ମୁମ୍ବାଇ ୩୦।୫: ଦିଗ୍ଗଜ ବ୍ୟବସାୟୀ ମୁକେଶ ଅମ୍ବାନୀଙ୍କ ସାନ ପୁଅ ଅନନ୍ତ ଅମ୍ବାନୀ ଓ ରାଧିକା ମର୍ଚ୍ଚାଣ୍ଟ ଖୁବ୍ ଶୀଘ୍ର ବିବାହ ବନ୍ଧନରେ ଆବଦ୍ଧ ହେବାକୁ ଯାଉଛନ୍ତି। ଦୀର୍ଘ ସମୟ ହେଲା ସେମାନଙ୍କ ବିବାହ ପ୍ରସ୍ତୁତି ଚାଲିଛି। ଏବେ ସେମାନଙ୍କ ବିବାହ ନିମନ୍ତ୍ରଣ କାର୍ଡ ବି ସାମ୍ନାକୁ ଆସିଛି। ଏଥିରୁ ମିଳୁଥିବା ସୂଚନା ଅନୁସାରେ ଅନନ୍ତ ଅମ୍ବାନୀ ଓ ରାଧିକା ମର୍ଚ୍ଚାଣ୍ଟଙ୍କ ବିବାହ ବିକେସି ସ୍ଥିତ ଜିଓ ୱାର୍ଲଡ କନଭେନସନ ସେଣ୍ଟରରେ ଅନୁଷ୍ଠିତ ହେବ ବୋଲି ଜଣାପଡିଛି।
ଅନନ୍ତା ଅମ୍ବାନୀ ଓ ରାଧିକା ମର୍ଚ୍ଚାଣ୍ଟ ଜୁଲାଇ ୧୨ ତାରିଖରେ ବିବାହ ବନ୍ଧନରେ ଆବଦ୍ଧ ହେବେ। ଏହି ଭବ୍ୟ ବିବାହକୁ ନେଇ ନୂଆନୂଆ ଅପଡେଟସ୍ ସାମ୍ନାକୁ ଆସୁଛି। ଏଥିରେ ବିବାହ ନିମନ୍ତ୍ରଣ କାର୍ଡରୁ ଏହି ବିବାହ ସମ୍ପୂର୍ଣ୍ଣ ହିନ୍ଦୁ ରିତିରିବାଜ ଅନୁସାରେ ହେବ ବୋଲି ସ୍ପଷ୍ଟ ହୋଇଯାଇଛି। ମୁଖ୍ୟ କାର୍ଯ୍ୟାକ୍ରମ ଅର୍ଥାତ ବିବାହ ଉତ୍ସବ ଜୁଲାଇ ୧୨ ତାରିଖରେ ହେବ। ଏହା ପରେ ଜୁଲାଇ ୧୩ ତାରିଖରେ ଶୁଭ ଆଶିର୍ବାଦ ଉତ୍ସବ ଅନୁଷ୍ଠିତ ହେବ। ୧୪ ଜୁଲାଇ ୨୦୨୪ରେ ମଙ୍ଗଳ ଉତ୍ସବ ଅର୍ଥାତ ୱେଡିଂ ରିସେପସନ ଆୟୋଜିତ ହେବ।
ଏହି ଭବ୍ୟ ବିବାହ ଉତ୍ସବରେ ଦେଶ ଦୁନିଆର ଅନେକ ବଡ଼ବଡ଼ ଲୋକେ ସାମିଲ ହେବେ। ବିବାହ ନିମନ୍ତ୍ରଣ ପତ୍ରରେ ବିବାହ ଉତ୍ସବ ଦିନ ନିମନ୍ତ୍ରିତ ଅତିଥିଙ୍କୁ ଟ୍ରାଡିସନାଲ ଭାରତୀୟ ଡ୍ରେସକୋଡ ଫଲୋ କରିବାକୁ କୁହାଯାଇଛି। ଏହା ପରଦିନ ଅର୍ଥାତ ୧୩ ଜୁଲାଇ ଶନିବାର ଦିନ ଶୁଭ ଆଶିର୍ବାଦ ଉତ୍ସବରେ ନିମନ୍ତ୍ରିତ ଅତିଥିଙ୍କୁ ଏଥି ପାଇଁ ଏଥନିକ ଡ୍ରେସ କୋଡ ଫଲୋ କରିବାକୁ କୁହାଯାଇଛି। ୧୪ ଜୁଲାଇ ରବିବାର ୱେଡିଂ ରିସେପସନ ଅନୁଷ୍ଠିତ ହେବ। ଏଣୁ ଅତିଥିଙ୍କୁ ଏଥନିକ ଡ୍ରେସକୋଡ ଅନୁସରଣ କରିବାକୁ କୁହାଯାଇଛି।
ଏହି ଭବ୍ୟ ବିବାହ ନିମନ୍ତେ ଅତିଥିଙ୍କୁ ଆମନ୍ତ୍ରଣ ପଠାଯିବା ଆରମ୍ଭ ହୋଇଗଲାଣି। ଏଥିରେ ବିଜନେସ୍, ବଲିଉଡ, ରାଜନୀତି ସମେତ ଅନେକ ଦିଗ୍ଗଜ ବ୍ୟକ୍ତିତ୍ୱଙ୍କୁ ନିମନ୍ତ୍ରଣ କରାଯାଇଛି। ସବୁ ଅତିଥିଙ୍କୁ ପାରମ୍ପରିକ ଲାଲ ଓ ଗୋଲ୍ଡେନ ରଙ୍ଗର ନିମନ୍ତ୍ରଣ କାର୍ଡ ମିଳିସାରିଲାଣି। ଇତି ମଧ୍ୟରେ ଅନନ୍ତ ଓ ରାଧିକାଙ୍କ ଦୁଇଟି ପ୍ରି-ୱେଡିଂ ସେରିମନି ଅନୁଷ୍ଠିତ ହୋଇଯାଇଛି। ଏଥିରୁ ପ୍ରଥମ ପ୍ରି-ୱେଡିଂ ସେରିମନି ଜାମନଗରରେ ମାର୍ଚ୍ଚ ମାସରେ ଅନୁଷ୍ଠିତ ହୋଇଥିଲା।
