ନୂଆଦିଲ୍ଲୀ: ଜଜ୍ଙ୍କ ଘରୁ ଟଙ୍କା ମିଳିବା ମାମଲାରେ ରାଷ୍ଟ୍ରପତି ଓ ପ୍ରଧାନମନ୍ତ୍ରୀଙ୍କୁ ରିପୋର୍ଟ ପଠାଇଛନ୍ତି ସିଜେଇ ସଞ୍ଜୀବ ଖନ୍ନା । ଜଷ୍ଟିସ୍ ୟଶୱନ୍ତ ବର୍ମାଙ୍କ ଘରୁ ନଗଜ ମିଳିବା ମାମଲାରେ ତିନି ସଦସ୍ୟ ଇନ୍-ହାଉସ କମିଟି ତଦନ୍ତ କରିଥିଲା । ଏବେ ଏହି ତଦନ୍ତ ରିପୋର୍ଟକୁ ରାଷ୍ଟ୍ରପତି ଓ ପ୍ରଧାନମନ୍ତ୍ରୀଙ୍କ ନିକଟକୁ ପଠାଯାଇଛି ।
ସିଜେଆଇ ଖନ୍ନା ରାଷ୍ଟ୍ରପତିଙ୍କୁ ଚିଠି ଲେଖି ଜଷ୍ଟିସ ବର୍ମାଙ୍କଠାରୁ ମେ ୬ରେ ମିଳିଥିବା ଜବାବକୁ ମଧ୍ୟ ସଂଲଗ୍ନ କରିଛନ୍ତି । ସୁପ୍ରିମକୋର୍ଟ ଦ୍ୱାରା ଜାରି ଏକ ବୟାନରେ କୁହାଯାଇଛି, 'ଭାରତର ପ୍ରଧାନ ବିଚାରପତି ଇନ-ହାଉସ୍ ପ୍ରକ୍ରିୟା ସମ୍ୱନ୍ଧରେ ରାଷ୍ଟ୍ରପତି ଓ ପ୍ରଧାନମନ୍ତ୍ରୀଙ୍କୁ ପତ୍ର ଲେଖି ଜଷ୍ଟିସ ୟଶୱନ୍ତ ବର୍ମାଙ୍କଠାରୁ ମିଳିଥିବା ପ୍ରତିକ୍ରିୟା ସହ ୦୩.୦୫.୨୦୨୫ରେ ତିନି ସଦସ୍ୟଙ୍କ ସମିତି ରିପୋର୍ଟର କପି ସଂଲଗ୍ନ କରାଯାଇଛି ।'
ଜଷ୍ଟିସ୍ ୟଶୱନ୍ତ ବର୍ମାଙ୍କ ଘରୁ ନଗଦ ରାଶି ମିଳିବା ଅଭିଯୋଗର ତଦନ୍ତ ପାଇଁ ସୁପ୍ରିମକୋର୍ଟ ଏକ କମିଟି ଗଠନ କରିଥିଲେ । ତଦନ୍ତ ପାଇଁ ଗଠିତ କମିଟିରେ ପଞ୍ଜାବ ଓ ହରିୟାଣା ହାଇକୋର୍ଟର ମୁଖ୍ୟ ବିଚାରପତି ଜଷ୍ଟିସ୍ ଶୀଲ ନାଗୁ, ହିମାଚଳ ପ୍ରଦେଶ ହାଇକୋର୍ଟ ମୁଖ୍ୟ ନ୍ୟାୟଧୀଶ ଜଷ୍ଟିସ୍ ଜିଏସ୍ ସନ୍ଧାବାଲିୟା ଓ କର୍ଣ୍ଣାଟକ ହାଇକୋର୍ଟର ନ୍ୟାୟଧୀଶ ଜଷ୍ଟିସ୍ ଅନୁ ଶିବରାମନ ସାମିଲ ଥିଲେ ।
ଉଲ୍ଲେଖଯୋଗ୍ୟ, ମାର୍ଚ୍ଚ ୧୪ରେ ରାତି ପ୍ରାୟ ୧୧.୩୫ ମିନିଟରେ ଜଷ୍ଟିସ୍ ବର୍ମାଙ୍କ ଲୁଟିୟନ୍ସ ଦିଲ୍ଲୀ ସ୍ଥିତ ଘରେ ନିଆଁ ଲାଗିବା ପରେ ଫାୟାର ବ୍ରିଗେଡ୍ ନିଆଁକୁ ଆୟତ୍ତ କରିଥିଲେ । ଏହି ସମୟରେ କଥିତ ରୂପେ ଘରୁ ବିପୁଳ ମାତ୍ରାରେ ନଗଦ ଟଙ୍କା ମିଳିଥିଲା ।
