ନୂଆଦିଲ୍ଲୀ: ଚଲେ ତ ଚାନ୍ଦ ତକ ବରନା ଶାମ ତକ। ଅର୍ଥାତ ସଫଳତା ମିଳିଲେ ବହୁତ ବଡ଼ ମିଳିବ, ନଚେତ୍ ବିଫଳ ହେଲେ ସବୁ ଶେଷ। ଏହି ସଂଲାପ ଠିକ୍ ସଞ୍ଜୁ ସାମସନଙ୍କ କାହାଣୀ ସହ ଏକଦମ୍ ଫିଟ୍ ଖାଉଛି। ସଞ୍ଜୁ ଗତ ୫ଟି ଅନ୍ତର୍ଜାତୀୟ ଟି-୨୦ ମ୍ୟାଚ୍ରେ କରିଛନ୍ତି ମାତ୍ର ୫୧ ରନ। ହେଲେ ତା ପୂର୍ବର ୫ ଟି ମ୍ୟାଚ୍ରେ ୩ ଶତକ ହାସଲ କରିଥିଲେ।ପୁଣି ଦୁଇଟି ମ୍ୟାଚ୍ରେ ଖାତା ଖୋଲି ପାରି ନ ଥିଲେ। ଏଥିରୁ ଆପଣ ଜାଣି ପାରୁଥିବେ ସଞ୍ଜୁଙ୍କ ବ୍ୟାଟ୍ ଚାଲିଲେ ବିପକ୍ଷ ଧରାଶାୟୀ, ନଚେତ୍ ସେ ଲଗାତାର ଫ୍ଲପ୍ ହୋଇ ଚାଲିବେ।
Also read: ଏସିଆ କପ୍ ୨୦୨୫ ପାଇଁ ଏହ ଦିନ ଦୁବାଇ ପହଞ୍ଚିବ ଟିମ୍ ଇଣ୍ଡିଆ, ସେପ୍ଟେମ୍ବର ୧୦ରେ ପ୍ରଥମ ମ୍ୟାଚ୍
୨୦୨୦ରେ ଗୌତମ ଗମ୍ଭୀର ସାମସନଙ୍କୁ ନେଇ ଏକ ପୋଷ୍ଟ କରିଥିଲେ। ଲେଖିଥିଲେ ସଞ୍ଜୁ ସାମସନ ଭାରତର ସର୍ବଶ୍ରେଷ୍ଠ ଓ୍ଵିକେଟ୍ କିପର ବ୍ୟାଟର। ତାଙ୍କୁ ଶ୍ରେଷ୍ଠ ଯୁବ ଭାରତୀୟ ବ୍ୟାଟର ବୋଲି କହିଥିଲେ। ଏହା ଉପରେ କେହି ବିତର୍କ କରିବାକୁ ପ୍ରସ୍ତୁତ କି ବୋଲି ପ୍ରଶ୍ନ ବି କରିତିଲେ। ଅର୍ଥାତ ଗମ୍ଭୀରଙ୍କୁ ସଞ୍ଜୁ ସାମସନଙ୍କ ସାମର୍ଥ୍ୟ ଉପରେ ପୂରା ଭରସା ରହିଛି। ଗତ ବର୍ଷ ଅନ୍ତର୍ଜାତୀୟ ଟି-୨୦ରେ ଲଗାତାର ଦୁଇ ଶତକ ମାରିବା ପୂର୍ବରୁ ସୂର୍ଯ୍ୟକୁମାର ଯାଦବ ଦଲୀପ ଟ୍ରଫିରେ ସଞ୍ଜୁ ସାମସନଙ୍କ ଉପରେ ବିଶ୍ଵାସ ପ୍ରକାଶ କରିଥିଲେ। ଆଉ ସଞ୍ଜୁଙ୍କୁ କହିଥିଲେ ଯେ ତୁମେ ଆଗାମୀ ୭ ମ୍ୟାଚ୍ ଖେଳିବ । ସଞ୍ଜୁ ଗତ ବର୍ଷ ଲଗାତାର ଟି-୨୦ ଅନ୍ତର୍ଜାତୀୟରେ ଲଗାତାର ୨ ଶତକ ମାରିଥିଲେ। ଗୌତମ ଗମ୍ଭୀର କୋଚ୍ ହେବା ପରେ ସଞ୍ଜୁଙ୍କୁ ଟି-୨୦ ଦଲରେ ନିୟମିତ ସ୍ଥାନ ମିଳୁଛି। ଗମ୍ଭୀରଙ୍କ କୋଚିଂ ଓ ସୂର୍ଯ୍ୟଙ୍କ ଅଧିନାୟକତ୍ଵରେ ସାମସନଙ୍କ ଭାଗ୍ୟ ବଦଳିଥିଲା ଏବଂ ତାଙ୍କୁ ଅଭିଷେକ ଶର୍ମାଙ୍କ ସହ ଟି-୨୦ ମ୍ୟାଚ୍ରେ ଓପନିଂ ପାଇଁ ସୁଯୋଗ ମିଳିଲା।
ଏବେ ପ୍ରଶ୍ନ ଉଠୁଛି କଣ ସଞ୍ଜୁ ସାମସନଙ୍କୁ ଏସିଆ କପରେ ସୁଯୋଗ ମିଳିବ ? ଏହି ପ୍ରଶ୍ନ ଏଥିପାଇଁ ଉଙ୍କି ମାରୁଛି କାରଣ ଶୁଭମନ ଗିଲଙ୍କ ଦଳଙ୍କ ଟି-୨୦ ଦଳରେ ପ୍ରତ୍ୟାବର୍ତ୍ତନ ହୋଇଛି। ଆଉ ତାଙ୍କୁ ଉପଅଧିନାୟକ କରା୍ଯାଇଛି। ଏଥିରୁ ସ୍ପଷ୍ଟ ଗିଲ୍ ନିଶ୍ଚିତ ଖେଳିବେ। ସମ୍ଭବତଃ ସେ ଅଭିଷେକ ଶର୍ମାଙ୍କ ସହ ଓପନିଂ କରି ପାରନ୍ତି। ସଞ୍ଜୁଙ୍କ ପାଇଁ ବଡ଼ ସମସ୍ୟା ସେ ଟପ୍ ଅର୍ଡରରେ ଖେଳିବାକୁ ପସନ୍ଦ କରନ୍ତି। ଅନ୍ୟ କ୍ରମରେ ସେ ବିଫଳ ରହିଛନ୍ତି। ସଟ୍ ବଲ୍ରେ ସେ ବାରମ୍ବାର ବିଫଳ ହେଉଥିବା ଦେଖିବାକୁ ମିଳିଛି।
Also read: ମୋ ସହ କାହାର କିଛି ସମସ୍ୟା ଅଛି କି…ଅବସର ପ୍ରସଙ୍ଗରେ ବୟାନ ଦେଲେ ଶାମୀ
ତେବେ ସଞ୍ଜୁଙ୍କ ମେଣ୍ଟର ତଥା କୋଚ୍ ରେଫି ଗୋମେଜଙ୍କ ମତରେ, ସଞ୍ଜୁ କୌଣସି ବି ଅର୍ଡରରେ ବ୍ୟାଟିଂ କରିବାକୁ ପ୍ରସ୍ତୁତ। ସେ ଟେକ୍ନିକାଲି ପୂରା ସକ୍ଷମ। ଅନ୍ତର୍ଜାତୀୟ ଖେଳାଳି ହୋଇଥିବାରୁ ସଞ୍ଜୁ ଦରକାର ପଡ଼ିଲେ ନିମ୍ନ କ୍ରମରେ ବ୍ୟାଟିଂ କରି ପାରିବେ। ତାଙ୍କୁ ନିଜର କ୍ଷମତା ଉପରେ ପୂର୍ଣ୍ଣ ଭରସା ରହିଛି। ଏପରିକି ୬ ନମ୍ବରରେ ବ୍ୟାଟିଂ କରିବାକୁ ସଞ୍ଜୁ ସକ୍ଷମ। ତେବେ ନିକଟରେ ସଞ୍ଜୁ ସାମସନ କେରଳ କ୍ରିକେଟ୍ ଲିଗରେ ୪୨ ବଲରେ ଶତକ ମାରି ନିଜ ଫର୍ମର ସଙ୍କେତ ଦେଇଛନ୍ତି। ତେଣୁ ଆଶା କରାଯାଉଛି ସଞ୍ଜୁ ଚଲେ ତ ଚାନ୍ଦ ତକ, ଚଲେ ତ ଚାନ୍ଦ ତକ ଷ୍ଟାଇଲରେ ଖେଳନ୍ତୁ।
ସଞ୍ଜୁ ୨୦୧୫ରେ ଅନ୍ତର୍ଜାତୀୟ ଟି-୨୦ରେ ଡେବ୍ୟୁ କରିଥିଲେ। ମାତ୍ର ତେବେଠୁ ସେ ଏ ପର୍ଯ୍ୟନ୍ତ ୪୨ଟି ଅନ୍ତର୍ଜାତୀୟ ମ୍ୟାଚ୍ ଖେଳିଛନ୍ତି। ୨୫.୩୨ ହାରରେ କରିଛନ୍ତି ୮୬୧ ରନ। ଅର୍ଥାତ ୧୦ ବର୍ଷରେ ସଞ୍ଜୁଙ୍କ ପ୍ରଦର୍ଶନରେ ସେମିତି ସ୍ପାର୍କ ଦେଖିବାକୁ ମିଳିନାହିଁ। ଏହି ୧୦ ବର୍ଷରେ ସଞ୍ଜୁଙ୍କୁ ଏମଏସ ଧୋନୀ, ଇଶାନ କିଶନ, ଋଷଭ ପନ୍ତ ପରି ଓ୍ଵିକେଟ୍ କିପରଙ୍କ ସହ ପ୍ରତିଯୋଗିତା କରିବାକୁ ପଡ଼ିଛି। ଏମିତିରେ ସଞ୍ଜୁଙ୍କ ପାଇଁ ଏସିଆ କପ୍ରେ ନିଜକୁ ପ୍ରମାଣିତ କରିବାର ଏକ ସୁବର୍ଣ୍ଣ ସୁ୍ଯୋଗ ମିଳିଛି। ଦେଖିବାକୁ ବାକି ରହିଲା ସଞ୍ଜୁଙ୍କୁ ଏସିଆ ପରେ ସୁଯୋଗ ମିଳୁଛି କି ନାହିଁ।
