ଭୁବନେଶ୍ଵର ୨୨।୦୬; ଇତିହାସ ରଚିଲା ଓଡ଼ିଆ ସିନେମା । ବକ୍ସ ଅଫିସରେ ରେକର୍ଡ ଭାଙ୍ଗିଲା ‘ବୋଉ ବୁଟୁ ଭୂତ’ । ସପ୍ତାହରେ ୭ କୋଟି କଲେକ୍ସନ ପାର୍ । ତୃପ୍ତୀ ଶତପଥୀଙ୍କ ପ୍ରଯୋଜିତ ବୋଉ ବୁଟୁ ଭୂତ ଫିଲ୍ମ ଓଡ଼ିଆ ସିନେମାକୁ ଶିଖରରେ ପହଞ୍ଚାଇଛି । ରଜରେ ରିଲିଜ୍ ହୋଇଥିବା ବାବୁଶାନ ମହାନ୍ତି ଏବଂ ଅପରାଜିତଙ୍କ ଅଭିନୀତ ଏହି ହରର୍ କମେଡି ଫିଲ୍ମରେ ଓଡ଼ିଆ ଦର୍ଶକକୁ ଏକ ଭିନ୍ନ ସ୍ବାଦ ଦେଇଛି । ଫଳରେ ପ୍ରଥମ ଥର ପାଇଁ କୌଣସି ଓଡ଼ିଆ ସିନେମା ବକ୍ସ ଅଫିସ୍ରେ ଝଡ଼ ସୃଷ୍ଟି କରିଛି ।
ପ୍ରଥମ ଦିନରେ ସିନେମା ୫୧.୨ ଲକ୍ଷରୁ ଅଧିକ ଟଙ୍କା ରୋଜଗାର କରି ମେଗାଷ୍ଟାର୍ ଅନୁଭବ ମହାନ୍ତିଙ୍କୁ ପଛରେ ପକାଇ ଦେଇଛନ୍ତି । ୨୦୨୪ ଦଶହରା ଅବସରରେ ପ୍ରେକ୍ଷାଳୟକୁ ଆସିଥିଲା ଅନୁଭବଙ୍କ ସିନେମା ‘କର୍ମ’ । ଯେଉଁଥିରେ ସାରା ଓଡ଼ିଶା ‘ଚିରିଂ ଚିରିଂ’ ହୋଇ ନାଚିଥିଲା। ସେତେବେଳେ ଏହି ସିନେମା ପ୍ରଥମ ଦିନ ବକ୍ସ ଅଫିସ୍ କଲେକ୍ସନ୍ରେ ଇତିହାସ ରଚିଥିଲା । ‘କର୍ମ’ ୩୭.୨୦ ଲକ୍ଷ ରୋଜଗାର କରିଥିଲା । ହେଲେ ‘ବୋଉ ବୁଟୁ ଭୂତ’ ଦିନକରେ ୫୧.୨ ଲକ୍ଷ ରୋଜଗାର କରି ସବୁ ରେକର୍ଡ ଭାଙ୍ଗିଛି ।
ଫିଲ୍ମର ଲିଡ୍ରେ ବାବୁଶାନଙ୍କ ବ୍ୟତୀତ ଭର୍ସାଟାଇଲ୍ ଆକ୍ଟର ଅପରାଜିତା ମହାନ୍ତି ଏବଂ ଚୁଲବୁଲି ନାୟିକା ଅର୍ଚ୍ଚିତା ସାହୁଙ୍କ ଦମଦାର ଅଭିୟନ ଦେଖିବାକୁ ମିଳିଛି । ସେହିପରି ଅନ୍ୟାନ୍ୟ ଚରିତ୍ରରେ ଅଛନ୍ତି ଜଗନ୍ନାଥ ସେଠ୍, ଚୌଧୁରୀ ଜୟପ୍ରକାଶ ଦାସ, କେକେ, ରବି ମିଶ୍ର, ଅନୁଗୁଳିଆ ବଣ୍ଟି, ଉଦିତ୍ ଗୁରୁ ରହିଛନ୍ତି । ଫିଲ୍ମର ନିର୍ଦ୍ଦେଶନା ଜଗଦୀଶ୍ ମିଶ୍ର ଦେଇଥିବା ବେଳେ ସମ୍ପାଦକ ରଶ୍ମି ରଞ୍ଜନ ଅଛନ୍ତି। ସଙ୍ଗୀତ ଦେଇଛନ୍ତି ବାବୁସାନ୍ଙ୍କ ପୁରୁଣା ଯୋଡ଼ିଦାର ଗୌରବ ଆନନ୍ଦ । ସିନେମାର କାହାଣୀ ଓ ଚିତ୍ରନାଟ୍ୟ ଲେଖିଛନ୍ତି ମହମ୍ମଦ ଇମ୍ରାନ୍ ଓ ଡାଏଲଗ୍ ଲେଖିଛନ୍ତି ପ୍ରଣବ ପ୍ରସନ୍ନ ରଥ।
ଫିଲ୍ମର ଥିମ୍ ବିଜିଏମ୍ ଦର୍ଶକଙ୍କୁ ମନ୍ତ୍ର ମୁଗ୍ଧ କରିଥିବା ବେଳେ ସାଉଣ୍ଡ ଡିଜାଇନର ରହିଛନ୍ତି ତୁଷାର ଜେନା ଓ ବିଜିଏମରେ ଅଭିଷେକ୍ ପାଣିଗ୍ରାହୀ। ପ୍ରଥମ ଥର ପାଇଁ ଅପରାଜିତା ମହାନ୍ତି ତାଙ୍କ ପ୍ରଥମ ଗୀତ ‘ଲାଲ ଟୁକ ଟୁକ’ ଗାଇଛନ୍ତି ଏବଂ ‘ଓଦା ଲାଗେ’ରେ କଣ୍ଠଦାନ କରିଛନ୍ତି ବାବୁସାନ ଓ ଶୁଭଶ୍ରୀ ଜେନା । ସୁନ୍ଦରୀ କୁକିଜ୍ 'ଡୁଙ୍ଗୁଥିଲି’ ଗୀତରେ ଠୁମକା ଲଗାଇ ଦର୍ଶକଙ୍କୁ ମନୋରଞ୍ଜନର ତଡକା ଦେଇଛନ୍ତି । ସିନେମାର ‘ଓଦା ଲାଗେ’ ଆଉ ଗୀତ ଟ୍ରେଣ୍ଡିଂରେ ରହିଛି । ଫିଲ୍ମର ଅଧିକାଂଶ ସୁଟିଂ କେନ୍ଦୁଝର, ଆଠଗଡ ଓ କୋଣାର୍କରେ ହୋଇଛି।
ବୋଉ-ବୁଟୁ-ଭୂତ ରିଲିଜର ପ୍ରଥମ ସପ୍ତାହରେ ୭କୋଟିରୁ ଅଧିକ ଆୟ କରିଛି । ନିର୍ମାତା ନିଜ ଇନଷ୍ଟାଗ୍ରାମରେ ଫିଲ୍ମର ସପ୍ତାହକର କଲେକ୍ସନର ଡାଟା ସେୟାର କରିଛନ୍ତି । ପ୍ରଥମ ସପ୍ତାହରେ ୭.୧୫ କୋଟି ଆୟ । ପୂର୍ବରୁ ଫିଲ୍ମର ଟ୍ରେଲରକୁ ଲୋକେ ବେଶ ପସନ୍ଦ କରିଥିବା ବେଳେ ଫିଲ୍ମକୁ ଉତ୍ସାହର ସହ ଅପେକ୍ଷା କରିଥିଲେ । ସାରା ଓଡ଼ିଶାର ବିଭିନ୍ନ ପ୍ରେକ୍ଷାଳୟରେ ୨୩୦ଟି ଶୋ’ ଲାଗିଛି । ଆଗକୁ ରଥଯାତ୍ରା ରହିଥିବାରୁ ଏହି ଫିଲ୍ମ ୧୦ କୋଟିରୁ ଅଧିକ କଲେକ୍ସନ କରିବ ବୋଲି ନିର୍ମାତାଙ୍କ ଆଶା ରହିଛି...
