ନୂଆଦିଲ୍ଲୀ ୧୧।୧: ଦିଲ୍ଲୀ ବିଧାନସଭା ନିର୍ବାଚନ ୨୦୨୫ ପାଇଁ ଆଗାମୀ ମାସରେ ଭୋଟ ଗ୍ରହଣ ହେବ। ଫେବୃଆରୀ ୮ରେ ଭୋଟ ଗଣନା ହେବ। ଏଥର ନିର୍ବାଚନରେ ମୁଖ୍ୟତଃ ଶାସକ ଆମ ଆଦମୀ ପାର୍ଟି (ଆପ), ବିଜେପି ଓ କଂଗ୍ରେସ ମଧ୍ୟରେ ପ୍ରତିଦ୍ୱନ୍ଦ୍ୱୀତା ହେଉଛି। ତେବେ ଗତ ନିର୍ବାଚନ ଭଳି ଏଥର ନିର୍ବାଚନରେ ଆପର ରାସ୍ତା ଏତେ ସହଜ ନୁହେଁ। ଏ ସବୁ ମଧ୍ୟରେ ଏକ ସର୍ଭେ ରିପୋର୍ଟ ସାମ୍ନାକୁ ଆସିଛି। ଯେଉଁଥିରେ ଅନୁମାନ କରାଯାଇଛି ଆଗାମୀ ବିଧାନସଭା ନିର୍ବାଚନରେ ଦିଲ୍ଲୀ କାହାକୁ ସରକାର ଗଢିବାକୁ ସୁଯୋଗ ଦେବ।
ସି-ଭୋଟର ସର୍ଭେ ଅନୁସାରେ ଏଥର ବି ପୁଣି ଥରେ ଆମ ଆଦମୀ ପାର୍ଟି ସରକାର ରିପିଟ ହୋଇପାରେ। ରିପୋର୍ଟରେ ସି-ଭୋଟର ଜାନୁୟାରୀ ୬ ତାରିଖ ପର୍ଯ୍ୟନ୍ତ କରିଥିବା ସର୍ଭେକ୍ଷଣ ଉପସ୍ଥାପନ କରିଛି। ଏହି ରିପୋର୍ଟ ମୁତାବକ ଦିଲ୍ଲୀର ୪୯ ପ୍ରତିଶତ ଭୋଟର ଅରବିନ୍ଦ କେଜରିୱାଲଙ୍କ ଆପ ସରକାରକୁ ବଦଳାଇବାକୁ ଚାହାନ୍ତି ନାହିଁ। ତେବେ ୪୬ ପ୍ରତିଶତ ଭୋଟର ଚାହାନ୍ତି ଜାତୀୟ ରାଜଧାନୀରେ ସରକାର ବଦଳିବା ଦରକାର। ଯଦି ଏହି ରିପୋର୍ଟକୁ ମାନି ନିଆଯାଏ ତେବେ ଦିଲ୍ଲୀରେ ପୁଣି ଆପ ସରକାର ହେବାକୁ ଯାଉଛି।
ସି-ଭୋଟର ଫାଉଣ୍ଡର ୟଶବନ୍ତ ଦେଶମୁଖ ଗଣମାଧ୍ୟମ ସହ ଆଲୋଚନାରେ କହିଛନ୍ତି ଯେ ‘ଦିଲ୍ଲୀରେ ଯେଉଁ ଭୋଟର କହୁଛି ଆମେ ସରକାର ବଦଳାଇବାକୁ ଚାହୁଁନା ତାର ସ୍ପଷ୍ଟ କଥା ହେଉଛି ସେ ସରକାର ସପକ୍ଷରେ ଭୋଟ ଦେବ। ତେବେ ଯେଉଁମାନେ ସରକାର ବଦଳୁ ବୋଲି ଚାହୁଁଛନ୍ତି ସେମାନେ ଯଦି ଭୋଟ ଦିଅନ୍ତି ତେବେ କାହାକୁ ଦେବେ? ଯଦି ବିପକ୍ଷରେ କୌଣସି ଗୋଟିଏ ପାର୍ଟି ଥାନ୍ତା ତେବେ ଭୋଟ ବିରୋଧୀ ଦଳକୁ ଯାଇଥାନ୍ତା, ଯଦି ଏକାଧିକ ପାର୍ଟି ଓ ସ୍ଥାନୀୟ ସ୍ୱାଧୀନ ପ୍ରାର୍ଥୀଙ୍କୁ ଭୋଟ ଯାଏ ତେବେ ଭୋଟ ବାଣ୍ଟି ହୋଇଯିବାଟା ନିଶ୍ଚିତ, ହୁଏତ କମ ବା ବହୁତ ହୋଇପାରେ ହେଲେ ଭୋଟ ବାଣ୍ଟି ହେବାଟା କିନ୍ତୁ ନିଶ୍ଚିତ।’
କେଜରିୱାଲଙ୍କ ପାର୍ଟିର ବିଜୟ କେତେ ସହଜ
ଦେଶମୁଖ କହିଛନ୍ତି ଯେ ‘ଏହି ଡାଟା ୫ ବର୍ଷ ପୂର୍ବେ କିଛି ଅନ୍ୟପ୍ରକାର ଥିଲା। ସେତେବେଳେ ଆପ ସପକ୍ଷରେ ୫୬ରୁ ୫୭ ପ୍ରତିଶତ ଲୋକେ ଥିଲେ। ତେବେ ଏହି ୫ ବର୍ଷରେ ଏହି ସଂଖ୍ୟା ହ୍ରାସ ହୋଇଛି। ଯେଉଁ ଲୋକେ ସରକାର ବଦଳାଇବାକୁ ଚାହୁଁଛନ୍ତି ସେମାନଙ୍କ ସଂଖ୍ୟାରେ ପାଖାପାଖି ୧୦ ପ୍ରତିଶତ ବୃଦ୍ଧି ହୋଇଛି। ଏଥିରୁ ଆକଳନ କରାଯାଇ ପାରେ ଯେ ଆପ ଯିଏ ଗତ ନିର୍ବାଚନରେ ୧୬,୧୭ ଓ ୧୮ ପ୍ରତିଶତ ଭୋଟ ଗ୍ୟାପ୍ ରେ ଜିତୁଥିଲା ଏଥର ସେହି ଗ୍ୟାପ୍ ଏତେ ରହିବନି। ’
ୟଶବନ୍ତ ଦେଶମୁଖ କହିଛନ୍ତି ଯେ ଯେଉଁ ଭୋଟର ଜାତୀୟ ରାଜଧାନୀରେ ଆପ ସରକାରକୁ ସ୍ଥିର ଦେଖିବାକୁ ଚାହୁଁଛନ୍ତି ଓ ସେମାନେ ଯଦି ବହୁ ସଂଖ୍ୟାରେ ଭୋଟ ଦେବାକୁ ଯାଆନ୍ତି ତେବେ ହୁଏତ କେଜରିୱାଲଙ୍କ କାମ ସହଜ ହୋଇଯିବ। ଯଦି ଏହି ଭୋଟରଙ୍କ ସଂଖ୍ୟା ହ୍ରାସ ହୁଏ ତେବେ କେଜରିୱାଲଙ୍କ ବିଜୟ ରାସ୍ତା ଏତେ ସହଜ ହୋଇ ନପାରେ। ଏହି ଡାଟାରୁ ଏକତରଫା ବିଜୟର ଆଶଙ୍କା ତ ନାହିଁ ତେବେ ଅପର ହ୍ୟାଣ୍ଡ କେଜରିୱାଲଙ୍କ ସପକ୍ଷରେ ଅଛି ବୋଲି ନିଶ୍ଚିତ କୁହାଯାଇ ପାରେ ବୋଲି କହିଛନ୍ତି।
