ନୂଆଦିଲ୍ଲୀ: ଚେନ୍ନାଇରୁ ଶ୍ରୀଲଙ୍କା ଏୟାରଲାଇନ୍ସର ଏକ ବିମାନରେ ପାଞ୍ଚ ଜଣ ସନ୍ଦିଗ୍ଧ ଲସ୍କର-ଏ-ତୈବା ଆତଙ୍କବାଦୀ ବସି ଶ୍ରୀଲଙ୍କା ଯାଉଥିବା ଧମକପୂର୍ଣ୍ଣ ମେଲ୍ ମିଳିବା ପରେ ଏୟାରପୋର୍ଟ କର୍ତ୍ତୃପକ୍ଷ ସତର୍କ ହୋଇଛନ୍ତି। ବିମାନଟି କଲମ୍ବୋର ବନ୍ଦରାନାଏକେ ଅନ୍ତର୍ଜାତୀୟ ବିମାନବନ୍ଦରରେ ଅବତରଣ କରିବା ପରେ ବ୍ୟାପକ ଯାଞ୍ଚ କରାଯାଇ ଥିବା ସୂଚନା ମିଳିଛି।
୨୨ ଏପ୍ରିଲରେ ପହଲଗାମ ଆକ୍ରମଣ ପରେ ଦେଶରେ ସତର୍କତା ବୃଦ୍ଧି କରାଯାଇଥିବା ବେଳେ ଚେନ୍ନାଇ ବିମାନବନ୍ଦର କର୍ତ୍ତୃପକ୍ଷଙ୍କୁ ଏକ ଧମକପୂର୍ଣ୍ଣ ଇମେଲ୍ ମିଳିଥିଲା। ଯେଉଁଥିରେ କୁହାଯାଇଥିଲା ଯେ ଶ୍ରୀଲଙ୍କା ଏୟାରଲାଇନ୍ସର ଏକ ବିମାନରେ ପାଞ୍ଚ ଜଣ ଲସ୍କର ଆତଙ୍କବାଦୀ ଯାତ୍ରା କରୁଛନ୍ତି। ଏହି ମେଲ୍ ପାଇବା ପରେ ସୁରକ୍ଷା ବ୍ୟବସ୍ଥା କଡ଼ା କରାଯାଇଛି।
ପଢନ୍ତୁ-ପାକିସ୍ତାନୀ ଧ୍ୱଜଧାରୀ ଜାହଜଙ୍କୁ ଭାରତୀୟ ବନ୍ଦର ମନା, ବନ୍ଦ ହେଲା ସବୁ ପ୍ରକାର ଡାକ ଓ ପାର୍ସଲ ସେବା
ଏହି ମେଲ୍କୁ ନନ୍ ପେସିଫିକ୍ ବୋଲି ବର୍ଗୀକୃତ କରାଯାଇଛି। ଧମକପୂର୍ଣ୍ଣ ମେଲ୍, ମୁଖ୍ୟ ସୁରକ୍ଷା ଅଧିକାରୀଙ୍କୁ ସକାଳ ୧୧.୦୫ ରେ ମିଳିଥିଲା। ଏଥିରେ ଲେଖାଥିଲା "ୟୁଏଲ ୧୨୨ (ସକାଳ ୯.୫୫) ରେ ଥିବା ପାଞ୍ଚ ଜଣ ଦକ୍ଷିଣ ଭାରତୀୟ ପୁରୁଷ ଲସ୍କର ଆତଙ୍କୀ ବସିଛନ୍ତି। ଯେଉଁମାନଙ୍କର ପ୍ରୋଫାଇଲ ଭଲ ରହିଥିବା ବେଳେ ସେମାନେ ଭଲ ଟ୍ରେନିଂ ନେଇଛନ୍ତି। ସେମାନଙ୍କୁ କେହି ସନ୍ଦେହ କରୁ ନାହାନ୍ତି।
ହେଲେ ଏହି ମେଲ୍ ମିଳିବା ପୂର୍ବରୁ ଶ୍ରୀଲଙ୍କା ଏୟାରଲାଇନ୍ସର ବିମାନଟି ଚେନ୍ନାଇ ଛାଡ଼ି ସାରିଥିଲା। ତେଣୁ ଏହି ସୂଚନା କଲମ୍ବୋ ବିମାନବନ୍ଦରକୁ ପଠାଯାଇଥିଲା। ଏହାପରେ ଶ୍ରୀଲଙ୍କା ଅଥୋରିଟି ବିମାନ ଅବତରଣ କରିବା ପରେ ଯାତ୍ରୀମାନଙ୍କୁ ବିମାନରୁ ଓହ୍ଲାଇ ସମ୍ପୂର୍ଣ୍ଣ ଯାଞ୍ଚ କରିଥିଲେ। ଯାଞ୍ଚ ପରେ ବି କୌଣସି ସନ୍ଦେହଜନକ ବ୍ୟକ୍ତି କିମ୍ବା ଏଭଳି କିଛି କାର୍ଯ୍ୟକଳାପ ଘଟି ନଥିଲା। ତେବେ ପରେ ଏହି ମେଲ୍ଟି ଏକ ମିଛ ଧମକ ଥିଲା ବୋଲି ଜଣାପଡ଼ିଥିବା ଅଧିକାରୀମାନେ କହିଛନ୍ତି।
ସୂଚନା ଥାଉକି ୨୨ ଏପ୍ରିଲରେ ଜମ୍ମୁ ଏବଂ କାଶ୍ମୀରର ପହଲଗାମର ବୈସାରଣ ଉପତ୍ୟକାରେ ଆତଙ୍କବାଦୀମାନେ ୨୬ ଜଣଙ୍କୁ ହତ୍ୟା କରିଥିଲେ। ଏମାନଙ୍କ ମଧ୍ୟରୁ ଅଧିକାଂଶ ପର୍ଯ୍ୟଟକ ଥିଲେ। ଏହାପରେ ଭାରତ ଓ ପାକିସ୍ତାନ ମଧ୍ୟରେ ଉତ୍ତେଜନା ଲାଗି ରହିଛି। ସେପଟେ ଆତଙ୍କବାଦୀମାନେ ପୁଣି ଏକ ବଡ଼ ଆକ୍ରମଣ କରିବାକୁ ଯୋଜନା ତଳାଉଥିବା ଗୁଇନ୍ଦା ସୂଚନା ମିଳିବା ପରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି।
