ନୂଆଦିଲ୍ଲୀ: କ୍ରିକେଟ୍ ଜଗତର ନୂଆ ନାଁ। ସବୁଠୁ କମ ବୟସରେ ଟି-୨୦ ଶତକ। ଆଇପିଏଲ୍ରେ ଦ୍ରୁତତମ ଶତକ ହାସଲ କରିବାରେ ଭାରତୀୟ ବ୍ୟାଟର। ଆଇପିଏଲ୍ରେ କ୍ରିସ୍ ଗେଲଙ୍କ ପରେ ଦ୍ଵିତୀୟ ଦ୍ରୁତତମ ଶତକ ହାସଲକାରୀ ବ୍ୟାଟର। ସବୁଠୁ କମ ବୟସରେ ପେଶାଦାର କ୍ରିକେଟ୍ରେ ପଦାର୍ପଣ। ଆଉ ସବୁଠୁ କମ ବୟସରେ ପ୍ଲେୟାର ଅଫ ଦ ମ୍ୟାଚ୍। ଆଉ ୮ ବର୍ଷ ପୂର୍ବେ କକାଙ୍କ କୋଳରେ ବସି ଆଇପିଏଲ ମ୍ୟାଚ୍ ଦେଖୁଥିବା ବାଳକ ଆଜି ସୁପରଷ୍ଟାର। ଏହି ଉଦୀୟମାନ ବ୍ୟାଟରଙ୍କ ନାଁ ହେଉଛି ବୈଭବ ସୂର୍ଯ୍ୟବଂଶୀ।
ବୈଭବଙ୍କ ଏକ ଫଟୋ ବହୁତ ଚର୍ଚ୍ଚାରେ ରହିଛି। ୨୦୧୭ର ଏହି ଫଟୋରେ ଏହି ବାମହାତୀ ବ୍ୟାଟରଙ୍କୁ କକାଙ୍କ କୋଳରେ ରହି ମ୍ୟାଚ୍ ଦେଖୁଥିବା ଦେଖିବାକୁ ମିଳିଛି। ଆଉ ୮ ବର୍ଷ ପରେ ଏହି ବାଳକ ଆଜି ଆଇପିଏଲ୍ର ସୁପରଷ୍ଟାର। ଏବେ ପୂରା କ୍ରିକେଟ୍ ଦୁନିଆ ତାର ବ୍ୟାଟିଂ ଦେଖୁଛି।
ରାଜସ୍ଥାନ ରୟାଲ୍ସର ବୈଭବ ସୂର୍ଯ୍ୟବଂଶୀ ସୋମବାର ଗୁଜରାଟ ଟାଇଟନ୍ସ ବିପକ୍ଷରେ ୩୫ ବଲରୁ ଶତକ ହାସଲ କରିଥିଲେ। ଏହା ଆଇପିଏଲ୍ ଇତିହାସର ଦ୍ଵିତୀୟ ଦ୍ରୁତତମ ଶତକ ଏବଂ କୌଣସି ଭାରତୀୟଙ୍କ ଦ୍ଵାରା ଦ୍ରୁତତମ ଶତକ। ଗୁଜରାଟ ବୋଲରଙ୍କୁ ନିର୍ଧୁମ ପ୍ରହାର କରିଥିଲେ। ୧୪ ବର୍ଷ ୩୨ ଦିନ ବୟସରେ ଆଇପିଏଲ୍ରେ ଶତକ ହାସଲ କରି ଇତିହାସ ରଚିଛନ୍ତି।
ବୈଭବ ୫ ବର୍ଷ ବୟସରେ କ୍ରିକେଟ୍ର ପ୍ରଶିକ୍ଷଣ ନେଇଥିଲେ। ତାଙ୍କ ପିଲା ବେଳର କୋଚ୍ଙ୍କ ନାଁ ହେଉଛି ବ୍ରଜେଶ ଝା। ଏହି ଉଦୀୟମାନ ବ୍ୟାଟରଙ୍କ ଘର ବିହାରରର ସମସ୍ତିପୁର। ୨୦୧୭ରେ ସେ ଆଇପିଏଲ୍ ମ୍ୟାଚ୍ ଦେଖିବା ପାଇଁ ନିଜ କାକାଙ୍କ ସହ ଲୋକକାତାର ଇଡେନ ଗାର୍ଡେନ୍ସ ଷ୍ଟାଡିୟମ ପହଞ୍ଚିଥିଲେ।
ତାଙ୍କ ପିଲା ବେଳର କୋଚ୍ ବ୍ରଜେଶ ଝା କହିଛନ୍ତି, ଯେବେ ବୈଭବ ରନ କରି ପାରୁ ନ ଥିଲେ, ସେ କାନ୍ଦୁଥିଲେ। ତାଙ୍କ ନିକଟରେ ରନ କରିବାର ବହୁତ ଭୋକ ରହିଛି।ତାଙ୍କ କୋଚ୍ ଜାଣି ପାରିଥିଲେ ଯେ, ଏହି ବାଳକ ସାଧାରଣ ନୁହେଁ , ଅସାଧାରଣ।
ବୈଭବ ସୂର୍ଯ୍ୟବଂଶୀ ଚଳିତ ଆଇପିଏଲ୍ରେ ଲକ୍ଷ୍ନୌ ସୁପର ଜାଏଣ୍ଟସ ବିପକ୍ଷ ମ୍ୟାଚ୍ରେ ଆଇପିଏଲ୍ରେ ଡେବ୍ୟୁ କରିଥିଲେ। ସେ ପ୍ରଥମ ବଲ୍ରେ ଛକା ମାରି କ୍ରିକେଟ୍ ଦୁନିଆର ଧ୍ୟାନ ଆକର୍ଷଣ କରିଥିଲେ। ଉକ୍ତ ମ୍ୟାଚ୍ରେ ୨୦ ବଲ୍ରୁ ୩୪ ରନ କରି ଆଉଟ୍ ହୋଇଥିଲେ। ପାଭିଲିୟନ ଫେରିବା ସମୟରେ ସେ କାନ୍ଦୁଥିବା ଦେଖିବାକୁ ମିଳିଥିଲା। ପିଲା ବେଳରୁ ତାଙ୍କ ପ୍ରତିଭା ଦେଖି ଗାଁ ଲୋକେ ବି ଆଶା କରିଥିଲେ ଯେ, ଏହି ପିଲା ଦିନେ ଦିନେ ନାଁ ରଖିବ।
ପିଲା ବେଳର କୋଚ୍ ବ୍ରଜେଶ ଝାଙ୍କ ସ୍ଵପ୍ନ ବୈଭବଙ୍କୁ ନୀଳ ଜର୍ସିରେ ଦେଖିବା। ସେ ଆଶା ରଖିଛନ୍ତି ଯେ, ଶୀଘ୍ର ବୈଭବ ଭାରତୀୟ ଦଳ ପକ୍ଷରୁ ଖେଳୁଥିବାର ତାଙ୍କ ସ୍ଵପ୍ନ ସାକାର ହେବ।
