କର୍ଣ୍ଣେଲଙ୍କ ଭଡ଼ାଘରୁ ନାବାଳିକା ଝିଅର ମୃତଦେହ ଉଦ୍ଧାର, ହାତଲେଖା ଚିଠିରେ ସାବତ ମା’ର କଥା

ଢେଙ୍କାନାଳ ୯।୩: କର୍ଣ୍ଣେଲଙ୍କ ଭଡାଘରୁ ନାବାଳିକା ଝିଅର ମୃତଦେହ । ଢେଙ୍କାନାଳ ସ୍ଥିତ ୧୨ ଓଡ଼ିଶା ଏନ୍‌ସିସି ବାଟାଲିଅନର କର୍ଣ୍ଣେଲଙ୍କ ଭଡ଼ାଘରୁ ତାଙ୍କ ୧୩ ବର୍ଷର ଝିଅର ମୃତଦେହକୁ ଉଦ୍ଧାର କରାଯାଇଛି । ଶୋଇବା ଘରୁ ଝୁଲନ୍ତା ଅବସ୍ଥାରେ ଥିଲା ତାଙ୍କ ମୃତଦେହ । ଖବର ପାଇ ଘଟଣାସ୍ଥଳରେ ପହଞ୍ଚି ପୋଲିସ ତଦନ୍ତ ଆରମ୍ଭ କରିଛି । ମୃତଦେହକୁ ବ୍ୟବଚ୍ଛେଦ ପାଇଁ ପଠାଇ ତଦନ୍ତ ଜାରି ରଖିଛି ପୋଲିସ ।

ଏ ଖବର ବି ପଢ଼ନ୍ତୁ:- କଣ୍ଟେନର ସହ ଧକ୍କା ହୋଇ ପସିଗଲା ବାଇକ୍, ଜଳିଗଲା ଉଭୟ ଗାଡ଼ି : ୩ ଆରୋହୀଙ୍କ ମୃତ୍ୟୁ

ସୂଚନାଯୋଗ୍ୟ ଯେ, ଢେଙ୍କାନାଳ ସହରର ମହିଷାପାଟ ସ୍ଥିତ ହାଉସିଂ କଲୋନୀ ଫେଜ୍-୨ର ଏକ ଭଡା ଘରୁ ନାବାଳିକାଙ୍କ ମୃତଦେହ ଉଦ୍ଧାର କରିଛି ପୋଲିସ । ମୃତ ନାବାଳିକା ଅଷ୍ଟମ ଶ୍ରେଣୀର ଛାତ୍ରୀ ବୋଲି ଜଣାପଡିଛି । ନାବାଳିକାଙ୍କ ବାପା କର୍ଣ୍ଣେଲ ଛବିଳ ଚନ୍ଦ୍ର ନାଗନ୍‌ଙ୍କ ଘର ସୁନ୍ଦରଗଡ଼ ଜିଲ୍ଲା କାଂଶବାହାଲରେ ବୋଲି ଜଣାପଡିଛି । ସେ ଢେଙ୍କାନାଳ ୧୨ ଓଡ଼ିଶା ଏନସିସି ବାଟାଲିଅନରେ କାର୍ଯ୍ୟରତ । ସେ ଏହି ଘରକୁ ଭଡାନେଇ ଏକୁଟିଆ ରହୁଥିଲେ । ନାବାଳିକାଙ୍କ ନିଜ ମା’ଙ୍କର ପୂର୍ବରୁ ମୃତ୍ୟୁ ହୋଇସାରିଛି । ତେବେ ବାପା ଦ୍ୱିତୀୟ ବିବାହ କରିଥିଲେ । ଉତ୍ତର ପ୍ରଦେଶର ଲକ୍ଷ୍ମୌରେ ଥିବା ସାବତ ମା’ଙ୍କ ପାଖରେ ନାବାଳିକା ରୁହନ୍ତି । ମାତ୍ର ଗତ ୧୦/୧୨ଦିନ ହେଲା ନାବାଳିକା ତାଙ୍କ ସାବତ ମା'ଙ୍କ ସହିତ ଢେଙ୍କାନାଳରେ ଥିବା ବାପାଙ୍କ ପାଖକୁ ବୁଲିବାକୁ ଆସିଥିଲେ । ସୋମବାର ସକାଳୁ ତାଙ୍କ ଶୋଇବା ଘରୁ ସନ୍ଦେହଜନକ ଭାବେ ମୃତଦେହ ଠାବ ହୋଇଛି । ମୃତ୍ୟୁର ସଠିକ କାରଣ କ'ଣ ତାହା ଜଣାପଡିନାହିଁ ।  ସେ ତାଙ୍କ ସାବତ ମା'ଙ୍କୁ ଅତ୍ୟନ୍ତ ଘୃଣା କରନ୍ତି ବୋଲି ଲେଖାଥିବା ଏକ ସୁଇସାଇଡ଼ ନୋଟ୍‌ ମୃତଦେହ ନିକଟରୁ ପୋଲିସ ଜବତ କରିଛି । ଏହାଦ୍ବାରା ମୃତ୍ୟୁ ପଛର କାରଣକୁ ନେଇ ଅନେକ ପ୍ରଶ୍ନବାଚୀ ସୃଷ୍ଟି କରିଥିଲେ ମଧ୍ୟ ତାଙ୍କ ବାପା-ମା’ ଏ ସମ୍ପର୍କରେ ପାଟି ଖୋଲୁନାହାନ୍ତି । ତେବେ ସୁଇସାଇଡ଼ ନୋଟ୍ ଜବତ କରିବା ସହିତ ତଦନ୍ତ ଜାରି ରଖିଛି ପୋଲିସ । ଶବ ବ୍ୟବଚ୍ଛେଦ ପରେ କାରଣ କ’ଣ ଜଣାପଡିବ ବୋଲି ଜିଲ୍ଲା ଅତିରିକ୍ତ ଏସ୍‌ପି ପ୍ରକାଶ କରିଛନ୍ତି ।