ନୂଆଦିଲ୍ଲୀ: ଭାରତ ଶୁକ୍ରବାର ବିଜୟ ସହ ଏସିଆ କପରେ ନିଜ ଯାତ୍ରା ଆରମ୍ଭ କରିଛି । ଅଧିନାୟକ ହରମନପ୍ରୀତ ସିଂହଙ୍କ ତିନି ଗୋଲ୍ ବଳରେ ଭାରତୀୟ ଟିମ୍ ଚୀନକୁ ୪-୩ରେ ପରାସ୍ତ କରିଛି । ଭାରତ ପାଇଁ କ୍ୟାପ୍ଟେନ ହରମନପ୍ରୀତ ସିଂହଙ୍କ ବ୍ୟତୀତ ଜୁଗରାଜ ସିଂହ ଗୋଟିଏ ଗୋଲ୍ କରିଥିଲେ ।
ପ୍ରଥମ କ୍ୱାର୍ଟର ୦-୧ ପଛରେ ରହିବା ପରେ ଭାରତ ଦୁଇ ମିନିଟ୍ ଭିତରେ ଦୁଇ ଗୋଲ୍ ଦେଇ ମ୍ୟାଚ୍ର ପ୍ରଥମାର୍ଦ୍ଧରେ ୨-୧ରେ ଆଗୁଆ ରହିଥିଲା । ମ୍ୟାଚ୍ର ଦ୍ୱିତୀୟାର୍ଦ୍ଧର ତୃତୀୟ ମିନିଟ୍ରେ ଅଧିନାୟକ ହରମନପ୍ରୀତ ଦ୍ୱିତୀୟ ଗୋଲ୍ କରିଥିଲେ । ଏହାର ଦୁଇ ମିନିଟ୍ ପରେ ଚୀନ ଆକ୍ରାମକ ଖେଳ ଦେଖାଇ ଦ୍ୱୀତିୟ ଗୋଲ୍ କରିଥିଲା । ଶେଷ କ୍ୱାର୍ଟରରେ ଦୁଇ ଟିମ୍ ବରାବାର ସ୍ଥିତିରେ ଥିଲେ । କିନ୍ତୁ ହରମନପ୍ରୀତ ୪୭ତମ ମିନିଟ୍ରେ ପେନାଲ୍ଟି କର୍ଣ୍ଣରକୁ ଗୋଲ୍ରେ ପରିଣତ କରି ଭାରତକୁ ବିଜୟୀ କରାଇଥିଲେ ।
ଭାରତର ଅଧିନାୟକ ହରମନପ୍ରୀତ ସିଂହ ୨୦ ମିନିଟ୍, ୩୩ ମିନିଟ୍ ଓ ୪୭ ମିନିଟ୍ରେ ଭାରତକୁ ମିଳିଥିବା ପେନାଲ୍ଟି କର୍ଣ୍ଣରକୁ ଗୋଲ୍ରେ ପରିଣତ କରିବାରେ ସଫଳ ହୋଇଥିଲେ । ଅନ୍ୟପଟେ ଜୁଗରାଜ ସିଂହ ୧୮ତମ ମିନିଟ୍ରେ ଗୋଲ୍ ଦେଇଥିଲେ । ଚୀନ ପାଇଁ ଡୁ ଶିହାଓ (୧୨ ମିନିଟ୍), ଚେନ୍ ବେନହାଇ୍ (୩୫ ମିନିଟ୍) ଓ ଗାଓ ଜିଶେଙ୍ଗ (୪୨ ମିନିଟ)ରେ ଚୀନ ପାଇଁ ଗୋଲ୍ କରିଥିଲେ ।
ପୁରୁଷ ଏସିଆ କପ୍ର ଆୟୋଜନ ଶୁକ୍ରବାରଠାରୁ ବିହାରର ରାଜଗିରରେ ଆରମ୍ଭ ହୋଇଛି । ରାଜଗିର ସ୍ଥିତ ଅନ୍ତର୍ଜାତୀୟ ଖେଳ ପରିସରରେ ଏହି ଟୁର୍ଣ୍ଣାମେଣ୍ଟ ଅଗଷ୍ଟ ୨୯ରୁ ଆରମ୍ଭ ହୋଇ ସେପ୍ଟେମ୍ୱର ୭ ଯାଏ ଶେଷ ହେବ । ଏହି ଟୁର୍ଣ୍ଣାମେଣ୍ଟର ବିଜୟୀ ଟିମ୍କୁ ୨୦୨୬ ଅନ୍ତର୍ଜାତୀୟ ହକି ମହାସଂଘ ହକି ବିଶ୍ୱକପରେ ସିଧା ପ୍ରବେଶ ମିଳିବ । ବର୍ତ୍ତମାନ ସୁଦ୍ଧା ୧୧ଟି ଏସିଆ କପ୍ ଟୁର୍ଣ୍ଣାମେଣ୍ଟ ଖେଳା ଯାଇଛି, ଯେଉଁଥିରେ କୋରିଆ ୫ ଥର, ଭାରତ-ପାକିସ୍ତାନ ତିନି ଥର ଲେଖାଏଁ ବିଜୟୀ ହୋଇଛନ୍ତି ।
