ନୂଆଦିଲ୍ଲୀ ୦୯।୦୧: ବାଦୁଡି ପକ୍ଷୀ ସାଧାରଣତଃ ଲମ୍ବା ଦୂରତାର ଉଡ଼ାଣ ପାଇଁ ପରିଚିତ । ବର୍ତ୍ତମାନ ବାଦୁଡ଼ିଙ୍କ ଲମ୍ବା ଦୂରତାର ପ୍ରବାସ ସମ୍ପର୍କରେ ବୈଜ୍ଞାନିକଙ୍କୁ ମିଳିଛି ଏକ ଉପଲବ୍ଧି । ମାକ୍ସ ପ୍ଲାଙ୍କ୍ ଇନ୍ଷ୍ଟିଚ୍ୟୁଟ୍ ଅଫ୍ ଆନିମଲ ବିହେଭିଓର୍ର ବୈଜ୍ଞାନିକମାନେ ବାଦୁଡ଼ିଙ୍କର ଏକ ଆଚରଣ ବିଷୟରେ ଜାଣିବାକୁ ପାଇଛନ୍ତି । ଗବେଷକମାନେ ୭୧ଟି ନକ୍ଟୁଲ ବାଦୁଡ଼ିଙ୍କୁ ସେମାନଙ୍କର ବସନ୍ତ ପ୍ରବାସ ସମୟରେ ଅଧ୍ୟୟନ କରିଥିଲେ । ସେମାନଙ୍କ ଗତିବିଧି ଓ ପାରିପାର୍ଶ୍ବିକ ସ୍ଥିତିକୁ ଯାଞ୍ଚ୍ କରିବା ଲାଗି ଅତି ହାଲୁକା ସେନ୍ସର ପ୍ରୟୋଗ କରିଥିଲେ ।
ଏହି ସେନ୍ସରଗୁଡ଼ିକୁ ବାଦୁଡ଼ିଙ୍କ ଶରୀରରେ ସଂଲଗ୍ନ କରାଯାଇଥିଲା । ସେମାନଙ୍କ ଗତିବିଧି ସ୍ତର ଓ ଚତୁଃପାଶ୍ୱର୍ ତାପମାତ୍ରାର ତଥ୍ୟ ରେକର୍ଡ କରାଯାଇଥିଲା । ଅଧ୍ୟୟନର ଲେଖକ କହିଛନ୍ତି, ସେନ୍ସର ଚମତ୍କାର ତଥ୍ୟ ଦେଇଛି । ଅଧ୍ୟୟନରୁ ଜଣାପଡ଼ିଲା, ନକ୍ଟୁଲ ବାଦୁଡ଼ି ଗୋଟିଏ ରାତିରେ ପ୍ରାୟ ୪୦୦ କିମି ପ୍ରବାସ ଯାତ୍ରା କରିପାରନ୍ତି ।
ସଦ୍ୟ ଅଧ୍ୟୟନ ଏହି ପ୍ରଜାତିଙ୍କ ଯାତ୍ରା ଦୂରତାର ପୂର୍ବ ରେକର୍ଡ ଭାଙ୍ଗିଛି । ଏହି ବାଦୁଡ଼ି ଗୋଟିଏ ପ୍ରବାସ ସ୍ଥଳୀକୁ ଯାଉନଥିବା ମଧ୍ୟ ଅଧ୍ୟୟନକର୍ତ୍ତା ଜାଣିପାରିଲେ । ସେମାନେ ସାଧାରଣତଃ ଉତ୍ତରପୂର୍ବ ଦିଗକୁ ଯାତ୍ରା କରି ଉକ୍ତ ଭୂଖଣ୍ଡର ବିଭିନ୍ନ ସ୍ଥାନକୁ ପ୍ରବାସରେ ଯାଇଥିଲେ ।
ଅଧ୍ୟୟନରୁ ମିଳିଥିବା ସବୁଠୁ ଗୁରୁତ୍ୱପୂର୍ଣ୍ଣ ତଥ୍ୟ ହେଲା, ବାଦୁଡ଼ିମାନେ ପ୍ରାୟତଃ ରାତିରେ ପବନର ଧୀମା ବେଗ ଓ ତାପମାତ୍ରା ବୃଦ୍ଧି ହେଉଥିବା ସମୟରେ ପ୍ରବାସ କରିଥିଲେ । ଏହି ସ୍ଥିତି ଝଡ଼ର ଆସନ୍ନ ସ୍ଥିତିକୁ ଦର୍ଶାଏ । ଏହି ଉଷ୍ଣ ବାୟୁ ପ୍ରବାହରେ ବାଦୁଡ଼ି ନିଜର ଶକ୍ତି ସଞ୍ଚୟ କରିପାରନ୍ତି ଏବଂ ଆଗକୁ ଉଡ଼ିପାରନ୍ତି । ବେଗ ବଢ଼ାଇବା ପାଇଁ ଝଡ଼ର ସାହାରା ନିଅନ୍ତି ।