙ୍କୁ ସୂଚନା ପ୍ରଦାନ କରିବା ବାଧ୍ୟତାମୂଳକ ହେବ। ଏହାପରେ ଜିଲ୍ଲା ମାଜିଷ୍ଟ୍ରେଟ୍ ଏକ ସାର୍ବଜନୀନ ନୋଟିସ୍ ଜାରି କରିବେ ଏବଂ ଅଭିଯୋଗ ମାଗିବେ। ଯଦି କୌଣସି ଅଭିଯୋଗ ମିଳେ, ତେବେ ତାହାର ତଦନ୍ତ କରାଯିବ ଏବଂ ସମାଧାନ କରାଯିବ।

ବଳପୂର୍ବକ, ପ୍ରଲୋଭନ ଦେଖାଇ, ଠକେଇ କିମ୍ବା ବିବାହ ଦ୍ୱାରା ଧର୍ମାନ୍ତରୀକରଣ କଲେ କଠୋର ଦଣ୍ଡ ଭୋଗିବାକୁ ପଡିବ। ଦୋଷୀ ସାବ୍ୟସ୍ତ ବ୍ୟକ୍ତିଙ୍କୁ ଏକ ବର୍ଷରୁ ୧୦ ବର୍ଷ ପର୍ଯ୍ୟନ୍ତ ଜେଲଦଣ୍ଡ ଏବଂ ଜରିମାନା ହୋଇପାରେ। ପୀଡିତାଙ୍କ ଧର୍ମାନ୍ତରୀକରଣ ସ୍ୱେଚ୍ଛାକୃତ ଥିଲା ବୋଲି ପ୍ରମାଣ କରିବାର ଭାର ଅଭିଯୁକ୍ତଙ୍କ ଉପରେ ରହିବ। ନାବାଳକ କିମ୍ବା ଅନୁସୂଚିତ ଜାତି ଏବଂ ଜନଜାତିର ସଦସ୍ୟମାନଙ୍କ ପାଇଁ ଦଣ୍ଡ ଆହୁରି କଠୋର ହେବ। ଧର୍ମାନ୍ତରୀକରଣ ପୂର୍ବରୁ ପିତାମାତାଙ୍କ ସମ୍ମତି ଆବଶ୍ୟକ ହୋଇପାରେ।