ନୂଆଦିଲ୍ଲୀ ୧୮/୦୫: ଆମ୍ ଆଦମୀ ପାର୍ଟି (ଏଏପି) ସାଂସଦ ସ୍ୱାତୀ ମାଲିୱାଲଙ୍କ ଉପରେ ଆକ୍ରମଣ ମାମଲାରେ ଦିଲ୍ଲୀ ପୋଲିସ ବଡ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଏହି ଅଭିଯୋଗରେ ପୋଲିସ ବିଭବ କୁମାରଙ୍କୁ ଗିରଫ ରଖିଛି । ପୋଲିସ ବିଭବ କୁମାରଙ୍କୁ ସିଏମଙ୍କ ହାଉସରୁ ଗିରଫ କରିଛି ।
ଏହି ଘଟଣାରେ ବିଭବ କୁମାର ସ୍ୱାତୀ ମାଲିୱାଲଙ୍କୁ ଆକ୍ରମଣ କରିଥିବା ଅଭିଯୋଗ ହୋଇଛି । କିନ୍ତୁ ବିଭବ କୁମାର କହିଛନ୍ତି ଯେ ତାଙ୍କ ବିରୋଧରେ ଆସିଥିବା ଅଭିଯୋଗ ଭୁଲ ଅଟେ । ବିଭବ କୁମାର ଏହା ମଧ୍ୟ କହିଛନ୍ତି ଯେ ମୁଁ ପ୍ରତିଟି ଅନୁସନ୍ଧାନରେ ସହଯୋଗ କରିବାକୁ ପ୍ରସ୍ତୁତ । ସେ ଆହୁରି କହିଛନ୍ତି ଯେ ଏପର୍ଯ୍ୟନ୍ତ ମୁଁ ଏ ସମ୍ପର୍କରେ କୌଣସି ନୋଟିସ ପାଇ ନାହିଁ, ମୁଁ ଗଣମାଧ୍ୟମ ମାଧ୍ୟମରେ ଏ ବିଷୟରେ ଜାଣିବାକୁ ପାଇଥିଲି ।
ପୋଲିସ ପୂର୍ବରୁ ଜାଣିବାକୁ ପାଇଥିଲା କି, ବିଭବ ଦିଲ୍ଲୀ ବାହାରେ ନାହାଁନ୍ତି, ବରଂ ସେ ସିଏମ୍ ବାସଭବନରେ ଅଛନ୍ତି । ଏହାପରେ ପୋଲିସ ସେଠାକୁ ଯାଇ ତାଙ୍କୁ ସେଠାରୁ ଗିରଫ କରିଛି । ସୂଚନା ଥାଉକି, ସ୍ବାତି ମାଲିୱାଲ ବିଭବ କୁମାରଙ୍କ ବିରୋଧରେ ଗୁରୁତର ଅଭିଯୋଗ ଆଣିଛନ୍ତି। ସ୍ୱାତୀ କହିବା ମୁତାବକ ଯେ ଯେତେବେଳେ ସେ ସିଏମ୍ କେଜ୍ରିୱାଲଙ୍କ ବାସଭବନକୁ ଯାଇଥିଲ, ସେତେବେଳେ ବିଭବ କୁମାର ତାଙ୍କ ସହ ଅସଦାଚରଣ କରି ତାଙ୍କୁ ପିଟିଥିଲେ ।
ଅନ୍ୟପକ୍ଷରେ ସ୍ୱାତୀ ମାଲିୱାଲଙ୍କ ଅଭିଯୋଗ ଉପରେ ଦିଲ୍ଲୀ ପୋଲିସ ଏଫଆଇଆର ପଞ୍ଜିକରଣ କରିଛି । ଏଫ୍ଆଇଆର୍ ପରେ ସ୍ୱାତି ମାଲିୱାଲଙ୍କ ଡାକ୍ତରୀ ପରୀକ୍ଷା କରାଯାଇଥିଲା । ରିପୋର୍ଟରେ କୁହାଯାଇଛି ଯେ ସ୍ୱାତୀଙ୍କ ବାମ ଗୋଡରେ ଏବଂ ଡାହାଣ ଆଖିରେ ଆଘାତ ଚିହ୍ନ ରହିଛି । ସ୍ୱାତୀ ମଧ୍ୟ ମୁଣ୍ଡବିନ୍ଧା ଏବଂ ବେକରେ ଯନ୍ତ୍ରଣା ହେବା ଅଭିଯୋଗ କରିଛନ୍ତି।
