ଭୁବନେଶ୍ୱର ୧୫।୦୪ : ଭୁବନେଶ୍ୱର ରାମମନ୍ଦିର ନିକଟରୁ ଶିଶୁ ଚୋରି ଘଟଣା । ସାମ୍ନାକୁ ଆସିଲା ସିସିଟିଭି ଫୁଟେଜ୍ । ଜଣେ ବ୍ୟକ୍ତି ଶିଶୁପୁତ୍ରକୁ ନେଉଥିବାର ସିସିଟିଭିର କଏଦ ହୋଇଛି । ସେପଟେ କମିଶନରେଟ୍ ପୋଲିସ ଟିମ୍ ଏକାଧିକ ଟିମ୍ ଗଠନ କରି ଛାନ୍ଭିନ୍ ଜାରି ରଖିଛି ।
ଖବର ଅନୁଯାୟୀ, ରବିବାର ବିଳମ୍ବିତ ରାତିରେ ରାଜଧାନୀର ରାମମନ୍ଦିର ଛକରୁ ଆସିଥିଲା ସାଂଘାତିକ ଅଭିଯୋଗ । ଜଣେ ଦୃଷ୍ଟିବାଧିତ ମାଆର ଦେଢ ବର୍ଷର ପୁଅ କିଏ ଜଣେ ଚୋରି କରି ନେଇଯାଇଥିଲା । ଯାହାପରେ ନିକଟସ୍ଥ ପୋଲିସ ଥାନାରେ ଅଭିଯୋଗ କରିଥିଲେ ମହିଳା । ହେଲେ ଚୋରି ଘଟଣାକୁ ଦୁଇ ଦିନ ବିତି ଯାଇଥିଲେ ମଧ୍ୟ ଶିଶୁ ସଂପର୍କରେ କୌଣସି ଖୋଜ ଖବର ମିଳିନଥିଲା । ଶେଷରେ କମିଶନରେଟ୍ ପୋଲିସ ବିଭିନ୍ନ ଟିମ୍ ଗଠନ କରି ରାଜ୍ୟ ବାହାରକୁ ପଠାଇବା ସହ ରାଜଧାନୀର ବିଭିନ୍ନ ସ୍ଥାନରେ ଚଢାଉ ଜାରି ରଖିଛି । ତେବେ ଏସବୁ ଘଟଣା ଭିତରେ ସାମ୍ନାକୁ ଆସିଛି ସିସିଟିଭି ଫୁଟେଜ୍ । ଯେଉଁଥିରେ ଜଣେ ବ୍ୟକ୍ତି ଶିଶୁକୁ କାନ୍ଧରେ ପକାଇ ନେଉଥିବା ଚିତ୍ର ଦେଖାଦେଇଛି ।
