ନୂଆଦିଲ୍ଲୀ: ଅଷ୍ଟ୍ରିଆର ଗ୍ରାଜ୍ରେ ଥିବା ଏକ ସ୍କୁଲରେ ଆଖିବୁଜା ଗୁଳିମାଡ଼ ହୋଇଛି। ଗୁଳିକାଣ୍ଡରେ ଅତି କମରେ ୧୧ ଜଣଙ୍କର ମୃତ୍ୟୁ ହୋଇଛି। ସେହିପରି ୨୮ ଜଣ ଆହତ ହୋଇଛନ୍ତି। ସ୍ଥାନୀୟ ପୋଲିସ ଅଧିକାରୀମାନେ କହିଛନ୍ତି ଯେ ଜଣେ ଆକ୍ରମଣକାରୀ ଦୁଇଟି ଶ୍ରେଣୀଗୃହରେ ପ୍ରବେଶ କରି ଅଚାନକ ଗୁଳିମାଡ଼ କରିଥିଲା। ଗୁଳିକାଣ୍ଡର ଶିକାର ହୋଇଥିବା ଲୋକଙ୍କ ମଧ୍ୟରେ ଛାତ୍ର, ଶିକ୍ଷକ ଏବଂ ଅନ୍ୟାନ୍ୟ ଲୋକ ମଧ୍ୟ ଅଛନ୍ତି।
ପୋଲିସ କହିଛି ଯେ ସ୍କୁଲରେ ଗୁଳିକାଣ୍ଡ ଘଟଣା ପରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି ଏବଂ ସମସ୍ତ ଦିଗରୁ ତଦନ୍ତ କରାଯାଉଛି। ସନ୍ଦିଗ୍ଧ ଆକ୍ରମଣକାରୀ ଜଣେ ଛାତ୍ର ବୋଲି କୁହାଯାଉଛି, ଯିଏ ଗୁଳିକାଣ୍ଡ ପରେ ନିଜେ ଆତ୍ମହତ୍ୟା କରିଥିଲା। ଆକ୍ରମଣକାରୀର ମୃତଦେହ ସ୍କୁଲର ଏକ ବାଥରୁମରୁ ମିଳିଛି।
ଅଷ୍ଟ୍ରିଆର ଗୃହ ମନ୍ତ୍ରଣାଳୟ ଏହି ଘଟଣା ଉପରେ ଦୁଃଖ ପ୍ରକାଶ କରିଛି ଏବଂ କହିଛି ଯେ ଗ୍ରାଜ୍ର ଫେଡେରାଲ୍ ଉଚ୍ଚ ମାଧ୍ୟମିକ ବିଦ୍ୟାଳୟରେ ହୋଇଥିବା ଆକ୍ରମଣରେ ଅନେକଙ୍କର ମୃତ୍ୟୁ ହୋଇଛି। ବର୍ତ୍ତମାନ ପୋଲିସ ଏହି ମାମଲାରେ କାର୍ଯ୍ୟାନୁଷ୍ଠାନ ନେଉଛି। ସ୍ଥାନୀୟ ଗଣମାଧ୍ୟମ ମୃତ୍ୟୁ ସଂଖ୍ୟା ୧୧ ଦର୍ଶାଇଛି। କିନ୍ତୁ ମନ୍ତ୍ରଣାଳୟ ଏପର୍ଯ୍ୟନ୍ତ ମୃତ୍ୟୁ ସଂଖ୍ୟା ବିଷୟରେ ସରକାରୀ ସୂଚନା ଦେଇନାହିଁ। ଏହି ଗୁଳିକାଣ୍ଡ ଘଟଣା କାହିଁକି କରାଯାଇଥିଲା ସେ ବିଷୟରେ ମଧ୍ୟ ଏପର୍ଯ୍ୟନ୍ତ ସୂଚନା ଦିଆଯାଇ ନାହିଁ।
ଗ୍ରାଜ୍ ସହରର ମେୟର ଏଲକେ କହର ଏହି ଘଟଣାକୁ ଏକ ଭୟଙ୍କର ଦୁଃଖଦ ଘଟଣା ବୋଲି କହିଛନ୍ତି। ସେ କହିଛନ୍ତି ଯେ ସ୍କୁଲ ଭୟରେ ପିଲାମାନଙ୍କ ଉପରେ ଗୁଳି ଚାଳନା କରାଯାଇଥିଲା। ସେ ସ୍ପଷ୍ଟ କରିଛନ୍ତି ଯେ ଗୁଳି ଚଳାଇଥିବା ବ୍ୟକ୍ତିଙ୍କ ମୃତଦେହ ମଧ୍ୟ ସ୍କୁଲ ପରିସରରୁ ମିଳିଛି। ସେ କହିଛନ୍ତି ଯେ ସକାଳ ୧୦ଟାରେ ଏହି ଘଟଣା ବିଷୟରେ ଜାଣିବା ପରେ ପ୍ରାୟ ଏକ ଘଣ୍ଟା ମଧ୍ୟରେ ସ୍କୁଲକୁ ଖାଲି କରି ସମସ୍ତଙ୍କୁ ସୁରକ୍ଷିତ ଭାବରେ ବାହାର କରିଥିଲା ପୋଲିସ। ବର୍ତ୍ତମାନ ପରିସ୍ଥିତି ନିୟନ୍ତ୍ରଣରେ ଅଛି।
ଅଷ୍ଟ୍ରିଆର ଦକ୍ଷିଣ-ପୂର୍ବରେ ଅବସ୍ଥିତ ଗ୍ରାଜ୍ ଦେଶର ଦ୍ୱିତୀୟ ବୃହତ୍ତମ ସହର। ଏହାର ଜନସଂଖ୍ୟା ପ୍ରାୟ ୩ ଲକ୍ଷ। ଏପରି ପରିସ୍ଥିତିରେ, ଦେଶର ବଡ଼ ସହର ଉପରେ ଆକ୍ରମଣ ସରକାର ଏବଂ ଲୋକଙ୍କ ସୁରକ୍ଷା ନେଇ ପ୍ରଶ୍ନ ଉଠିଛି।
