ପ୍ରେମିକା ପାଇଁ ସୁପର ବାଇକ ଚୋରି କରି ମଉଜ କରୁଥିଲା ପ୍ରେମିକ, ମାଡି ବସିଲା ପୋଲିସ

ନୂଆଦିଲ୍ଲୀ ୨୬।୧୧; ପ୍ରେମିକାର ଇଚ୍ଛା ଥିଲା ପ୍ରେମିକ ସହ ସୁପର ବାଇକ୍ ପଛରେ ବସି ବୁଲିବାକୁ । ନିଜର ବାଇକ୍ ନଥିବା ବେଳେ ପ୍ରେମିକାର ଇଚ୍ଛା ପୂରଣ କରିବାକୁ ଲାଗିପଡ଼ିଲେ ପ୍ରେମିକ ପ୍ରବର । ଶେଷରେ ଏକ ସୁପରବାଇକ୍ ଚୋରି କରି ଆଣିଲେ । ଆଉ ବାଇକ ପଛରେ ପ୍ରେମିକାକୁ ବସାଇ ପୁରା ରାଜଧାନୀ ଘୂରି ବୁଲିଲେ । ଶେଷରେ ପାର୍କରେ ବସି ମଉଜ କରୁଥିବା ବେଳେ ମାଡି ବସିଲା ପୋଲିସ। ଏହି ଘଟଣା ଆଜି ରାଜଧାନୀରେ ମୁଖ୍ୟ ଚର୍ଚ୍ଚାର ବିଷୟ ପାଲଟିଛି ।

ମୈତ୍ରୀବିହାର ଥାନା ପୋଲିସ ରସିକିଆ ପ୍ରେମିକଙ୍କୁ ଥାନାରେ ଅଟକ ରଖି ପଚରାଉଚରା କରୁଛି । ସୂଚନା ଅନୁଯାୟୀ, ଗତ ୨୨ ତାରିଖ ରାତି ପ୍ରାୟ ୩ଟା ବେଳେ ସାଲିଆ ସାହିରେ ଜଣଙ୍କ ଘରୁ ବାଇକ ଚୋରି ହୋଇଥିଲା । ଘରର ତାଲା ଭାଙ୍ଗି ଗାଡ଼ିଟିକୁ କିଏ ନେଇ ଯାଇଥିଲା । ଏନେଇ ବାଇକ୍ ମାଲିକ ମୈତ୍ରୀବିହାର ଥାନାରେ ଅଭିଯୋଗ କରିଥିଲେ । ପୋଲିସ ଏତଲା ରଖି ତଦନ୍ତ ଆରମ୍ଭ କରିଥିଲା । ରାଜଧାନୀର ବିଭିନ୍ନ ଛକରେ ଲାଗିଥିବା ସିସିଟିଭି କ୍ୟାମେରା ଯାଞ୍ଚ କରିଥିଲା । ସିସିଟିଭିରୁ ଜଣା ପଡିଥିଲା ଜଣେ ଯୁବକ ଉକ୍ତ ଗାଡି ପଛରେ ଜଣେ ଯୁବତୀଙ୍କୁ ବସାଇ ରାଜଧାନୀ ସାରା ଚକ୍କର କାଟୁଛନ୍ତି। ସିସିଟିଭି ଫୁଟେଜ ଆଧାରରେ ପୋଲିସ ବାଇକ୍ ଚୋରକୁ ଧରିବାକୁ ଜାଲ ବିଛାଇଥିଲା । ସେମାନେ ଯେଉଁ ରାସ୍ତାରେ ଯାଉଛନ୍ତି ସିସିଟିଭି ଜରିଆରେ ନଜର ରଖିଥିଲା ପୋଲିସ। ଥାନାର ଏକ ଟିମ୍ ସେମାନଙ୍କୁ ପିଛା କରିବା ଆରମ୍ଭ କରିଥିଲା ।

ପ୍ରେମୀ ଯୁଗଳ ଗାଡିଟିକୁ ନେଇ ଆଇଜି ପାର୍କ ସମ୍ମୁଖରେ ଥୋଇ ଭିତରକୁ ଯାଇଥିଲେ । ପାର୍କରେ ଉଭୟ ବସି ଗପସପରେ ମଜ୍ଜିଥିଲେ । ଏହି ସମୟରେ ପାର୍କରେ ପୁଲିସ ପହଞ୍ଚି ଯାଇଥିଲା । ଯୁବକଙ୍କୁ ସେଠାରୁ ଉଠାଇ ଆଣିଥିଲା । ଗାଡିଟିକୁ ମଧ୍ୟ ପୋଲିସ ଥାନାକୁ ଆଣିଛି । ପୋଲିସ ହାତରେ ଧରାପଡ଼ିବା ପରେ ପ୍ରେମିକ ଜଣଙ୍କ ପ୍ରେମିକା ପାଇଁ ଏଭଳି କରିଥିବା ସ୍ୱୀକାର କରିଥିଲା । ସଂପୃକ୍ତ ବାଇକ୍ ଚୋରକୁ ଆସନ୍ତାକାଲି କୋର୍ଟ ଚାଲାଣ କରାଯିବ ବୋଲି ପୋଲିସ କହିଛି ।