ଫିରୋଜପୁର ୫।୫: ଭୁଲକ୍ରମେ ପାକିସ୍ତାନ ସୀମାକୁ ପ୍ରବେଶ କରିଥିବା ସୀମା ସୁରକ୍ଷା ବଳ (ବିଏସଏଫ) ଜବାନ ପି.କେ.ଶାହଙ୍କୁ ପାକିସ୍ତାନୀ ରେଞ୍ଜର୍ସ ବନ୍ଦୀ କରିବାର ୨୮୮ ଘଣ୍ଟା ଅର୍ଥାତ ୧୨ ଦିନ ବିତିଗଲାଣି। ହେଲେ ଜବାନଙ୍କ ମୁକ୍ତି ନେଇ ପାକିସ୍ତାନ ପକ୍ଷରୁ କୌଣସି ସୂଚନା ଆସୁ ନାହିଁ। ଜବାନଙ୍କ ମୁକ୍ତି ପାଇଁ ବିଏସଏଫ ପକ୍ଷରୁ ଉଦ୍ୟମ ଜାରି ରହିଛି। ଏଥି ପାଇଁ ସବୁଦିନ ସୀମାରେ ସିଟି ବଜା ଯାଉଥିବା ବେଳେ ପତାକା ଦେଖାଇ ଆଲୋଚନା ପାଇଁ ସିଗ୍ନାଲ ପଠା ଯାଉଛି। ଅନେକ ଥର ଫ୍ଲାଗ ମିଟିଂ ମଧ୍ୟ ହେଲାଣି, ହେଲେ ଫଳ କିଛି ହେଉନି।
ଭାରତୀୟ ଜବାନଙ୍କୁ ପାକିସ୍ତାନ ଅଧିକ ସମୟ ରଖି ପାରିବନି। ହେଲେ ହେଉଥିବା ବିଳମ୍ବ ଚିନ୍ତା ବଢାଉଛି। ଏଥି ପାଇଁ ଅନୁଷ୍ଠିତ ଫ୍ଲାଗ ମିଟିଂରେ ଶୀର୍ଷ ଅଧିକାରୀଙ୍କ ପକ୍ଷରୁ ସବୁଜ ସଂକେତ ମିଳିଲେ ଜବାନଙ୍କୁ ଛାଡି ଦିଆଯିବ ବୋଲି କେବଳ କୁହାଯାଉଛି। ତେବେ ଜବାନଙ୍କ ମୁକ୍ତି ପାଇଁ ବିଏସଏଫ ପକ୍ଷରୁ ଲାଗାତାର ଉଦ୍ୟମ ଜାରି ରହିଛି। ହେଲେ ପାକିସ୍ତାନ ରେଞ୍ଜର ଏବେ ଫ୍ଲାଗ ମିଟିଂ ଟାଳିବାକୁ ଉଦ୍ୟମ କରୁଥିବା ଦେଖା ଯାଉଛି। ରେଞ୍ଜର୍ସ ମାମଲାରେ ମଜଭୁତ ପ୍ରତିକ୍ରିୟା ଦେଉ ନାହିଁ। ଏପରି ଲାଗୁଛି ଜାଣିଶୁଣି ପାକିସ୍ତାନୀ ରେଞ୍ଜର ଫ୍ଲାଗ ମିଟିଂକୁ ଗୁରୁତ୍ୱ ଦେଉ ନାହିଁ।
ସୂତ୍ର ଅନୁସାରେ ବିଏସଏଫ ଜବାନଙ୍କ ମୁକ୍ତି ପାଇଁ ଏବେ କୁଟନୈତିକ ଚ୍ୟାନେଲର ସହାୟତା ନିଆଯିବା କଥା ସାମ୍ନାକୁ ଆସିଛି। ଏଥିରେ ବିଏସଏଫର ପୂର୍ବତନ ଅଧିକାରୀଙ୍କ କହିବା କଥା ହେଉଛି ଭୁଲରେ କେହି କାହା ସୀମାକୁ ଚାଲିଯିବା କୌଣସି ଅପରାଧ ନୁହେଁ। ପୂର୍ବରୁ ମଧ୍ୟ ଦୁଇ ପକ୍ଷ ଏପରି ଅନେକ ଘଟଣା ସାମ୍ନା କରିଛନ୍ତି। ଏଥି ପାଇଁ ଅନେକ ଥର ମାତ୍ର କିଛି ଘଣ୍ଟା ଅଥବା ଗୋଟିଏ ଫ୍ଲାଗ ମିଟିଂରେ ସମସ୍ୟାର ସମାଧାନ କରି ଦିଆଯାଇଛି। ହେଲେ ଏଥର ପହଲଗାମ କାଣ୍ଡ ପରେ ଭାରତ-ପାକିସ୍ତାନ ଉତ୍ତେଜନା ମଧ୍ୟରେ ଜବାନଙ୍କୁ ଫେରାଇବାରେ ବିଳମ୍ବ ହେଉଥିବା ଅନୁମାନ କରାଯାଉଛି।
ଏହି ଘଟଣା ଏପ୍ରିଲ ୨୩ ତାରିଖ ଦିନ ସେତେବେଳେ ହୋଇଥିଲା ଯେତେବେଳେ ବିଏସଏଫ ଜବାନ ପି.କେ. ଶାହ ୧୮୨ତମ ବଟାଲିୟନର ଗେଟ୍ ନମ୍ବର ୨୦୮/୧ରେ ମୁତୟନ ଥିଲେ। ସେ ଫସଲ ଅମଳ ବେଳେ ଭାରତୀୟ ଚାଷୀଙ୍କ ଉପରେ ନଜର ରଖିଥିଲେ। କାରଣ ବିଏସଏଫ ସୀମାରେ ଚାଷୀଙ୍କ ସୁରକ୍ଷା ମଧ୍ୟ କରୁଛି। ଭୀଷଣ ଗରମରେ ଜବାନ ଯେତେବେଳେ ଗଛ ଛାଇକୁ ଗଲେ ପାକିସ୍ତାନୀ ରେଞ୍ଜର୍ସ ତାଙ୍କୁ ଗିରଫ କରିନେବା ସହ ତାଙ୍କ ସର୍ଭିସ ରାଇଫଲ ମଧ୍ୟ ଜବତ କରିଥିଲେ। କୁହାଯାଉଛି ସେ କିଛି ସମୟ ପୂର୍ବରୁ ଏହି କ୍ଷେତ୍ରରେ ମୁତୟନ ହୋଇଥିଲେ।
ତେବେ ପାକିସ୍ତାନକୁ ବିଏସଏଫ ଜବାନ ଫେରାଇବାକୁ ପଡିବ, ତାଙ୍କର କିଛି କ୍ଷତି ବି କରିପାରିବନି। କାରଣ ଜବାନଙ୍କୁ ନେଇ ପାକିସ୍ତାନ ନିଜେ ଏ କଥା ସ୍ୱୀକାର କରିଛି ଯେ ଜବାନ ତା ନିକଟରେ ଅଛନ୍ତି। ଜବାନଙ୍କୁ ସୁରକ୍ଷିତ ରଖିବା ଏବେ ତାର ମୁଖ୍ୟ କର୍ତ୍ତବ୍ୟ ସେ ଏପରି ବି ବାହାନା କରିପାରିବନି ଯେ ଜବାନ ପଳାୟନ କରିବାକୁ ଉଦ୍ୟମ କରିବାରୁ ତାଙ୍କର କ୍ଷତି ହୋଇଛି। ଯଦି ସେପରି କିଛି ହୁଏ ଏଥି ପାଇଁ ପାକିସ୍ତାନ ଦାୟି ହେବ। ଅନ୍ୟପଟେ ବିଏସଏଫ ରାଜସ୍ଥାନରେ ଜଣେ ପାକିସ୍ତାନୀ ରେଞ୍ଜରକୁ ଗୁଇନ୍ଦା ଗିରି ଅଭିଯୋଗରେ ଗିରଫ କରିଛି। ତେବେ ଏ ନେଇ ଅଧିକାରୀକ ପୁଷ୍ଟି କରାଯାଇ ନାହିଁ।
