ଭୁବନେଶ୍ଵର: ବିନା କୋଚିଂରେ ପାଠ ପଢ଼ା ଠପ୍ । ଚିନ୍ତା ବଢ଼ାଇଲା କେନ୍ଦ୍ର ସରକାର CMS ରିପୋର୍ଟ । ରାଜ୍ୟରେ ୫୦ ପ୍ରତିଶତରୁ ଅଧିକ ଛାତ୍ରଛାତ୍ରୀଙ୍କୁ ଟ୍ୟୁସନ୍ ବା କୋଚିଂ ଉପରେ ନିର୍ଭର କରିବାକୁ ପଡ଼ୁଛି । ଏଥିପାଇଁ ଅଭିଭାବକଙ୍କୁ ଖର୍ଚ୍ଚାନ୍ତ ହେବାକୁ ପଡ଼ୁଛି ହଜାର ହଜାର ଟଙ୍କା । ଓଡ଼ିଶାରେ ପ୍ରାଥମିକ ସ୍କୁଲରୁ ଉଚ୍ଚ ମାଧ୍ୟମିକ ପର୍ଯ୍ୟନ୍ତ ତଥ୍ୟ ଦେଖିଲେ ସହାରାଞ୍ଚଳରେ ଛାତ୍ର ପିଛା ୧୦ ହଜାର ୮୯୯ ଟଙ୍କା ଏବଂ ଗ୍ରାମାଞ୍ଚଳରେ ୩ ହଜାର ୫୪୭ ଟଙ୍କା ଖର୍ଚ୍ଚ କରିବାକୁ ପଡୁଛି । ଏଥିପାଇଁ ସ୍କୁଲରେ ଶିକ୍ଷକ ଅଭାବ ଓ ପାଠପଢ଼ାର ମାନକ ଦାୟୀ କରିଛନ୍ତି ଅଭିଭାବକ ଓ ଶିକ୍ଷାବିତ୍ ।
ବିନା କୋଚିଂରେ ଆଗକୁ ବଢୁନି ପିଲାଙ୍କ ପାଠ ପଢା। ସ୍କୁଲ ପାଠ୍ୟକ୍ରମ ବୁଝିବା ପାଇଁ ଟ୍ୟୁସନ ଉପରେ ନିର୍ଭରଶୀଳ ଛାତ୍ରଛାତ୍ରୀ । ସର୍ଭେରୁ ଜଣାପଡିଛି ଯେ ଦେଶର ଏକ ତୃତୀୟାଂଶ ଛାତ୍ରଛାତ୍ରୀ ପାଠପଢା ପାଇଁ କୋଚିଂ ଉପରେ ନିର୍ଭର କରୁଛନ୍ତି । ଓଡିଶା ସ୍ଥିତି ଆହୁରି ଅଦବେଗ ଜନକ । ଓଡିଶାର ପ୍ରାୟ ୫୭ ପ୍ରତିଶତ ଛାତ୍ରଛାତ୍ରୀ କୋଚିଂ ଉପରେ ନିର୍ଭରଶୀଳ । ନାସନାଲ ସାମ୍ପଲ ସର୍ଭେ ପକ୍ଷରୁ ପ୍ରକାଶିତ ରିପୋର୍ଟରେ ସାମ୍ନାକୁ ଆସିଛି ଏଭଳି ଉଦବେଗଜନଜ ତଥ୍ୟ । ବିଶେଷ କରି ସହରାଞ୍ଚଳରେ ଏହି ସଂଖ୍ୟା ଅଧିକ ।
ତଥ୍ୟ ଅନୁସାରେ ଦେଶର ସହରାଞ୍ଚଳରେ ୩୦.୭ ପ୍ରତିଶତ ଛାତ୍ରଛାତ୍ରୀ ଟ୍ୟୁସନ ଉପରେ ନିର୍ଭରଶୀଳ । ସେହିଭଳି ଗ୍ରାମାଞ୍ଚଳରେ ଏହି ସଂଖ୍ୟା ୨୫.୫ ପ୍ରତିଶତ ରହିଛି । ତେବେ ଓଡିଶା କଥା ଦେଖିଲେ ଆମ ରାଜ୍ୟର ୫୪.୬ ପ୍ରତିଶତ ଗ୍ରାମାଞ୍ଚଳ ଛାତ୍ରଛାତ୍ରୀ ଟ୍ୟୁସନ ଯାଉଥିବା ବେଳେ ସହରାଞ୍ଚଳରେ ଏହି ସଂଖ୍ୟା ୬୬.୬ ପ୍ରତିଶତ ରହିଛି । ଏଥିରୁ ସ୍ପଷ୍ଟ ଯେ ସରକାର ସ୍କୁଲ ଶିକ୍ଷା ପାଇଁ ଯେତେ ଅର୍ଥ ବରାଦ କଲେ ବି ଶିକ୍ଷାଦାନର ସ୍ତର ଆଖି ଦୃଶିଆ ହେଉନାହିଁ । ଫଳରେ ଛାତ୍ରଛାତ୍ରୀ ଘରୋଇ ଟ୍ୟୁସନ ଉପରେ ନିର୍ଭର କରୁଛନ୍ତି ।
ସର୍ଭେ ତଥ୍ୟ ଅନୁସାରେ ଘରୋଇ କୋଚିଂରେ ଗ୍ରାମାଞ୍ଚଳ ଛାତ୍ରଛାତ୍ରୀଙ୍କ ଠାରୁ ସହରାଞ୍ଚଳ ଛାତ୍ରଛାତ୍ରୀ ଅଧିକ ଅର୍ଥ ବ୍ୟୟ କରୁଛନ୍ତି । ଦେଶର ସ୍ଥିତି ଦେଖିଲେ ସହରାଞ୍ଚଳରେ ପ୍ରତି ଛାତ୍ର ପିଛା ହାରାହାରି ୩ ହଜାର ୯୮୮ ଟଙ୍କା ଖର୍ଚ୍ଚ ହେଉଥିବା ବେଳେ ଗାମାଞ୍ଚଳରେ ଏହା ୧ ହଜାର ୭୯୩ ଟଙ୍କା ରହିଛି । ସେହିଭଳି ହାଇସ୍କୁଲ କ୍ଷେତ୍ରରେ କୋଚିଂ ପାଇଁ ସହରାଞ୍ଚଳ ଛାତ୍ରମାନେ ହାରାହାରି ୯ ହଜାର ୯୫୦ ଟଙ୍କା ଦେଉଥିବା ବେଳେ ଗ୍ରାମାଞ୍ଚଳ ଛାତ୍ରମାନେ ୪ ହଜାର ୫୪୮ ଟଙ୍କା ଖର୍ଚ୍ଚ କରୁଛନ୍ତି । ଓଡ଼ିଶାରେ ପ୍ରାଥମିକ ସ୍କୁଲରୁ ଉଚ୍ଚ ମାଧ୍ୟମିକ ପର୍ଯ୍ୟନ୍ତ ତଥ୍ୟ ଦେଖିଲେ ସହାରାଞ୍ଚଳରେ ଛାତ୍ର ପିଛା ୧୦ ହଜାର ୮୯୯ ଟଙ୍କା ଏବଂ ଗ୍ରାମାଞ୍ଚଳରେ ୩ ହଜାର ୫୪୭ ଟଙ୍କା ଖର୍ଚ୍ଚ କରିବାକୁ ପଡୁଛି । ଏଥି ପାଇଁ ସ୍କୁଲରେ ଶିକ୍ଷକ ଅଭାବକୁ ଦାୟୀ କରିଛନ୍ତି ଶିକ୍ଷାବିତ୍ ।
ସ୍ବାଭାବିକ ଭାବେ ପ୍ରଶ୍ନ ଉଠୁଛି ଯେ, ସ୍କୁଲରେ କ’ଣ ଠିକ୍ ଭାବେ ପାଠ ପଢ଼ା ହେଉନି କି ? କାହିଁକି ରାଜ୍ୟରେ ପ୍ରଥମରୁ ଉଚ୍ଚ ମାଧ୍ୟମିକ ପର୍ଯ୍ୟନ୍ତ ଏତେ ସଂଖ୍ୟକ ପିଲା କୋଚିଂ ଉପରେ ନିର୍ଭର କରୁଛନ୍ତି ? ବିନା ଟ୍ୟୁସନ ଏବଂ କୋଚିଂରେ ଏକ ପ୍ରକାର ଅସମ୍ପୂର୍ଣ୍ଣ ଏବଂ ଅସମ୍ଭବ ହେଉଛି କି ସ୍କୁଲ ପାଠ ପଢା ?
