ଜୟପୁର: ରାଜସ୍ଥାନରେ ୨୦୨୫ ବିଧାନସଭା ବଜେଟ୍ ଅଧିବେଶନ ଆରମ୍ଭ ହୋଇଛି । ତେବେ ବିଧାନସଭା ଭିତରର ଦୃଶ୍ୟ ପୂରା ଭିନ୍ନ ଥିଲା । ତଳେ ବିଛା ଯାଇଥିବା କାର୍ପେଟ୍ ସବୁଜରୁ ଗୋଲାପି ହୋଇସାରିଥିଲା । ବିଧାୟକଙ୍କ ବସିବା ସିଟ୍ର ରଙ୍ଗ ବଦଳି ଲାଇଟ୍ ଫିଙ୍କ୍ ଥିଲା।
ଅନ୍ୟପଟେ ଏଣ୍ଟ୍ର ଗେଟ୍ ମଧ୍ୟ ବଦଳି ଯାଇଥିଲା । ରାଜସ୍ଥାନ ବିଧାନସଭାର ବଦଳିଥିବା ରୂପକୁ ଦେଖି ବିଧାୟକ ହତଚକିତ ହୋଇଥିଲେ । ବିଧାୟକମାନେ ଯେତେବେଳେ ବାଚସ୍ପତି ବାସୁଦେବ ଦେବନାନୀଙ୍କ ଠାରୁ ଏହାର କାରଣ ଜାଣିବାକୁ ଚାହୁଁଥିଲେ, ସେତେବେଳେ ତାଙ୍କର ଜବାବ ଥିଲା- ବାସ୍ତୁଦୋଷ କାରଣରୁ ଏହି ନିଷ୍ପତ୍ତି ନିଆଯାଇଛି ।
ପରିବର୍ତ୍ତିତ ରାଜସ୍ଥାନ ବିଧାନସଭାର ଚିତ୍ର
ବିଧାନସଭାରେ ବିଧାୟକଙ୍କ ସହ ଆଲୋଚନା କରି ବାଚସ୍ପତି ଦେବନାନୀ କହିଛନ୍ତି ଯେ ବାସ୍ତୁଦୋଷ କାରଣରୁ ଏହି ପରିବର୍ତ୍ତନ କରାଯାଇଛି । ଆଗକୁ ଆହୁରି କିଛି ପରିବର୍ତ୍ତନ କରାଯାଇପାରେ । ରାଜସ୍ଥାନ ବିଧାନସଭା ୨୦୦୧ ମସିହାରେ ନିର୍ମାଣ ହୋଇଥିଲା । ସେବେଠାରୁ ଆଜି ଯାଏ ୧୬ ବିଧାୟକଙ୍କ ମୃତ୍ୟୁ ହୋଇଛି । ନିକଟ ଅତୀତରେ ବାଚସ୍ପତି ବାସୁଦେବ ଦେବନାନୀଙ୍କୁ ହାର୍ଟଆଟାକ୍ ଆସିଥିଲା । ବିଧାନସଭା ଭିତରେ ହୋଇଥିବା ପରିବର୍ତ୍ତନକୁ ଏହା ସହ ଯୋଡ଼ି ଦେଖାଯାଉଛି ।
ପୁରୁଣା ବିଧାନସଭାର ଭିତର ଦୃଶ୍ୟ
୨୦୦୧ରେ ତତ୍କାଳୀନ ଅଶୋକ ଗେହଲଟ୍ ସରକାର ନୂଆ ବିଧାନସଭାରେ କାର୍ଯ୍ୟ ଆରମ୍ଭ କରିଥିଲେ । ସେତେବେଳେ ବାସ୍ତୁଦୋଷକୁ ନେଇ ବିବାଦ ଉଠିଥିଲା । ରାଜସ୍ଥାନ ବିଧାନସଭାରେ ଅନେକ ଥର ପ୍ରଶ୍ନ ଉଠିସାରିଛି । ୧୬.୧ ଏକରରେ ନିର୍ମିତ ରାଜସ୍ଥାନ ବିଧାନସଭାର ଏହି ଭବନର ବାସ୍ତୁଦୋଷ ମାମଲା ଆନୁଷ୍ଠାନିକ ଭାବେ ୮ ଉଠିସାରିଛି । ଯଜ୍ଞ ଏବଂ ହୋମ ପାଠର ଆୟୋଜନ ମଧ୍ୟ କରାସରିଛି । ତେବେ ପୂର୍ବରୁ ଏହାକୁ ଏତେ ଗୁରୁତ୍ୱର ସହ ନିଆଯାଇନଥିଲା ।
କୁହାଯାଉଛି ଯେ ଉଦଘାଟନ ନକରି ବିଧାନସଭାରେ କାର୍ଯ୍ୟ ଆରମ୍ଭ କରାଯାଇଥିଲା । ଉଲ୍ଲେଖଯୋଗ୍ୟ, ବିଧାନସଭା ଉଦଘାଟନ ତତ୍କାଳୀନ ରାଷ୍ଟ୍ରପତି କେଆର ନାରାୟଣନଙ୍କ ଦ୍ୱାରା ହେବାର ଥିଲା । କିନ୍ତୁ ଉଦଘଟାନ ପୂର୍ବରୁ ସେ ଅସୁସ୍ଥ ହୋଇଥିଲେ, ଯାହାପରେ ଏହି ଭବନର ଉଦଘାଟନ କରାଗଲା ନାହିଁ ।
