ନୂଆଦିଲ୍ଲୀ: ନ୍ୟାସନାଲ୍ ହେରାଲ୍ଡ ସହ ଜଡ଼ିତ ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ ଚାର୍ଜସିଟ୍ ଦାଖଲ କରିଛି । ଏହି ଚାର୍ଜସିଟରେ କଂଗ୍ରେସ ସାଂସଦ ସୋନିଆ ଗାନ୍ଧୀ ଓ ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କୁ ଅଭିଯୁକ୍ତ ଦର୍ଶାଯାଇଛି । କଂଗ୍ରେସ ଏହି ପଦକ୍ଷେପକୁ ପ୍ରତିଶୋଧ ରାଜନୀତି ବୋଲି କହିଛି । ଏଥିପାଇଁ ପ୍ରଧାନମନ୍ତ୍ରୀ ଓ ଗୃହମନ୍ତ୍ରୀଙ୍କୁ ଟାର୍ଗେଟ୍ କରିଛି । କେବଳ ଏତିକି ନୁହେଁ କଂଗ୍ରେସ ନେତୃତ୍ୱ ବୁଧବାର ସାରା ଦେଶରେ ପ୍ରଦର୍ଶନ କରିବ ବୋଲି ଘୋଷଣା କରିଛି । ପାର୍ଟି ସାରା ଦେଶରେ ଇଡି କାର୍ଯ୍ୟାଳୟ ବାହାରେ ପ୍ରଦର୍ଶନ କରିବ ।
କଂଗ୍ରେସ ପାର୍ଟି ନିଜ ଶୀର୍ଷ ସୋନିଆ ଗାନ୍ଧୀ ଓ ରାହୁଲ ଗାନ୍ଧୀଙ୍କ ଉପରେ ଇଡି ଜରିଆରେ ପ୍ରତିଶୋଧର କାର୍ଯ୍ୟାନୁଷ୍ଠାନ ବିରୋଧରେ ପ୍ରଦର୍ଶନ କରିବ ବୋଲି ଘୋଷଣା କରିଛି । ଇଡି ନ୍ୟାସନାଲ ହେରାଲ୍ଡ ମାମଲାରେ ମନି ଲଣ୍ଡ୍ରିଂ ଅଭିଯୋଗରେ କଂଗ୍ରେସ ନେତା ସୋନିଆ ଗାନ୍ଧୀ, ରାହୁଲ ଗାନ୍ଧୀ ଓ ଅନ୍ୟଙ୍କ ବିରୋଧରେ ଅଭିଯୋଗ ପତ୍ର ଦାଖଲ କରିଛି । ସ୍ପେଶାଲ ଜଜ୍ ବିଶାଲ ଗୋଗନେ ଇଡି ଦ୍ୱାରା ଦାଖଲ ଚାର୍ଜସିଟର ଗୁରୁତ୍ୱପୂର୍ଣ୍ଣ ପଏଣ୍ଟ ଉପରେ ଯାଞ୍ଚ କରିବା ସହ ମାମଲାର ପରବର୍ତ୍ତୀ ଶୁଣାଣି ଏପ୍ରିଲ୍ ୨୫ ପାଇଁ ଧାର୍ଯ୍ୟ କରିଛନ୍ତି ।
କଂଗ୍ରେସ ପାର୍ଟିର ସଂଗଠନ ମହାସଚିବ କେସି ବେଣୁଗୋପାଲ ଏକ୍ସରେ ଏନେଇ ଏକ ପୋଷ୍ଟ କରିଛନ୍ତି । ସେ ଲେଖିଛନ୍ତି, 'ମୋଦୀ-ଶାହ ଶାସନର ବିରୋଧୀଙ୍କ ପାଇଁ ପ୍ରତିଶୋଧର କୌଣସି ସୀମା ନାହିଁ । ସୋନିଆ ଗାନ୍ଧୀ, ରାହୁଲ ଗାନ୍ଧୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ପ୍ରତିଶୋଧର ରାଜନୀତିରୁ ପ୍ରେରିତ । ମନଗଢା ନ୍ୟାସନାଲ ହେରାଲ୍ଡ ମାମଲା କରି ବିରୋଧୀଙ୍କ ସ୍ୱରକୁ ଚାପିବା ଓ ଚୁପ୍ କରାଇବାର ତାଙ୍କ ପ୍ରୟାସର ଏକ ସ୍ପଷ୍ଟ ଉଦାହରଣ ।'
The Modi-Shah regime’s vendetta against the Opposition knows no bounds. The witch hunt against Smt. Sonia Gandhi ji and LOP Sh. @RahulGandhi ji, using the frivolous, politically motivated & fabricated National Herald case, is a clear example of their attempt at intimidation and…
— K C Venugopal (@kcvenugopalmp) April 15, 2025
ବେଣୁଗୋପାଳ ଦାବି କରିଛନ୍ତି ଯେ ଏଥିରୁ ପ୍ରଧାନମନ୍ତ୍ରୀ ଓ ଗୃହମନ୍ତ୍ରୀଙ୍କ ହତାଶା ଭାବ ବାରି ହେଉଛି । କାରଣ ସେମାନେ ଲୋକଙ୍କ ଚିନ୍ତାଙ୍କୁ ଦୂର କରିବାରେ ବିଫଳ ହୋଇଛନ୍ତି ଓ ଲଗାତାର ଧ୍ୟାନ ହଟାଇବାକୁ ଉଦ୍ୟମ କରୁଛନ୍ତି । ସେ କହିଛନ୍ତି ଯେ ସେମାନେ ଭୁଲି ଯାଇଛନ୍ତି ଯେ ଏହି ପରିବାର (ଗାନ୍ଧୀ ପରିବାର) ଦେଶକୁ ନିଜ ରକ୍ତ ଦେଇଛି । ଏଜେନ୍ସିକୁ ବ୍ୟବହାର କରି ସେମାନେ ଆମକୁ ରୋକିପାରିବେ ନାହିଁ ।
