Yearly Horoscope 2026 : ମୀନ ରାଶିର ବ୍ୟକ୍ତି ଦାନ କରନ୍ତୁ, ମିଳିବ କଷ୍ଟରୁ ମୁକ୍ତି

ବୃହସ୍ପତି ଜୁନ୍ ୨, ୨୦୨୬ ପର୍ଯ୍ୟନ୍ତ ଚତୁର୍ଥ ଭାବରେ ରହିବେ, ତା'ପରେ ପଞ୍ଚମ ଭାବକୁ ପ୍ରବେଶ କରିବେ। ଶନି ସମ୍ପୂର୍ଣ୍ଣ ବର୍ଷ ପ୍ରଥମ ଭାବରେ (ଲଗ୍ନ) ଅବସ୍ଥାନ କରିବେ (ଶନିଙ୍କ ସାଢ଼େସାତୀର ପ୍ରଥମ ପାଦ)। ରାହୁ ଡିସେମ୍ବର ୫, ୨୦୨୬ ପର୍ଯ୍ୟନ୍ତ ଦ୍ୱାଦଶ ଭାବରେ ଏବଂ କେତୁ ଡିସେମ୍ବର ୫, ୨୦୨୬ ପର୍ଯ୍ୟନ୍ତ ଷଷ୍ଠ ଭାବରେ ଅବସ୍ଥାନ କରିବେ।

ଶିକ୍ଷା - ବର୍ଷର ପ୍ରଥମାର୍ଦ୍ଧରେ ଚତୁର୍ଥ ଗୁରୁଙ୍କ ପ୍ରଭାବ ହେତୁ ଉଚ୍ଚ ଶିକ୍ଷା ପାଇଁ ସମୟ ଅନୁକୂଳ ରହିବ। ଜୁନ୍ ୨ ପରେ ପଞ୍ଚମ ବୃହସ୍ପତିଙ୍କ ଗୋଚର ଶିକ୍ଷାରେ ଉତ୍କର୍ଷ ଏବଂ ଏକାଗ୍ରତା ବୃଦ୍ଧି କରିବ। ଷଷ୍ଠ କେତୁଙ୍କର ସ୍ଥିତି ପ୍ରତିଯୋଗିତାମୂଳକ ପରୀକ୍ଷାରେ ସଫଳତା ଆଣିବ। ତେବେ ପ୍ରଥମ ଶନିଙ୍କ ସାଢ଼େସାତୀର ପ୍ରଭାବ ହେତୁ ଅଧିକ ପରିଶ୍ରମ କରିବାକୁ ପଡ଼ିବ।

ସ୍ୱାସ୍ଥ୍ୟ - ପ୍ରଥମ ଭାବରେ ଶନିଙ୍କର ଅବସ୍ଥାନ ଏବଂ ଦ୍ୱାଦଶ ରାହୁଙ୍କର ସ୍ଥିତି ଯୋଗୁଁ ସ୍ୱାସ୍ଥ୍ୟ ପ୍ରତି ଅତ୍ୟନ୍ତ ସତର୍କ ରହିବା ଆବଶ୍ୟକ। ଶନିଙ୍କ ସାଢ଼େସାତୀ କାରଣରୁ କ୍ଳାନ୍ତି, ଦୁର୍ବଳତା ଏବଂ ମାନସିକ ଚାପ ଦେଖାଦେଇପାରେ। ଦ୍ୱାଦଶ ରାହୁ ଅଜଣା ସ୍ୱାସ୍ଥ୍ୟ ସମସ୍ୟା କିମ୍ବା ଚିକିତ୍ସା ବାବଦରେ ଅଧିକ ଖର୍ଚ୍ଚ କରାଇପାରନ୍ତି। ଷଷ୍ଠ କେତୁ ପୁରୁଣା ରୋଗରୁ ମୁକ୍ତି ଦେବେ। ନିୟମିତ ଯୋଗାଭ୍ୟାସ ଏବଂ ଧ୍ୟାନ ଆବଶ୍ୟକ।

ଚାକିରି - ପ୍ରଥମ ଶନିଙ୍କର ସ୍ଥିତି କାର୍ଯ୍ୟ କ୍ଷେତ୍ରରେ ଅଧିକ ଦାୟିତ୍ୱ ଏବଂ କଠୋର ପରିଶ୍ରମ ଦାବି କରିବ। ତେବେ ଧୈର୍ଯ୍ୟ ରଖିଲେ ସଫଳତା ମିଳିବ। ଷଷ୍ଠ କେତୁ ଶତ୍ରୁମାନଙ୍କ ଉପରେ ବିଜୟ ଏବଂ ପ୍ରତିଯୋଗିତାମୂଳକ କ୍ଷେତ୍ରରେ ସଫଳତା ଆଣିବେ। ଜୁନ୍ ୨ ପରେ ପଞ୍ଚମ ଗୁରୁଙ୍କର ଦୃଷ୍ଟି କର୍ମ କ୍ଷେତ୍ରରେ ନୂତନ ସୁଯୋଗ ଏବଂ ଉନ୍ନତି ଆଣିବ।

ବ୍ୟବସାୟ - ପ୍ରଥମ ଶନିଙ୍କ ପ୍ରଭାବ ବ୍ୟବସାୟରେ ଧୀର କିନ୍ତୁ ସ୍ଥାୟୀ ଉନ୍ନତି ଆଣିବ। ବର୍ଷଟି ବ୍ୟବସାୟରେ ବଡ଼ ନିଷ୍ପତ୍ତି ନେବା ପାଇଁ ଅନୁକୂଳ ନୁହେଁ। ଦ୍ୱାଦଶ ରାହୁଙ୍କ ପ୍ରଭାବ ହେତୁ ବିଦେଶୀ ସୂତ୍ରରୁ ଲାଭ ମିଳିପାରେ। ଜୁନ୍ ୨ ପରେ ପଞ୍ଚମ ଗୁରୁଙ୍କ ପ୍ରଭାବ ଆର୍ଥିକ ଯୋଜନାରେ ସହାୟକ ହେବ।

ବିବାହ - ବର୍ଷର ପ୍ରଥମାର୍ଦ୍ଧରେ ଚତୁର୍ଥ ଗୁରୁ ଏବଂ ପଞ୍ଚମ ଗୁରୁ (ଜୁନ୍ ପରେ)ଙ୍କ ପ୍ରଭାବ ହେତୁ ବିବାହ ପାଇଁ ଚେଷ୍ଟା କରୁଥିବା ବ୍ୟକ୍ତିମାନଙ୍କୁ ଶୁଭ ଫଳ ମିଳିବାର ସମ୍ଭାବନା ଅଛି। ଜୁନ୍ ୨ ପରେ ପଞ୍ଚମ ଗୁରୁଙ୍କର ଆଶୀର୍ବାଦ ମିଳିବାରୁ ବିବାହ ଯୋଗ ଅଧିକ ସୁଦୃଢ଼ ହେବ।

ଦାମ୍ପତ୍ୟ ଜୀବନ - ପ୍ରଥମ ଶନିଙ୍କର ଅବସ୍ଥାନ ଦାମ୍ପତ୍ୟ ଜୀବନରେ ଅଧିକ ଦାୟିତ୍ୱ ଏବଂ ଚାପ ଆଣିପାରେ। ଦ୍ୱାଦଶ ରାହୁଙ୍କ ପ୍ରଭାବ ହେତୁ କିଛି ଗୁପ୍ତ କଥା ନେଇ ଭୁଲ ବୁଝାମଣା ସୃଷ୍ଟି ହୋଇପାରେ। ତେବେ ପଞ୍ଚମ ଗୁରୁଙ୍କ ପ୍ରଭାବ (ଜୁନ୍ ପରେ) ଦାମ୍ପତ୍ୟ ଜୀବନରେ ସ୍ନେହ ଏବଂ ସମନ୍ୱୟ ବୃଦ୍ଧି କରିବ।

ବିଦେଶ ଯୋଗ - ଦ୍ୱାଦଶ ଭାବରେ ରାହୁଙ୍କର ସ୍ଥିତି ହେତୁ ବିଦେଶ ଯାତ୍ରା କିମ୍ବା ସ୍ଥାୟୀ ଭାବରେ ବିଦେଶରେ ରହିବାର ପ୍ରବଳ ଯୋଗ ରହିଛି। ଶିକ୍ଷା କିମ୍ବା କର୍ମ କ୍ଷେତ୍ରରେ ବିଦେଶ ଯାତ୍ରା ଅନୁକୂଳ ରହିବ। ତେବେ ଦ୍ୱାଦଶ ରାହୁ ବିଦେଶରେ ଥିବା ସମୟରେ ଅଧିକ ଖର୍ଚ୍ଚ କରାଇପାରନ୍ତି।

ରୋଜଗାର -ଦ୍ୱାଦଶ ରାହୁଙ୍କ ପ୍ରଭାବ ହେତୁ ଅନିୟମିତ ଖର୍ଚ୍ଚ ବୃଦ୍ଧି ହେବ। ପ୍ରଥମ ଶନିଙ୍କ ସାଢ଼େସାତୀ ମଧ୍ୟ ଆର୍ଥିକ ଦିଗରେ ସାମାନ୍ୟ ଚାପ ଆଣିପାରେ। ତେବେ ଜୁନ୍ ୨ ପରେ ପଞ୍ଚମ ଗୁରୁଙ୍କ ପ୍ରଭାବ ହେତୁ ନିବେଶରୁ ଲାଭ ଏବଂ ଆୟରେ ଉନ୍ନତି ହେବ। ଷଷ୍ଠ କେତୁ ଋଣମୁକ୍ତ ହେବାରେ ସାହାଯ୍ୟ କରିବେ।

ଅନ୍ୟାନ୍ୟ କ୍ଷେତ୍ର - ପ୍ରଥମ ଶନିଙ୍କ ସାଢ଼େସାତୀର ପ୍ରଭାବ ହେତୁ ନିଜ ବ୍ୟକ୍ତିତ୍ୱରେ ଗମ୍ଭୀରତା ଆସିବ। ଦ୍ୱାଦଶ ରାହୁ ଆପଣଙ୍କୁ ଆଧ୍ୟାତ୍ମିକତା ପ୍ରତି ଅଧିକ ଆକୃଷ୍ଟ କରିବ। ଷଷ୍ଠ କେତୁଙ୍କର ସ୍ଥିତି ଶତ୍ରୁମାନଙ୍କ ଉପରେ ବିଜୟ ଏବଂ କୋର୍ଟ କଚେରୀ ମାମଲାରେ ସଫଳତା ଆଣିବ।

ଶୁଭ ଫଳ ପ୍ରାପ୍ତି ପାଇଁ ପ୍ରତିକାର - ମୀନ ରାଶିର ଜାତକମାନଙ୍କୁ ଶନିଙ୍କ ସାଢ଼େସାତୀର ଅଶୁଭତ୍ୱ ନିବାରଣ ପାଇଁ ପ୍ରତି ଶନିବାର ଦିନ ଶନି ଦେବଙ୍କର ପୂଜା କରିବା ଉଚିତ୍ ଏବଂ ଦରିଦ୍ର ଲୋକଙ୍କୁ ଖାଦ୍ୟ ଦାନ କରନ୍ତୁ। ଦ୍ୱାଦଶ ରାହୁଙ୍କ ଶାନ୍ତି ପାଇଁ ନିୟମିତ ଭଗବାନ ଶିବଙ୍କର ଆରାଧନା କରନ୍ତୁ। ପ୍ରତି ଗୁରୁବାର ଦିନ ଗୁରୁଙ୍କୁ ଦାନ କରନ୍ତୁ (ଚଣା ଡାଲି କିମ୍ବା ହଳଦୀ) |

ଜ୍ୟୋତିର୍ବିଦ ଶ୍ରୀ ସିଦ୍ଧାର୍ଥ ଶେଖର ନାୟକ

ଯୋଗାଯୋଗ - 8249826682