ଗାଁ ଜଙ୍ଗଲରେ ଚାଲିଥିଲା ମଦ ରନ୍ଧା, ଚଢାଉ କରି ଦେଶୀ ମଦ-ପୋଚ ନଷ୍ଟକଲେ ଅବକାରୀ ଓ ବନ ବିଭାଗ

ଆଠଗଡ଼୨୧।୧୧:ସଂରକ୍ଷିତ ଜଙ୍ଗଲ ପାଲଟିଛି ଦେଶୀ ମଦର ଗନ୍ତାଘର । ଯେତେ ଖୋଜିଲେ ସେତେ ବାହାରୁଛି । ହଜାର ହଜାର ଲିଟର ଚୋରା ଦେଶୀ ମଦ ସହ ମିଳୁଛି ପୋଚ । ଯାହା ଉପରେ ଚଢାଉ କରି ନଷ୍ଟ କରୁଛି ଅବକାରୀ ବିଭାଗ ଓ ବନ ବିଭାଗ । କଟକ ଜିଲ୍ଲା ଖୁଣ୍ଟୁଣୀ ଥାନା ଅଞ୍ଚଳରେ ଏଭଳି ଧରପଗଡ଼ ଦେଖିବାକୁ ମିଳିଛି ।

ଏହି ଅଞ୍ଚଳରେ କଟକ, ଆଠଗଡ, ବାଙ୍କୀ, ନରସିଂହପୁର ଅବକାରୀ ବିଭାଗ ଏବଂ ବନ ବିଭାଗ ପକ୍ଷରୁ ମିଳିତ ଭାବେ ବଡ଼ ଧରଣର ଚଢ଼ାଉ କରିଛି । ଖୁଣ୍ଟୁଣୀ ଥାନା ଅନ୍ତର୍ଗତ ଡ଼ାଳୁଆ, ଖଣ୍ଡୁଆଳି, ପାଟିଆସାହି, ସଡ଼କସାହି, କୃଷ୍ଣପୁର, ମଗଧା ଏବଂ କଁସର ଗାଁ ଜଙ୍ଗଲରେ ଏହି ଚଢ଼ାଉ କରାଯାଇଛି । ଚଢାଉ ବେଳେ ଦେଶୀ ମଦ ସହ ପୋଚ ନଷ୍ଟ କରାଯାଇଛି । ଚୋରା ଦେଶୀ ମଦ ରନ୍ଧା ପାଇଁ ପ୍ରସ୍ତୁତ ହୋଇ ରହିଥିବା ୧୫ ହଜାର ୬୪୫ ଲିଟର ପୋଚ ସହିତ ହଜାରେ ୯୬୦ ଲିଟର ଦେଶୀ ମଦକୁ ଜବତ କରିଛି । ଯାହାକୁ ଘଟଣାସ୍ଥଳରେ ନଷ୍ଟ କରିଛି ଅବକାରୀ ବିଭାଗ ।

ଏହି ଅଞ୍ଚଳରେ ଅନେକ ଥର ଚଢାଉ ସତ୍ତ୍ୱେ ଅଭିଯୁକ୍ତ ମାନଙ୍କୁ ଗିରଫ କରିବାରେ ବାରମ୍ୱାର ବିଫଳ ହେଉଛି ଅବକାରୀ ବିଭାଗ । ଏହି ଚଢ଼ାଉରେ ଆଠଗଡ଼ ଅବକାରୀ ନିରୀକ୍ଷକ ରବି ନାରାୟଣ ପ୍ରଧାନଙ୍କ ସମେତ ୮ରୁ ଉର୍ଦ୍ଧ୍ବ ଅଧିକାରୀ ସାମିଲ ଅଛନ୍ତି ।