ନୂଆଦିଲ୍ଲୀ: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କ ବିରୋଧରେ ସିବିଆଇ ଆକ୍ସନକୁ ସ୍ପିଡ୍-ଅପ୍ କରିଛି । ଅବକାରୀ ନୀତି ମାମଲାରେ କେନ୍ଦ୍ରୀୟ ଯାଞ୍ଚ ବ୍ୟୁରୋ ଆମ୍ ଆଦମୀ ପାର୍ଟିର ରାଷ୍ଟ୍ରୀୟ ସଂଯୋଜକଙ୍କ ବିରୋଧରେ ଦିଲ୍ଲୀ ରାଉଜ୍ ଆଭେନ୍ୟୁ କୋର୍ଟରେ ଚାର୍ଜ ସିଟ୍ ଦାୟର କରିଛି । ଜଷ୍ଟିସ୍ କାବେରୀ ବାବେଜାଙ୍କ କୋର୍ଟରେ ସିବିଆଇ ଆଭିଯୋଗ ପତ୍ର ରଖିଛି । ଏହା ପୂର୍ବରୁ ଇଡି ୨୦୦ ପୃଷ୍ଠାର ଚାର୍ଜସିଟ୍ ଦାଖଲ କରିଥିଲା । ଏଥିରେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ଏବଂ ଆମ୍ ଆଦମୀ ପାର୍ଟି ଦୋଷୀ କୁହାଯାଇଥିଲା ।
କେଜ୍ରିଓ୍ବାଲଙ୍କୁ ଜୁନ୍ ୨୬ ତାରିଖରେ ସିବିଆଇ ଗିରଫ କରିଥିଲା । ପୂର୍ବରୁ ଅର୍ଥାତ୍ ମାର୍ଚ୍ଚ ୨୧ ତାରିଖରେ ସମାନ ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ ତାଙ୍କୁ ଗିରଫ କରିଥିଲା । ଇଡି ମାମଲାରେ କେଜ୍ରିଓ୍ବାଲଙ୍କୁ ସୁପ୍ରିମକୋର୍ଟରୁ ଜାମିନ୍ ମିଳିଛି । ଇଡି ମଧ୍ୟ ତାଙ୍କ ବିରୋଧରେ ଅଭିଯୋଗ ପତ୍ର ଦାୟର କରିଛି । ମଦ ଦୁର୍ନୀତି ମାମଲାରେ ମୁଖ୍ୟ ଷଡ଼ଯନ୍ତ୍ରକାରୀ କେଜ୍ରିଓ୍ବାଲ ବୋଲି କୁହାଯାଇଥିଲା ।
ଅବକାରୀ ନୀତି ମାମଲାରେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ମୁଖ୍ୟ ଷଡ଼ଯନ୍ତ୍ରକାରୀ ବୋଲି ଇଡି ଚାର୍ଜ ସିଟ୍ରେ କୁହାଯାଇଛି । ଆମ୍ ଆଦମୀ ପାର୍ଟି ଏଥିପାଇଁ ୧୦୦ କୋଟି ଟଙ୍କା ଲାଞ୍ଚ ଆକାରରେ ନେଇଥିବା ଉଲ୍ଲେଖ ରହିଛି । ସିବିଆଇ ଆପ୍ ମୁଖ୍ୟଙ୍କୁ ରିମାଣ୍ଡରେ ନେବା ବେଳେ କହିଥିଲା, କେଜ୍ରିଓ୍ବାଲ ମୁଖ୍ୟ ଷଡ଼ଯନ୍ତ୍ରକାରୀଙ୍କ ମଧ୍ୟରୁ ଜଣେ । ଦିଲ୍ଲୀ ମୁଖ୍ୟମନ୍ତ୍ରୀଙ୍କ ଘନିଷ୍ଠ ବିଜୟ ନାୟର, ମଦ ବ୍ୟବସାୟୀଙ୍କ ସମ୍ପର୍କରେ ଥିଲେ । ଅବକାରୀ ନୀତିରେ ପରିବର୍ତ୍ତନ କରି ବ୍ୟବସାୟୀଙ୍କୁ ଲାଭ ପହଞ୍ଚାଇଛନ୍ତି । ..
