‘ଦେଶ ପାଇଁ କେହି ଲଢ଼ନ୍ତି ନାହିଁ’, ଭରା ସଂସଦରେ ସେନା ମୁଖ୍ୟଙ୍କ ମୁଖା ଖୋଲିଦେଲେ ପ୍ରତିରକ୍ଷା ମନ୍ତ୍ରୀ

ଇସଲାମାବାଦ: ଆତଙ୍କବାଦୀ ଆକ୍ରମଣ ପରେ ପାକିସ୍ତାନ ସରକାର ଏବଂ ବିରୋଧୀ ନେତାମାନଙ୍କ ମଧ୍ୟରେ ସାମରିକ ବାହିନୀକୁ ନେଇ ଫାଟ ସୃଷ୍ଟି ହୋଇଛି। ପ୍ରତିରକ୍ଷା ମନ୍ତ୍ରୀ ଖ୍ବାଜା ଆସିଫ ବୁଧବାର (୧୧ ଫେବୃଆରୀ, ୨୦୨୬) ପାକିସ୍ତାନ ସଂସଦରେ କହିଛନ୍ତି ଯେ, ଦେଶ ପାଇଁ କେହି ଯୁଦ୍ଧ ଲଢ଼ନ୍ତି ନାହିଁ, ବରଂ ରାଜନୈତିକ ସ୍ୱାର୍ଥ ପାଇଁ ଲଢ଼ନ୍ତି । ତାଙ୍କର ଏହି ବୟାନ ପାକିସ୍ତାନର ଚିଫ୍ ଅଫ୍ ଷ୍ଟାଫ୍ (ସିଡିଏଫ୍) ଅସୀମ ମୁନିର ଏବଂ ପ୍ରଧାନମନ୍ତ୍ରୀ ଶାହବାଜ ସରିଫଙ୍କ ଉପରେ ପ୍ରଶ୍ନ ଉଠାଇଛି । ସେମାନେ ସବୁବେଳେ ଆଫଗାନିସ୍ତାନ ଏବଂ ଭାରତ ବିରୁଦ୍ଧରେ ମନ୍ତବ୍ୟ ଦେଉଛନ୍ତି ।

ସେନା ସମ୍ପର୍କରେ ନ୍ୟାସନାଲ୍ ଆସେମ୍ବଲିରେ ବିରୋଧୀ ଦଳ ନେତା ମହମୁଦ ଖାନ ଆଚକଜାଇ କହିଥିଲେ ଯେ, ପାକିସ୍ତାନୀ ସେନା ଚାରିଟି ଜିଲ୍ଲାରେ ସୀମିତ। ପାକିସ୍ତାନୀ ପ୍ରତିରକ୍ଷା ମନ୍ତ୍ରୀ ଏଥିରେ ଆପତ୍ତି ଉଠାଇଛନ୍ତି । କିନ୍ତୁ ସ୍ୱୀକାର କରିଛନ୍ତି ଯେ, ତାଙ୍କ ଦେଶ ବର୍ତ୍ତମାନ ଯୁଦ୍ଧ ମଧ୍ୟରେ ରହିଛି। ପାକିସ୍ତାନର ପ୍ରତିରକ୍ଷା ମନ୍ତ୍ରୀ ଖ୍ବାଜା ଆସିଫ କହିଛନ୍ତି, ‘ଆମେ ଆମର ରାଜନୈତିକ ସ୍ୱାର୍ଥ ପାଇଁ ଯୁଦ୍ଧ ଲଢ଼ୁଛୁ। ଯଦି କେହି କହେ ଯେ ଆମେ ଦେଶ ପାଇଁ ଲଢ଼ୁଛୁ, ତେବେ ସେମାନେ ଭୁଲ୍। ଆମେ ଆମର ରାଜନୈତିକ ସ୍ୱାର୍ଥ ଏବଂ କ୍ଷମତା ପାଇଁ ଯୁଦ୍ଧ ଲଢ଼ୁଛୁ।’

ସେ ଆହୁରି କହିଛନ୍ତି, ‘ଗତ ୬୦-୭୦ ବର୍ଷ ମଧ୍ୟରେ, ଯେତେବେଳେ କାହାକୁ କ୍ଷମତାରୁ ବଞ୍ଚିତ କରାଯାଇଥିଲା, ସେମାନେ ଏଥିପାଇଁ ଲଢ଼ିଥିଲେ । ସେହି ଲଢ଼େଇରେ କୌଣସି ମୌଳିକ ନୀତିର ଅଭାବ ଥିଲା। ଯେତେବେଳେ ପଞ୍ଜାବୀମାନଙ୍କୁ ସେମାନଙ୍କର ପରିଚୟପତ୍ର ଦେଖିବା ପରେ ଗୁଳି କରାଯାଏ, ସେତେବେଳେ ବଲୁଚିସ୍ତାନରୁ କୌଣସି ସ୍ୱର ଉଠି ନଥାଏ। ମୁଁ ପ୍ରାଦେଶିକ ଭେଦଭାବରେ ବିଶ୍ୱାସ କରେ ନାହିଁ, କିନ୍ତୁ ମୁଁ ଆଚକଜାଇଙ୍କ ମନ୍ତବ୍ୟର ଦୃଢ଼ ବିରୋଧ କରୁଛି।’

ଖ୍ବାଜା ଆସିଫ କହିଛନ୍ତି ଯେ, ଆତଙ୍କବାଦ ବିରୋଧରେ ଲଢ଼େଇ କୌଣସି ନିର୍ଦ୍ଦିଷ୍ଟ ପ୍ରଦେଶ କିମ୍ବା ଜିଲ୍ଲାରେ ସୀମିତ ନାହିଁ, ବରଂ ସମଗ୍ର ଦେଶରେ ବ୍ୟାପିଛି। ଆମ ସୁରକ୍ଷା ପାଇଁ ନିଜ ଜୀବନ ବଳିଦାନ ଦେଇଥିବା ସହିଦମାନଙ୍କ ପ୍ରତି ଆମେ ଋଣୀ। ଆମେ ଏକ ଅତ୍ୟନ୍ତ ରକ୍ତାକ୍ତ ଯୁଦ୍ଧ ମଧ୍ୟରେ ଫସିଛୁ। ଆମ ଧର୍ମରେ ଏପରି ଆକ୍ରମଣ ଏବଂ ରକ୍ତପାତ ଯଥାର୍ଥ ନୁହେଁ।