ସାଲେପୁର ୧୦/୦୫: ଆଜି ହେଉଛି ପବିତ୍ର ଅକ୍ଷୟ ତୃତୀୟା । ଚଳଚଞ୍ଚଳ ହୋଇଉଠେ ଚାଷୀପୁଅ ଘର । ଚଳିତ ବର୍ଷ ମହା ଆନନ୍ଦର ସହ ଚାଷାପୁଅ ପାଳନ କରୁଛି ଅକ୍ଷୟ ତୃତୀୟାକୁ। ଟ୍ରାକ୍ଟର, ପାୱାର ଟ୍ରିଲର ଭଳି ଯନ୍ତ୍ରଚଳିତ ଆଧୁନିକ ଯୁଗରେ ଭୁଲିନାହିଁ ହଳବଳଦ ଚାଷକୁ।
ଏଭଳି ଦୃଶ୍ୟଦେଖିବାକୁ ମିଳିଛି କଟକ ଜିଲ୍ଲା ସାଲେପୁର ଗୋପୀନାଥପୁର ଠାରେ। କିମ୍ବଦନ୍ତୀ ଅନୁସାରେ ଆଜିର ଦିନରେ ଜଗନ୍ନାଥ ମହାପ୍ରଭୁଙ୍କ ରଥଯାତ୍ରା ପାଇଁ କାଠ ଅନୁକୂଳ ହୋଇଥାଏ। ଆଉ ଚନ୍ଦନ ଯାତ୍ରା ଆରମ୍ଭ ସାଙ୍ଗକୁ ମହାଲକ୍ଷ୍ମୀଙ୍କ ଅମାହାରରୁ ଧାନ ଆସି ଚାଷ ପାଇଁ କ୍ଷେତରେ ଅନୁକୂଳ କରାଯାଇଥାଏ।
ଅମାହାରରୁ ଧାନ ଆସି ପାଳନ କରାଯାଇଥାଏ ଅଖିମୁଠି। ସକାଳୁ ସକାଳୁ ଚଷାପୁଅ ଉଠି ନିଜର ନିତ୍ୟକର୍ମ ସାରି ଆଖିମୁଠି ପାଇଁ ପ୍ରସ୍ତୁତିରେ ଲାଗିପଡ଼େ। ଘରର ଗୃହିଣୀ ରୀତିନୀତିରେ ପୂଜାର୍ଚ୍ଚନା କରି ବେତ ଟୋକେଇ, ଧାନ ଗୌଣି, ନବ ଶୁକ୍ଳ ଵସ୍ତ୍ର ଓ ସେଥିରେ ଅମାହାରରୁ ଧାନ ଆଣି ଚଷା ପୁଅ କାନ୍ଧକୁ ଟେକିଦେଇଥାଏ ଅଖିମୁଠି ପାଇଁ।
ଚଷାପୁଅ ଆନନ୍ଦରେ ନେଇଯାଇଥାଏ ଆଖିମୁଠି ଅନୁକୂଳ କରିବା ପାଇଁ। ଆଉ ପ୍ରସ୍ତୁତ କରିଥିବା କ୍ଷେତରେ ଅଖିମୁଠିକୁ ପୂଜାର୍ଚ୍ଚନା କରିବା ପରେ ଆରମ୍ଭ କରିଥାଏ ହଳ ଲଙ୍ଗଳ ବଳଦ ସାହାର୍ଯ୍ୟରେ ଚାଷକାମ। କୃଷିଭିତ୍ତିକ ପର୍ବ ଅକ୍ଷୟତୃତୀୟାକୁ ଏବର୍ଷ ଆନନ୍ଦର ସହ ପାଳନକରି ବେଶ ଖୁସି ମାନଉଛନ୍ତି ଚଷାପୁଅ।