ବିଜେଡି ଉପରେ ବର୍ଷିଲା ବିଜେପି, କହିଲା ବଞ୍ଚିଥିବାବେଳେ ପଚାରିଲେନି, ଏବେ କହିଲେ କଣ ହେବ

ଭୁବନେଶ୍ୱର ୦୭/୧୧: ନୂଆପଡ଼ା ରାଜନୀତି ସରଗରମ । ଚାଲିଛି କଥା କଟାକଟି । ବିଜେଡି-ବିଜେପି ମଧ୍ୟରେ ଜୋରଦାର ତର୍କ ବିତର୍କ । ଏହି ଅବସରରେ ବିଜେଡି ଉପରେ ବର୍ଷିଛି ବିଜେପି । ବିଜେପି କହିଛି ବିଜେଡି ରାଜୁ ଢୋଲକିଆଙ୍କ ପରିବାର ପ୍ରତି ଖରାପ ବ୍ୟବହାର କରିଆସୁଛି । ନବୀନଙ୍କ କ୍ୟାଣ୍ଡିଡେଟ ଚୋରି ଓ ବେଈମାନ ଶବ୍ଦକୁ ଆମେ ନିନ୍ଦା କରୁଛୁ । କ୍ୟାଣ୍ଡିଡେଟ ଚୋରି ବସ୍ତୁର ହୋଇଥାଏ । କୌଣସି ବ୍ୟକ୍ତି ଓ ଆତ୍ମା ଚୋରି ସମ୍ଭବ କି ?

ଜୁନ ମାସରୁ ରାଜୁ ଭାଇ ରୋଗାଗ୍ରସ୍ତ ଥିଲେ, ହୃଦୟ ମାତ୍ର ୨୦ ପ୍ରତିଶତ କାମ କରୁଥିଲା ଏବଂ କିଡ଼ନୀ ମଧ୍ୟ ଖରାପ ହୋଇଯାଇଥିଲା । ପରିବାର ସମସ୍ତଙ୍କ ସହିତ ଆଲୋଚନା କରିଥିଲେ । ଜୟ ଢୋଲକିଆ କିଡ଼ନୀ ଦେବାକୁ ରାଜି ହୋଇଥିଲେ । ରାଜୁ ଭାଇଙ୍କୁ ଦେଖିବାକୁ କୌଣସି ବିଜେଡ଼ି ନେତା ଭେଟିବାକୁ ଆସିଲେ ନାହିଁ । ଏୟାର ଆମ୍ବୁଲାନ୍ସ ପାଇଁ ବିଜେଡ଼ିର ବରିଷ୍ଠ ନେତାଙ୍କ ସହିତ କଥା ହେଲେ କିନ୍ତୁ କେହି ସହଯୋଗ କଲେ ନାହିଁ । ଏହାପରେ ନିଜସ୍ୱ ଉଦ୍ୟମରେ ଏବଂ ସାହାଯ୍ୟ ମାଗି ଏୟାର ଆମ୍ବୁଲାନ୍ସ ବ୍ୟବସ୍ତା କରିଥିଲେ ତାଙ୍କ ପରିବାର ।

ଏତେ ବଡ଼ ଦଳ, ସେ ଦୀର୍ଘ ବର୍ଷ ଧରି କାମ କରିଥିଲେ, ପରିବାର ଲୋକ ବାରମ୍ବାର ବିଜେଡ଼ି ନେତାଙ୍କୁ ଭେଟିଥିଲେ କିନ୍ତୁ କିଛି ଲାଭ ହୋଇନଥିଲା । ଶ୍ରଦ୍ଧାଞ୍ଜଳି ସଭା କମ ରାଜନୈତିକ ସଭା ଅଧିକ ଥିଲା । ପଲିଟିକାଲ ମାଇଲେଜ ନେବା ପାଇଁ ଅଧିକ କାମ କରୁଥିଲେ । ପରିବାର ସେହି ଦିନ ଠାରୁ ସ୍ଥିର କରିଥିଲେ । ବେଈମାନ ଏବଂ ଚୋର କୁହାଗଲା, ମୃତ୍ୟୁ ସମୟରେ ଯେଉଁ ସାମ୍ମନ ମିଳିବା କଥା ସେଭଳି ମିଳିଲା ନାହିଁ । ଜୟ ଢୋଲକିଆଙ୍କ ଧର୍ମପତ୍ନୀ ତାଙ୍କୁ କାନ୍ଦିକି କହିଛନ୍ତି ବୋଲି କହିଲେ ସମ୍ବିତ ପାତ୍ର । ଜୟ ଢୋଲକିଆ ମୁଣ୍ଡନ ନହେବା କଥା କହୁଛନ୍ତି କିନ୍ତୁ ଜୈନ ଧର୍ମରେ ମୁଣ୍ଡନ ହୁଅନ୍ତି ନାହିଁ । ବିଜେଡ଼ି ଯେଉଁ ରାଜନୀତି କରୁଛି ତାହା ଠିକ ନୁହେଁ । 

ସେହିପରି ପ୍ରତିକ୍ରିୟା ରଖିଛନ୍ତି ସ୍ୱର୍ଗତଃ ରାଜେନ୍ଦ୍ର ଢୋଲକିଆଙ୍କ ଭାଇ ଅତୁଲ ଢୋଲକିଆ । ସେ କହିଛନ୍ତି ପ୍ରତିକୂଳ ସମୟରେ ବିଜେଡ଼ି ବ୍ୟବହାର ଆମକୁ ଦୁଃଖ ଦେଇଛି । ସାରା ଜୀବନ ଯିଏ ଦଳ ପାଇଁ ଦେଇଥିଲେ, ତାଙ୍କ କୌଣସି ପ୍ରକାର ସହଯୋଗ କଲେ ନାହିଁ । ରାଜୁ ଭାଇଙ୍କ ଦେହ ଖରାପ ସମୟରେ ବିଜେଡ଼ି ଆଡ଼ଭାନଟେଜ ନେବା ପାଇଁ ମୋତେ ଫୋନ କଲେ । ଏୟାର ଆମ୍ବୁଲାନ୍ସ କରି ଦିଅନ୍ତୁ, ଆମେ ଟଙ୍କା ଦେଇଦେବୁ ବୋଲି ଆଶ୍ବସନା ଦେଇଥିଲେ । କିନ୍ତୁ ଜୟ ଭାଇ ଟଙ୍କା ଆରେଞ୍ଜ କରିଥିଲେ । ଏହା ପରଠାରୁ ୧୫ ଦିନ ପର୍ଯ୍ୟନ୍ତ କଲ ଆସିନଥିଲା । ସ୍ୱାର୍ଥ ପାଇଁ ଆମ୍ବୁଲାନ୍ସ ପାଇଁ କଥା କହିଥିଲେ । ମୃତ୍ୟୁ ପର୍ଯ୍ୟନ୍ତ କେହି ଫୋନ କରି ନଥିଲେ ।

ବିଜେଡ଼ି କେବଳ ରାଜନୀତି ଜାଣିଛି, ଭଲରେ ଶ୍ରଦ୍ଧାଞ୍ଜଳି ମଧ୍ୟ ଦେଲେ ନାହିଁ । କେହି ସାହାଯ୍ୟ ସହଯୋଗ କରିନାହାନ୍ତି, ଯଦି ସେମାନଙ୍କ ପାଖରେ କୌଣସି ପ୍ରମାଣ ଅଛି ଦିଅନ୍ତୁ । ଏହାସହ ରାଜୁ ଢୋଲକିଆଙ୍କ ପତ୍ନୀ କଳ୍ପନା ଢୋଲକିଆ ବି ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି ଜୟ ଢୋଲକିଆଙ୍କୁ ସବୁଆଡୁ ସମର୍ଥନ ମିଳୁଛି । ସମସ୍ତେ କହୁଛନ୍ତି ଚିନ୍ତା କରନ୍ତୁ ନାହିଁ, ନୂଆପଡାବାସୀ ଆପଣଙ୍କ ସହିତ ଅଛନ୍ତି । ବିଜେଡ଼ି ପ୍ରତିକୂଳ ସମୟରେ ସାଥ ଦେଇ ନଥିବାରୁ ଦୁଃଖ ଲାଗୁଛି ।