ନୂଆଦିଲ୍ଲୀ ୦୮।୦୫; ଭାରତୀୟ ସଶସ୍ତ୍ର ବାହିନୀ ଦ୍ୱାରା କରାଯାଇଥିବା 'ଅପରେସନ ସିନ୍ଦୂର' ପରେ, ସୀମାରେ ସତର୍କତା ବୃଦ୍ଧି କରାଯାଇଛି। ପହଲଗାମ ଆତଙ୍କବାଦୀ ଆକ୍ରମଣର ଜବାବରେ ପାକିସ୍ତାନ ପାର୍ଶ୍ୱରୁ ସୀମାରେ ପ୍ରବଳ ଗୁଳିମାଡ଼ ହୋଇଥିଲା । ଯେଉଁଥିରେ ଅନେକ ଲୋକଙ୍କ ମୃତ୍ୟୁ ହୋଇଛି। ସୀମା ପାରରୁ ଗୁଳିବର୍ଷଣକୁ ଦୃଷ୍ଟିରେ ରଖି, ଜମ୍ମୁ-କଶ୍ମୀର ସୀମାନ୍ତବର୍ତ୍ତୀ ଜିଲ୍ଲାଗୁଡ଼ିକରେ ହାଇ ଆଲର୍ଟ ଘୋଷଣା କରାଯାଇଛି। ଏପରିକି ସ୍କୁଲ ଏବଂ କଲେଜଗୁଡ଼ିକୁ ମଧ୍ୟ ବନ୍ଦ କରିଦିଆଯାଇଛି। ସୀମା ସଂଲଗ୍ନ ଗ୍ରାମ ଗୁଡ଼ିକୁ ଖାଲି କରାଯାଉଛି।
ଜାମ୍ମୁ-କାଶ୍ମୀରର ସାମ୍ବା ଏବଂ କାଠୁଆ ଜିଲ୍ଲା ବ୍ୟତୀତ ଜମ୍ମୁ ଜିଲ୍ଲାର ଆରଏସ ପୁରା ଅଞ୍ଚଳରେ ଆଗାମୀ ୭୨ ଘଣ୍ଟା ପାଇଁ ସତର୍କ ସୂଚନା ଜାରି କରାଯାଇଛି। ଏହି ସତର୍କତା ଅନୁଯାୟୀ, ସୀମାନ୍ତ ଅଞ୍ଚଳରେ ରହୁଥିବା ଲୋକମାନଙ୍କୁ ଯଥାଶୀଘ୍ର ଗାଁ ଖାଲି କରିବାକୁ କୁହାଯାଇଛି। ବୁଧବାର ବିଳମ୍ବିତ ରାତି ପର୍ଯ୍ୟନ୍ତ ସୀମାବର୍ତ୍ତୀ ଅଞ୍ଚଳର ଗାଁ ଗୁଡ଼ିକୁ ଖାଲି କରାଯିବା ଜାରି ରହିଥିଲା। ସତର୍କତାମୂଳକ ପଦକ୍ଷେପ ସ୍ୱରୂପ, ଏଠାରେ ସ୍କୁଲ, କଲେଜ ଏବଂ ସମସ୍ତ ପ୍ରକାରର ପ୍ରତିଷ୍ଠାନକୁ ବନ୍ଦ କରି ଦିଆଯାଇଛି।
ଏହି ସମୟରେ, କେନ୍ଦ୍ର ଶାସିତ ଅଞ୍ଚଳର କାଶ୍ମୀର ଉପତ୍ୟକାକୁ ମଧ୍ୟ ସତର୍କ କରାଯାଇଛି। ବର୍ତ୍ତମାନର ପରିସ୍ଥିତିକୁ ଦୃଷ୍ଟିରେ ରଖି, ଉପତ୍ୟକାର ସମସ୍ତ ଜିଲ୍ଲାରେ ନିୟନ୍ତ୍ରଣ କକ୍ଷ ନମ୍ବର ଜାରି କରାଯାଇଛି। କୌଣସି ପ୍ରକାରର ଅସୁବିଧା ହେଲେ ଲୋକଙ୍କୁ ସାହାଯ୍ୟ କରିବା ପାଇଁ ଏହି ନମ୍ବରଗୁଡ଼ିକ ଦିଆଯାଇଛି। କେବଳ ଜମ୍ମୁ-କାଶ୍ମୀର ନୁହେଁ, ପଞ୍ଜାବର ସୀମାନ୍ତ ଜିଲ୍ଲା ଗୁଡ଼ିକର ଗାଁଗୁଡ଼ିକୁ ମଧ୍ୟ ସତର୍କ କରାଯାଇଛି। ଫିରୋଜପୁର ଜିଲ୍ଲାର କିଛି ସୀମାନ୍ତ ଗାଁର ଲୋକମାନେ ସୁରକ୍ଷିତ ସ୍ଥାନରେ ଆଶ୍ରୟ ନେବା ଆରମ୍ଭ କରିଛନ୍ତି। ତଥାପି, ପାକିସ୍ତାନ ସହିତ ଅନ୍ତର୍ଜାତୀୟ ସୀମାରେ ଅବସ୍ଥିତ ଅମୃତସର ଏବଂ ତରନ ତାରନ ଗାଁରେ ପରିସ୍ଥିତି ଶାନ୍ତିପୂର୍ଣ୍ଣ ଥିବା କୁହାଯାଉଛି।
