ସୋମବାରଠୁ ଅଙ୍ଗନଓ୍ବାଡିକୁ ଆସିବେ ପିଲା, ସହାୟିକା ବିବାଦ ପାଇଁ ୮୬ ଦିନ ହେବ ବନ୍ଦ ଥିଲା

ପଟ୍ଟାମୁଣ୍ଡାଇ ୧୪।୨: ଅଙ୍ଗନଓ୍ବାଡି କେନ୍ଦ୍ର ସହାୟିକା ବିବାଦ ଘଟଣାରେ ପଡ଼ିଲା ଯବନିକା । ଦୀର୍ଘ ଦିନ ଧରି ଅଙ୍ଗନଓ୍ବାଡି କେନ୍ଦ୍ର ବନ୍ଦ ପରେ ରାଜି ହେଲେ ଅଭିଭାବକ । ଅଙ୍ଗନଓ୍ବାଡି କେନ୍ଦ୍ରକୁ ଆସିବେ ପିଲା । ସୋମବାର ଠାରୁ ନିୟମିତ ଚାଲିବ ଅଙ୍ଗନଓ୍ବାଡି କେନ୍ଦ୍ର ।

ସୂଚନାଯୋଗ୍ୟ ଯେ, କେନ୍ଦ୍ରାପଡ଼ା ଜିଲ୍ଲା ରାଜନଗର ବ୍ଲକ ଘଡିଆମାଳର ନୂଆଗାଁ ଅଙ୍ଗନଓ୍ବାଡି କେନ୍ଦ୍ରରେ ଅନୁସୂଚିତ ଜାତିର ସହାୟିକା ନିଯୁକ୍ତି ଘଟଣା ନେଇ ବିବାଦ ଲାଗି ରହିଥିଲା । ଅଙ୍ଗନଓ୍ବାଡି କେନ୍ଦ୍ରଟି ୮୬ଦିନ ହେବ ବନ୍ଦ ରହିବା ପରେ ଗତ ୧୧ ତାରିଖ ଦିନ ଖବର ପ୍ରସାରଣ ପରେ ଉପଜିଲ୍ଲାପାଳ ଅଙ୍ଗନଓ୍ବାଡି କେନ୍ଦ୍ରରେ ପହଞ୍ଚି ଲୋକଙ୍କୁ ବୁଝାସୁଝା କରିବାକୁ ଚେଷ୍ଟା କରିଥିଲେ । ମାତ୍ର କୌଣସି ଲୋକ ଆଲୋଚନାକୁ ଆସିନଥିଲେ । ପ୍ରଶାସନ ପକ୍ଷରୁ ତିନି ଦିନ ସମୟ ଦିଆଯାଇଥିଲା । ତିନି ଦିନ ପୂରଣ ହୋଇଥିଲେ ମଧ୍ୟ କେହି ପିଲା ଅଙ୍ଗନଓ୍ବାଡିକୁ ଆସିନଥିଲେ l

ଏ ଖବର ବି ପଢ଼ନ୍ତୁ:- କଟକ ଜିଲ୍ଲାପାଳଙ୍କ ବିରୋଧରେ ଆସିଛି ସ୍ବାଧିକାର ଭଙ୍ଗ ନୋଟିସ୍, ଜିଲ୍ଲାପାଳଙ୍କୁ ହୋଇପାରେ କୈଫତ ତଲବ

ଶେଷରେ ମହିଳା କମିଶନ ସଦସ୍ୟା କଳ୍ପନା ମଲ୍ଲିକ, ଉପଜିଲ୍ଲାପାଳ ଓ ତହସିଲଦାରଙ୍କ ସହ ଅଭିଭାବକ ଆଲୋଚନାରେ ସଫଳ ହେବା ସହ ଦୀର୍ଘ ଦିନ ଧରି ଚାଲିଥିବା ସମସ୍ୟାର ସମାଧାନ ହୋଇଛି l ଅଭିଭାବକଙ୍କ ସମସ୍ତ ସମସ୍ୟାର ସମାଧାନ କରିବା ନେଇ ପ୍ରଶାସନ ପ୍ରତିଶ୍ରୁତି ଦେବା ପରେ ବିବାଦରେ ଯବନିକା ପଡ଼ିଛି । ଏହାସହ ଅଙ୍ଗନଓ୍ବାଡି କେନ୍ଦ୍ରଟି ପୂର୍ବ ଭଳି ଚାଲିବା ସହ ପିଲା ଅଙ୍ଗନଓ୍ବାଡି କେନ୍ଦ୍ରକୁ ସୋମବାରଠୁ ଆସିବା ନେଇ ମହିଳା କମିଶନ ସଦସ୍ୟା ସୂଚନା ଦେଇଛନ୍ତି ।