ସୁନ୍ଦରଗଡ଼: ବଦଳିଲା କଂଗ୍ରେସର ତଲସରା ନିର୍ବାଚନ ମଣ୍ଡଳୀ ବିଧାୟକ ପ୍ରାର୍ଥୀ। କଂଗ୍ରେସର ପ୍ରଥମ ପର୍ଯ୍ୟାୟରେ ଘୋଷିତ ୪୯ ଜଣିଆ ପ୍ରାର୍ଥୀ ତାଲିକାରେ ତଲସରା ଆସନରୁ ହକି ତାରକା ପ୍ରବୋଧ ତିର୍କୀଙ୍କ ନାଁ ଘୋଷଣା କରାଯାଇ ଥିଲା। ପ୍ରାର୍ଥୀ ଭାବେ ନାଁ ଘୋଷଣା ହେବା ପରେ କଂଗ୍ରେସ ସମର୍ଥକଙ୍କ ସହ ଗାଁ ଗାଁ ବୁଲି ନିର୍ବାଚନ ପ୍ରଚାର ଆରମ୍ଭ କରିଥିଲେ ପ୍ରବୋଧ।
ନିର୍ବାଚନରେ ଲଢ଼ିବାକୁ ସଜବାଜ ହେଉଥିବା ବେଳେ ରବିବାର ସନ୍ଧ୍ୟାରେ କଂଗ୍ରେସର ଆସିଥିଲା ଦ୍ଵିତୀୟ ପର୍ଯ୍ୟାୟ ନାମ ତାଲିକା।ଏହି ତାଲିକାରେ ପ୍ରବୋଧଙ୍କ ନାଁ କାଟି ତାଙ୍କ ସ୍ଥାନରେ ପୂର୍ବତନ ବିଧାୟକ ରଞ୍ଜିତ ଭିତିରିଆଙ୍କ ଭାଇ ଦେବେନ୍ଦ୍ର ଭିତିରିଆଙ୍କୁ ଦିଆଗଲା ବୋଲି ଘୋଷଣା କରାଗଲା। ଏହି ଖବର ପ୍ରଚାରିତ ହେବା ପରେ ପ୍ରଥମେ ବିଶ୍ୱାସ କରି ପାରୁ ନଥିବା ପ୍ରବୋଧ ପରେ ସତ୍ୟ ବୋଲି ଅନୁଭବ କରିଥିଲେ।ଏହି ଖବର ପାଇବା ପରେ ସେ କାନ୍ଦି ପକାଇ ଥିଲେ।
ସେ ଛଳ ଛଳ ଆଖିରେ କହିଛନ୍ତି ମୋ ପାଇଁ ଦୁର୍ଭାଗ୍ୟର କଥା। ପ୍ରଥମ ପର୍ଯ୍ୟାୟରେ ତଳସରାରୁ ଟିକେଟ୍ ଦେଇ ପୁଣି କାଟି ଦିଆଯିବା ବଡ଼ ଦୁର୍ଭାଗ୍ୟର କଥା। ଏହାକୁ ମୁଁ କଦାପି ବିଶ୍ଵାସ କରି ପାରୁନି। ଟିକେଟ୍ ମିଳିବା ପରେ ୪ଟି ବ୍ଲକରେ କ୍ୟାମ୍ପେନିଂ କରିଥିଲୁ। ପ୍ରଚାର ପାଇଁ ସବୁ ଯୋଜନା ମଧ୍ୟ ସରିଥିଲା। ଆଜି ପ୍ରଚାର କରିବା ସମୟରେ ଜାଣିବାକୁ ପାଇଲି ଯେ, ମୋ ଟିକେଟ୍ କଟି ଯାଇଛି। ଯଦି ଦେବା ନ ଥିଲା ତେବେ ଆରମ୍ଭରୁ ଦେଇ ନ ଥାନ୍ତେ। ଟିକେଟ୍ ଦେଇ ପୁଣି କାଟିବା ବହୁତ ଖରାପ ଲାଗିଲା।
