ନୂଆଦିଲ୍ଲୀ ୧୮।୦୮; ଦିଲ୍ଲୀରେ ପୁଣି ସ୍କୁଲକୁ ବୋମା ଧମକ ଦିଆଯାଇଛି। ଏହି ଧମକ ନୂଆ ନୁହେଁ ପୂର୍ବରୁ ମଧ୍ୟ ଦିଲ୍ଲୀର ଅନେକ ସ୍କୁଲକୁ ଧମକପୂର୍ଣ୍ଣ ଇମେଲ୍ ପଠାଯାଇଛି। ଅନେକ ଥର ଫେକ୍ କଲ୍ ବୋଲି ଜଣାପଡ଼ିଛି। ତେବେ ଆଜି, ଦ୍ୱାରକା ସ୍ଥିତ ଦିଲ୍ଲୀ ପବ୍ଲିକ୍ ସ୍କୁଲକୁ ବୋମା ଧମକ ଫୋନ୍ କଲ୍ ଆସିଥିଲା। ସତର୍କତାମୂଳକ ପଦକ୍ଷେପ ସ୍ୱରୂପ କର୍ତ୍ତୃପକ୍ଷଙ୍କ ଦ୍ୱାରା ସ୍କୁଲ ପରିସର ଖାଲି କରାଯାଇଛି।
ବର୍ତ୍ତମାନ, ସ୍କୁଲ ପରିସରରେ ଏକ ସର୍ଚ୍ଚ ଅପରେସନ୍ କରାଯାଉଛି। ଦ୍ୱାରକାରେ ଅବସ୍ଥିତ ଦିଲ୍ଲୀ ପବ୍ଲିକ୍ ସ୍କୁଲରେ ବୋମା ଥିବା ସୂଚନା ପାଇବା ମାତ୍ରେ ପୋଲିସ, ବମ୍ ସ୍କ୍ୱାଡ୍ ଏବଂ ଅଗ୍ନିଶମ ବିଭାଗ ଦଳ ଘଟଣାସ୍ଥଳରେ ପହଞ୍ଚିଥିଲେ। ଅଗ୍ନିଶମ ସେବା ପକ୍ଷରୁ ଏହି ସୂଚନା ଦିଆଯାଇଛି। କୁହାଯାଉଛି ଯେ ସକାଳ ୭.୨୪ରେ କଣ୍ଟ୍ରୋଲ ରୁମ୍କୁ ଏହି ସୂଚନା ଆସିଥିଲା। ଅଧିକାରୀଙ୍କ ଅନୁଯାୟୀ, ଧମକପୂର୍ଣ୍ଣ କଲ୍ ଆସିବା ମାତ୍ରେ ସ୍କୁଲ ପ୍ରଶାସନ ତୁରନ୍ତ ସ୍ଥାନୀୟ ପୋଲିସକୁ ସୂଚନା ଦେଇଥିଲା। ପୋଲିସ କଣ୍ଟ୍ରୋଲ ରୁମରୁ ମିଳିଥିବା ସୂଚନା ଆଧାରରେ, ଦ୍ୱାରକା ସେକ୍ଟର-୧୨ ସ୍ଥିତ ସ୍କୁଲରେ ବହୁ ସଂଖ୍ୟକ ପୋଲିସ ଫୋର୍ସ ମୁତୟନ କରାଯାଇଥିଲା। ଛାତ୍ରଛାତ୍ରୀମାନଙ୍କୁ ନିରାପଦ ସ୍ଥାନକୁ ପଠାଯାଇଥିଲା। ସେମାନଙ୍କ ଅଭିଭାବକମାନଙ୍କୁ ମଧ୍ୟ ସୂଚନା ଦିଆଯାଇଥିଲା।
ଦିଲ୍ଲୀ ଅଗ୍ନିଶମ ସେବା (DFS)ର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ବୋମା ଧମକ ଖବର ପାଇବା ମାତ୍ରେ ଘଟଣାସ୍ଥଳକୁ ତୁରନ୍ତ ଚାରୋଟି ଅଗ୍ନିଶମ ଗାଡ଼ି ପଠାଯାଇଥିଲା। ସମଗ୍ର ସ୍କୁଲ ଏବଂ ଏହାର ଆଖପାଖ ଅଞ୍ଚଳରେ ସୁରକ୍ଷା ଘେରାବନ୍ଦୀ କରାଯାଇଥିଲା। ତା'ପରେ ଏହାକୁ ସିଲ୍ କରାଯାଇଥିଲା। ଏପର୍ଯ୍ୟନ୍ତ ସନ୍ଦେହଜନକ କିଛି କୌଣସି ଜିନିଷ ମିଳିନାହିଁ।
