UP ମିଲ୍କିପୁର ଉପ ନିର୍ବାଚନରେ ବିଜେପି ପ୍ରାର୍ଥୀ ବିଜୟୀ, ଅଯୋଧ୍ୟା ପରାଜୟର ହେଲା ଭରଣା

Published By : Prameya-News7 Bureau | February 08, 2025 IST

ଅଯୋଧ୍ୟା ୮।୨: ଉତ୍ତରପ୍ରଦେଶ ମିଲ୍କିପୁର ଉପନିର୍ବାଚନରେ ବିଜେପି ବଡ଼ ବିଜୟ ହାସଲ କରିଛି। ବିଜେପି ପ୍ରାର୍ଥୀ ଚନ୍ଦ୍ରଭାନୁ ପାଶୱାନ ୬୦ ହଜରରୁ ଅଧିକ ଭୋଟରେ ବିଜୟୀ ହୋଇଛନ୍ତି। ଏଠାରେ ପ୍ରତିଦ୍ୱନ୍ଦ୍ୱୀତା କରୁଥିବା ସମାଜବାଦୀ ପାର୍ଟି (ସପା) ପ୍ରାର୍ଥୀ ଅଜିତ ପ୍ରସାଦ ଆରମ୍ଭରୁ ପଛେଇଥିଲେ। ଏଥି ମଧ୍ୟରେ ସପା ଅଧ୍ୟକ୍ଷ ଅଖିଳେଶ ଯାଦବ ପାର୍ଟିର ହାରକୁ ସ୍ୱୀକାର କରିଛନ୍ତି, ତେବେ ସେ ଅଯୋଧ୍ୟା ପୋଲିସ ପ୍ରଶାସନ ଉପରେ ନିର୍ବାଚନ ଗଡ଼ବଡ଼ିର ଅଭିଯୋଗ ଆଣିଛନ୍ତି। 

ଅଯୋଧ୍ୟା ମିଲ୍କିପୁର ସିଟ୍ ରେ ଉପନିର୍ବାଚନ ନିମନ୍ତେ ବିଜେପି ପାର୍ଟିର ତାଗଡ଼ା ନେତାଙ୍କ ବଦଳେ ଜଣେ ନୂଆ ମୁହଁକୁ ପ୍ରାର୍ଥୀ କରିଥିଲା। ସପା ପୂର୍ବରୁ ଏଠାରେ ସାଂସଦ ଅବଧେଶ ପ୍ରସାଦଙ୍କ ପୁଅ ଅଜିତ ପ୍ରସାଦଙ୍କୁ ପ୍ରାର୍ଥୀ ଘୋଷଣା କରିସାରିଥିଲା। ଅବଧେଶଙ୍କ ଭଳି ଚନ୍ଦ୍ରଭାନୁ ପାଶୀ ସମାଜର ପ୍ରତିନିଧିତ୍ୱ କରନ୍ତି। ସେ ରୁଦୌଲୀର ପରସୌଲୀ ଗ୍ରାମର ବାସିନ୍ଦା। ପେଷାରେ ଓକିଲ ଚନ୍ଦ୍ରଭାନୁ ପାଶୱାନ ଅଯୋଧ୍ୟାର ରୁଦୌଲୀରୁ ଦୁଇଥର ଜିଲ୍ଲା ପଞ୍ଚାୟତ ସଦସ୍ୟ ନିର୍ବାଚିତ ହୋଇଛନ୍ତି। 

ଏବେ ତାଙ୍କ ପତ୍ନୀ ଜିଲ୍ଲା ପଞ୍ଚାୟତ ସଦସ୍ୟ ଥିବା ବେଳେ ନିଜେ ଚନ୍ଦ୍ରଭାନୁ ବିଜେପି ଜିଲ୍ଲା ୟୁନିଟର କାର୍ଯ୍ୟକାରିଣୀ ସଦସ୍ୟ ଅଛନ୍ତି।  ୨୦୨୪ ଲୋକସଭା ନିର୍ବାଚନ ସମୟରେ ସେ ଅନୁସୂଚିତ ଜାତି ସମ୍ପର୍କ ପ୍ରମୁଖ ଥିଲେ। ତାଙ୍କ ପିତା ବାବା ରାମ ଲଖନ ଦାସ ଗ୍ରାମ ପ୍ରଧାନ ଅଛନ୍ତି। ଶାଢୀ ବିକ୍ରି ହେଉଛି ଚନ୍ଦ୍ରଭାନୁ ପାଶୱାନଙ୍କ ପରିବାରିକ ବେଉଷା। ଚନ୍ଦ୍ରଭାନୁ ସୁରଟ ବ୍ୟତୀତ ରୁଦୌଲୀରେ ମଧ୍ୟ ଶାଢୀ ବ୍ୟବସାୟ କରନ୍ତି। ଚନ୍ଦ୍ରଭାନୁ ଗତ ୨ ବର୍ଷ ହେଲା ମିଲ୍କିପୁର ବିଧାନସଭା ଆସନରେ ସକ୍ରିୟ ରୂପେ କାର୍ଯ୍ୟ କରୁଥିଲେ। ଏଣୁ ଉପନିର୍ବାଚନରେ ପାର୍ଟି ତାଙ୍କୁ ପ୍ରାର୍ଥୀ କରିଥିଲା। ତାଙ୍କର ଏହି ବିଜୟକୁ ଲୋକସଭା ନିର୍ବାଚନରେ ବିଜେପିର ଅଯୋଧ୍ୟା ହାରର ପ୍ରତିଶୋଧ ରୂପେ ଦେଖାଯାଉଛି।  

News7 Is Now On WhatsApp Join And Get Latest News Updates Delivered To You Via WhatsApp

Copyright © 2024 - Summa Real Media Private Limited. All Rights Reserved.