ନୂଆଦିଲ୍ଲୀ: ଭାରତ ଏବଂ ବାଂଲାଦେଶ ମଧ୍ୟରେ ବଢୁଛି ବିବାଦ। ଗତ ସପ୍ତାହରେ ବାଂଲାଦେଶରୁ ଆସୁଥିବା ୬,୬୦୦ କୋଟି ଟଙ୍କା ମୂଲ୍ୟର ସାମଗ୍ରୀକୁ ବ୍ୟାନ୍ କରିଥିଲା ଭାରତ। ଏହା ପୂର୍ବରୁ ଭାରତୀୟ ସୂତା, ଚାଉଳ ଏବଂ ଅନ୍ୟାନ୍ୟ ସାମଗ୍ରୀ ଆମଦାନୀ ବନ୍ଦ କରିଦେଇଥିଲା ବାଂଲାଦେଶ। ବାଂଲାଦେଶ ମଧ୍ୟ ଭାରତୀୟ କାର୍ଗୋ ଉପରେ ଟ୍ରାନଜିଟ୍ ଫି' ଲାଗୁ କରିଛି। ଏବେ ଭାରତକୁ ଦିଆଯାଇଥିବା ୧୮୦ କୋଟି ଟଙ୍କାର ଅର୍ଡରକୁ ବାତିଲ କରିଦେଇଛି ବାଂଲାଦେଶ ସରକାର। ଗାର୍ଡେନ୍ ରିଚ୍ ସିପ୍ ବିଲ୍ଡର୍ସ ଆଣ୍ଡ୍ ଇଞ୍ଜିନିୟର୍ସ ଲିମିଟେଡକୁ ଏହି ନିର୍ଦ୍ଦେଶ ଦେଇଛନ୍ତି ବାଂଲାଦେଶ ସରକାର।
କମ୍ପାନୀ କହିଛି ଯେ ବାଂଲାଦେଶ ସରକାର ଏକ ଆଧୁନିକ ସାମୁଦ୍ରିକ ଜାହାଜ ନିର୍ମାଣ ପାଇଁ ଅର୍ଡର ଦେଇଛି। କିନ୍ତୁ ଏବେ ଏହାକୁ ବାତିଲ କରିଦିଆଯାଇଛି। ଏହି ଡିଲ୍ ୨୧ ନିୟୁତ ଡଲାର ଅର୍ଥାତ୍ ପ୍ରାୟ ୧୮୦ କୋଟି ଟଙ୍କା ମୂଲ୍ୟର ଥିଲା। ବାଂଲାଦେଶ ପ୍ରତିରକ୍ଷା ମନ୍ତ୍ରଣାଳୟ ଅଧୀନରେ ଥିବା ପ୍ରତିରକ୍ଷା ମହାନିର୍ଦ୍ଦେଶାଳୟ ଦ୍ୱାରା ଏହି ଅର୍ଡର ଦିଆଯାଇଥିଲା। ପ୍ରାୟ ୬୧ ମିଟର ଲମ୍ବା ଏବଂ ୧୫.୮ ମିଟର ପ୍ରସ୍ଥର ଏହି ଜାହାଜକୁ ୨୪ ମାସ ମଧ୍ୟରେ ନିର୍ମାଣ କରାଯିବାର ଥିଲା।
ଡିଜାଇନ୍ ଅନୁସାରେ, ଏହି ଜାହାଜର ସର୍ବାଧିକ ଗତି ଅତି କମରେ ୧୩ ନଟ୍ ହେବା କଥା ଥିଲା। ଗତ ବର୍ଷ ଅଗଷ୍ଟରେ ଶେଖ୍ ହସିନା କ୍ଷମତାରୁ ଓହରିଯିବା ପରଠାରୁ ଭାରତ ଏବଂ ବାଂଲାଦେଶ ମଧ୍ୟରେ ସମ୍ପର୍କ ସାମାନ୍ୟ ତିକ୍ତ ହୋଇଛି। ମହମ୍ମଦ ୟୁନୁସଙ୍କ ମଧ୍ୟବର୍ତ୍ତୀକାଳୀନ ସରକାର ମଧ୍ୟ ଚୀନ୍ର ନିକଟତର ହୋଇଛି। ଏହା ଚୀନ୍ ସହିତ 2.1 ବିଲିୟନ ଡଲାରର ନୂତନ ଚୁକ୍ତି ସ୍ୱାକ୍ଷରିତ କରିଛି।
କୋଲକାତାର ଗାର୍ଡେନ୍ ରିଚ୍ ସିପ୍ବିଲ୍ଡର୍ସ ବାଣିଜ୍ୟିକ ଏବଂ ନୌସେନା ଜାହାଜ ନିର୍ମାଣ ଏବଂ ମରାମତି କରେ। ଏହାର ମୁଖ୍ୟ ଗ୍ରାହକ ହେଉଛନ୍ତି ଭାରତୀୟ ନୌସେନା ଏବଂ ଭାରତୀୟ ତଟରକ୍ଷୀ ବାହିନୀ। ବୁଧବାର ଦିନ ନ୍ୟାସନାଲ ଷ୍ଟକ୍ ଏକ୍ସଚେଞ୍ଜ (NSE) ରେ କମ୍ପାନୀର ସେୟାର 4.43% ବୃଦ୍ଧି ପାଇ 2,500.5 ଟଙ୍କାରେ ବନ୍ଦ ହୋଇଥିଲା। ଚଳିତ ବର୍ଷ କମ୍ପାନୀର ସେୟାର ଏପର୍ଯ୍ୟନ୍ତ 54.7% ଏବଂ ଗତ ୧୨ ମାସରେ 109.6% ବୃଦ୍ଧି ପାଇଛି। ୨୦୨୫ ଆର୍ଥିକ ବର୍ଷର ଚତୁର୍ଥ ତ୍ରୈମାସିକରେ, କମ୍ପାନୀର ନିଟ୍ ଲାଭ ଗତ ବର୍ଷ ତୁଳନାରେ ୧୧୮% ବୃଦ୍ଧି ପାଇଛି।
