କ୍ରୁଟ୍ ମୁଣ୍ଡରେ ବେପାରୀ ବୃଦ୍ଧି ! ବସ୍‌ରେ ବିଜ୍ଞାପନ ମାରି ସରକାରୀ ଲୋଗୋକୁ ହଟାଇଦେଲା

ଭୁବନେଶ୍ୱର: ବିଜ୍ଞାପନ ମୋହରେ ଅନ୍ଧ ହୋଇଯାଇଛି କ୍ରୁଟ। ଟେଣ୍ଡର ନିୟମକୁ ଫୁରେ ଉଡ଼ାଇ, ରାଜ୍ୟ ଶାସନ ଉପରେ ବିଜ୍ଞାପନ ମାରିଲେ। ଟଙ୍କା ଆଦାୟର ମୋହ ଏମିତି ଘାରିଲା ଯେ ସରକାରୀ ଲୋଗୋକୁ ବି ହଟାଇ ଦେଲେ । ବସ୍ରେ ବିଜ୍ଞାପନ ନିର୍ଦ୍ଦିଷ୍ଟ ଉଚ୍ଚତାରେ ମରାଯିବ। ପଛରେ ଥିବା ଓଡ଼ିଶା ସରକାରଙ୍କ ଲୋଗା ଏବଂ କ୍ରୁଟର ନିଜସ୍ବ ଲୋଗାକୁ ହଟାଯିବନି। ହେଲେ ଏହି ନିୟମକୁ ମାନିଲେନି ଘରୋଇ ସଂସ୍ଥା। ବସ୍‌ର ପଛରେ ବିଜ୍ଞାପନ ମରାଗଲା। ତାହା ପୁଣି ସରକାରୀ ଲୋଗାକୁ ଘୋଡ଼ାଇ ଦେଇ।

ସରକାରୀ ଶାସନ ଚିହ୍ନ ଉପରେ ବିଭିନ୍ନ କମ୍ପାନିର ଲୋଗୋ ମାରିଲେ। ଯାହାକି ସିଧାସଳଖ ଟେଣ୍ଡର ନିୟମର ଉଲ୍ଲଙ୍ଘନ କରୁଛି। ଖୋଦ୍ ସରକାରୀ ଲୋଗାକୁ ଏପରି ଗିଳି ଦେବା ଏବଂ କୁଟ ଜାଣି ସୁଦ୍ଧା କୌଣସି କାର୍ଯ୍ୟାନୁଷ୍ଠାନ ନ ନେବାକୁ ନେଇ ସାଧାରଣରେ ପ୍ରଶ୍ନ ଉଠିଛି।

ଖାଲି ଏତିକି ନୁହେଁ, କୌଣସି ଇ-ବସ୍ରେ ବିଜ୍ଞାପନ ମାରିବା ବେଳେ ମୋଟର ଯାନ ଆଇନ ମାନିବାର ଆବଶ୍ୟକତା ରହିଛି । ହେଲେ କୁଟ ବିଜ୍ଞାପନ ମୋହରେ ଅନ୍ଧ ହୋଇଗଲା। ଏସିର ବାହ୍ୟ ନିର୍ଗମନ ଛାଡ଼ିବାକୁ ବାଟ ନାହିଁ। ଏପରି କି ବସ୍ ଗୁଡିକର ବାହାର ଏବଂ ଭିତର ପାର୍ଶ୍ଵ ରେ ଷ୍ଟିକରିଂ ଯୋଗୁଁ ପଛରେ ଥିବା ଏସି କଂପ୍ରେସର ଗରମ ହୋଇଯାଉଛି । ଏହାଦ୍ବାରା ଯାତ୍ରୀଙ୍କୁ ନେଇ ଯାଉଥିବାବେଳେ ଇ-ବସ୍ରେ ଅଘଟଣ ଘଟିବା ଆଶଙ୍କାକୁ ଏଡ଼ାଇ ଦିଆଯାଇ ନ ପାରେ।

ପ୍ରସାର କରିବାକୁ ବସରେ ଜଗନ୍ନାଥ ମନ୍ଦିର ସମେତ କୋଣାର୍କ, ଧଉଳି ଶାନ୍ତିସ୍ତୂପ ଆଦିର ଫଟୋ ରଖାଯାଇଥିଲା। ହେଲେ ମାତ୍ର କେଇଟା ଟଙ୍କା ପାଇଁ ଏହା ଉପରେ ବିଜ୍ଞାପନ ମାରି ଏହାକୁ ଘୋଡାଇ ଦେଲା । ଏହାକୁ ନେଇ ଖବର ପ୍ରକାଶ ପାଇଥିଲା। ବିଭିନ୍ନ ସଂଗଠନ ଏହାର ବିରୋଧ କରିଥିଲେ। ଏହା ପରେ ବାଧ୍ୟ ହୋଇ କ୍ରୁଟ ୧୦ଟି ବସ୍ରୁ ବିଜ୍ଞାପନ ହଟାଇଥିଲା। ହେଲେ କୁଟ ପକ୍ଷରୁ ଅନ୍ୟ ବସରୁ କିନ୍ତୁ ବିଜ୍ଞାପନ ହଟାଗଲାନାହିଁ ।

କ୍ୟାପିଟାଲ ରିଜନ ଅର୍ବାନ ଟ୍ରାନ୍ସପୋର୍ଟ (କ୍ରୁଟ) ପକ୍ଷରୁ ରାଜଧାନୀ ଭୁବନେଶ୍ଵର ସମେତ କଟକ, ପୁରୀ, ରାଉରକେଲା, ସମ୍ବଲପୁରରେ ପ୍ରାୟ ୬୭୦ ଆମ ବସ୍ ଚାଲୁଛି। ସେଥିମଧ୍ୟରୁ କୁଟ ୫୬୦ ବସରେ ବିଜ୍ଞାପନ ମାରିଛି। ପୁରୁଣା ବସ୍ ସମେତ ନୂଆ କରି କିଣା ହୋଇଥିବା ୨୦୦ ଇ-ବସରେ ମଧ୍ୟ ବିଜ୍ଞାପନ ମରାଯାଇଛି। ଆଗକୁ ଆହୁରି ୪୦୦ ଇ-ବସ୍ ଆଣିବାକୁ କ୍ରୁଟ ଯୋଜନା କରୁଛି ।