ନୂଆଦିଲ୍ଲୀ: ଜ୍ୟୋତିର୍ବିଜ୍ଞାନୀ ଏବଂ ମହାକାଶର ରହସ୍ୟମୟ ଦୁନିଆକୁ ନେଇ ରୁଚି ରଖୁଥିବା ଲୋକଙ୍କ ପାଇଁ ସେପ୍ଟେମ୍ୱର ମାସ ସ୍ୱତନ୍ତ୍ର ହେବାକୁ ଯାଉଛି । ମାସ ଆରମ୍ଭରେ ପୂର୍ଣ୍ଣ ଚନ୍ଦ୍ରଗ୍ରହଣ ଠାରୁ ଆରମ୍ଭ କରି ମାସ ଶେଷରେ ଏକ ବିରଳ ସୂର୍ଯ୍ୟପରାଗ ପର୍ଯ୍ୟନ୍ତ, ଅନେକ ଖଗୋଳୀୟ ଘଟଣା ଦେଖାଯିବ । ସେପ୍ଟେମ୍ବର ୭ରେ ହେବାକୁ ଥିବା ପୂର୍ଣ୍ଣ ଚନ୍ଦ୍ରଗ୍ରହଣ ୟୁରୋପ, ଆଫ୍ରିକା, ଏସିଆ, ଅଷ୍ଟ୍ରେଲିଆ ଏବଂ ନ୍ୟୁଜିଲ୍ୟାଣ୍ଡରେ ଦୃଶ୍ୟମାନ ହେବ । ଏହା ୨୦୨୫ ବର୍ଷର ଦ୍ୱିତୀୟ ପୂର୍ଣ୍ଣ ଚନ୍ଦ୍ରଗ୍ରହଣ ହେବ । ଏହା ଗତ କିଛି ବର୍ଷ ମଧ୍ୟରେ ସବୁଠାରୁ ଦୀର୍ଘ ଚନ୍ଦ୍ରଗ୍ରହଣ ମଧ୍ୟରୁ ଗୋଟିଏ ହେବ । ଜ୍ୟୋତିର୍ବିଜ୍ଞାନୀଙ୍କ ଅନୁସାରେ, ସେପ୍ଟେମ୍ବର ୨୦୨୫ର ପୂର୍ଣ୍ଣ ଚନ୍ଦ୍ରଗ୍ରହଣ ୧ ଘଣ୍ଟା ୨୨ ମିନିଟ୍ ପାଇଁ ରହିବ ।
ସେପ୍ଟେମ୍ବର ୭-୮ରେ ହେବାକୁ ଥିବା ପୂର୍ଣ୍ଣ ଚନ୍ଦ୍ରଗ୍ରହଣ ଭାରତ, ପାକିସ୍ତାନ, ବାଂଲାଦେଶ ସହିତ ସାଉଦି ଆରବ, ୟୁଏଇ ଏବଂ ଅନ୍ୟାନ୍ୟ ମଧ୍ୟପ୍ରାଚ୍ୟ ଦେଶ ସମେତ ଏସିଆର ଅଧିକାଂଶ ସ୍ଥାନରେ ଦୃଶ୍ୟମାନ ହେବ । ଏହା ବ୍ୟତୀତ ଆଫ୍ରିକା, ଅଷ୍ଟ୍ରେଲିଆ ଏବଂ ୟୁରୋପରେ ମଧ୍ୟ ଦୃଶ୍ୟମାନ ହେବ । ତେବେ ପୂର୍ବ ଦକ୍ଷିଣ ଆମେରିକା ଏବଂ ପଶ୍ଚିମ ଉତ୍ତର ଆମେରିକାରେ କେବଳ ଆଂଶିକ ଚନ୍ଦ୍ରଗ୍ରହଣ ଦେଖାଯିବ ।
ଦୁବାଇ ଆଷ୍ଟ୍ରୋନୋମି ଗ୍ରୁପ୍ ଅନୁଯାୟୀ, ସେପ୍ଟେମ୍ବର ୭ ଚନ୍ଦ୍ରଗ୍ରହଣ ଏହାର ସମୟ ପାଇଁ ଅଧିକ ଗୁରୁତ୍ୱପୂର୍ଣ୍ଣ । ଏହା ୮୨ ମିନିଟର ପୂର୍ଣ୍ଣ ଚନ୍ଦ୍ରଗ୍ରହଣ ହେବ । ବିଶ୍ୱର ପ୍ରାୟ ୮-୭ ପ୍ରତିଶତ ଲୋକ ଏହି ଚନ୍ଦ୍ରଗ୍ରହଣର ଅତି କମରେ ଆଂଶିକ ଦେଖିପାରିବେ । ଭାରତୀୟ ସମୟ ଅନୁସାରେ, ପୂର୍ଣ୍ଣ ଚନ୍ଦ୍ରଗ୍ରହଣ ସେପ୍ଟେମ୍ବର ୭ ରବିବାର ରାତି ପ୍ରାୟ ୧୦ଟାରେ ଆରମ୍ଭ ହେବ ଏବଂ ସେପ୍ଟେମ୍ବର ୮ରେ ସକାଳ ପ୍ରାୟ ୧.୩୦ଟାରେ ଏହାର ଶୀର୍ଷରେ ପହଞ୍ଚିବ । ଏହା ପରେ, ଏହା ଧୀରେ ଧୀରେ ହ୍ରାସ ପାଇ ପ୍ରାୟ ୩:୩୦ଟାରେ ଶେଷ ହେବ । ସେପ୍ଟେମ୍ବରରେ ପୂର୍ଣ୍ଣ ଚନ୍ଦ୍ରଗ୍ରହଣକୁ ବ୍ଲଡ୍ ମୁନ୍ ବୋଲି ମଧ୍ୟ କୁହାଯାଏ ।
ଏହା ବ୍ୟତୀତ, ୨୧ ସେପ୍ଟେମ୍ବର ୨୦୨୫ରେ ଏକ ଆଂଶିକ ସୂର୍ଯ୍ୟଗ୍ରହଣ ହେବାକୁ ଯାଉଛି । ଏହା ମୁଖ୍ୟତଃ ଦକ୍ଷିଣ ଗୋଲାର୍ଦ୍ଧରେ ଦେଖାଯିବ । ଏହା ଚଳିକ ବର୍ଷର ଶେଷ ଗ୍ରହଣ ହେବ । ୨୦୨୫ର ପ୍ରଥମ ଚନ୍ଦ୍ରଗ୍ରହଣ ମାର୍ଚ୍ଚ ୧୩-୧୪ରେ ହୋଇଥିଲା, ଯାହା ଏକ ପୂର୍ଣ୍ଣ ଚନ୍ଦ୍ରଗ୍ରହଣ ଥିଲା । ବର୍ଷର ପ୍ରଥମ ସୂର୍ଯ୍ୟ ପରାଗ ୨୯ ମାର୍ଚ୍ଚରେ ହୋଇଥିଲା, ଯାହା ଏକ ଆଂଶିକ ସୂର୍ଯ୍ୟପରାଗ ଥିଲା ।
