ନୂଆଦିଲ୍ଲୀ ୧୦।୫: ଭାରତ-ପାକିସ୍ତାନ ଉତ୍ତେଜନା ଚରମସୀମାରେ ପହଞ୍ଚିବା ପରେ ୮ ମେ ଗୁରୁବାର ପାକିସ୍ତାନ ଲଗାତାର ଡ୍ରୋନ ଓ କ୍ଷେପଣାସ୍ତ୍ର ଆକ୍ରମଣ କରିଥିଲା। ଏହି ଆକ୍ରମଣକୁ ଭାରତୀୟ ସେନା ଆକାଶ ଏୟାର ଡିଫେନ୍ସ ପ୍ରଣାଳୀରେ ବିଫଳ କରିଥିଲା। ସ୍ୱଦେଶୀ ଏୟାର ଡିଫେନ୍ସ ସିଷ୍ଟମ ଆକାଶ ଭୂ-ପୃଷ୍ଠରୁ ଆକାଶକୁ ନିକ୍ଷେପିତ ହେଉଥିବା ପ୍ରଣାଳୀ, ଏହା ଦ୍ୱାରା ଏକ ସଙ୍ଗରେ ଅନେକ ଲକ୍ଷ୍ୟକୁ ଭେଦ କରିବା ପାଇଁ ଡିଜାଇନ କରାଯାଇଛି। ଆକାଶ ସିଷ୍ଟମକୁ ଡିଆରଡିଓର ପୂର୍ବତନ ବୈଜ୍ଞାନିକ ଡ. ପ୍ରହଲାଦ ରାମାରାଓ ୧୫ ବର୍ଷର କଠିନ ପରିଶ୍ରମରେ ବିକଶିତ କରିଥିଲେ।
ପାକିସ୍ତାନ ସହ ଉତ୍ତେଜନାରେ ଏହି ଏୟାର ଡିଫେନ୍ସ ସିଷ୍ଟମ ସଠିକ କାମ କରିବା ଓ ପ୍ରତ୍ୟେକ ଲକ୍ଷ୍ୟକୁ ନଷ୍ଟ କରିବା ଡ.ରାମାରାଓଙ୍କୁ ଅତ୍ୟନ୍ତ ଆନନ୍ଦିତ କରିଥିଲା। ଏହି ଡିଫେନ୍ସ ସିଷ୍ଟମର ସଫଳତା ତାଙ୍କ ଜୀବନର ସବୁଠୁ ଖୁସିର ଦିନ ମଧ୍ୟରେ ଗୋଟିଏ ଥିଲା ବୋଲି ସେ କହିଛନ୍ତି। ସେ କହିଛନ୍ତି ଯେ ମୋର ମାନସ ସନ୍ତାନ ଶତ୍ରୁର ଆକାଶୀୟ ଲକ୍ଷ୍ୟକୁ ଏତେ ସଠିକତାର ସହ ଖୁବ୍ ସୁନ୍ଦର ଭାବେ ନଷ୍ଟ କରୁଛି ଦେଖି ମୁଁ ଖୁବ୍ ଆନନ୍ଦିତ ହୋଇଥିଲି। ମୁଁ ଦେଖିଲି ଏହା ମୋ ଆଶା ଠାରୁ ମଧ୍ୟ ଅଧିକ ସଠିକ ଭାବେ କାମ କରୁଛି। ଏହା ଟାର୍ଗେଟକୁ ପ୍ରଭାବୀ ଢଙ୍ଗରେ ନଷ୍ଟ କରୁଥିବା ଦେଖି ମୋ ଆଖି ଛଳଛଳ ହୋଇ ଯାଇଥିଲା।
୭୮ ବର୍ଷ ବୟଷ୍କ ଡ. ପ୍ରହଲାଦ ରାମାରାଓ କହିଛନ୍ତି ଯେ ସେ ସମୟରେ ସେ ଆକାଶ ପ୍ରୋଗ୍ରାମର ସବୁଠୁ କମ ବୟଷ୍କ ପ୍ରକଳ୍ପ ନିର୍ଦ୍ଦେଶକ ଥିଲେ। ଭାରତର ମିସାଇଲ ମ୍ୟାନ ନାମରେ ବିଖ୍ୟାତ ଡ. ଏ.ପି.ଜେ. ଅବଦୁଲ କାଲାମ ତାଙ୍କୁ ଏହି କାମ ପାଇଁ ବାଛିଥିଲେ। ଡ. ପ୍ରହଲାଦ ରାମାରାଓ କହିଛନ୍ତି ଯେ ପ୍ରଥମେ ଭାରତୀୟ ସେନା ଏହି ଡିଫେନ୍ସ ସିଷ୍ଟମ ନେବାକୁ ଆଗପଛ ହୋଇଥିଲା, ଯାହାକୁ ଡ.ରାମାରାଓ ଓ ତାଙ୍କ ସହଯୋଗୀମାନେ ଭବିଷ୍ୟତର ଡ୍ରୋନ, କ୍ଷେପଣାସ୍ତ୍ର, ହେଲିକପ୍ଟର ଓ ଏପରିକି ଆମେରିକା ନିର୍ମିତ ସୁପରସୋନିକ ଏଫ-୧୬ ଭଳି ଅତ୍ୟାଧିକ ଗତିଶୀଳ ଯୁଦ୍ଧାସ୍ତ୍ରଙ୍କୁ ରୋକିବା ଲାଗି ଡିଜାଇନ କରିଥିଲେ।
ଆକାଶ ମିସାଇଲ ଡିଫେନ୍ସ ସିଷ୍ଟମ କ’ଣ?
ଆକାଶ ମିସାଇଲ ଡିଫେନସ ସିଷ୍ଟମକୁ ହାଇଦ୍ରାବାଦର ଭାରତ ଡାୟନେମିକ୍ସ ଲିମିଟେଡ ତିଆରି କରିଛି। ଏହା ସରଫେସ ଟୁ ଏୟାର ମିସାଇଲ ଡିଫେନ୍ସ ସିଷ୍ଟମ, ଯାହା ଆକାଶୀୟ ବିପଦରୁ ସୁରକ୍ଷା ଦେଇଥାଏ। ଏହା ଏକ ସମୟରେ ଅନେକ ଲକ୍ଷ୍ୟକୁ ଅଥବା ସ୍ୱାୟତଭାବେ କୌଣସି ଟାର୍ଗେଟକୁ ଭେଦକରିପାରେ। ଏଥିରେ ବିଲ୍ଟ ଇନ କାଉଣ୍ଟର ଉପାୟ ରହିଛି ଓ ପୁରା ପ୍ରଣାଳୀକୁ ମୋବାଇଲ ପ୍ଲାଟଫର୍ମରେ କନଫିଗର କରାଯାଇଛି। ଯାହା ଫଳରେ ସେନା ପାଇଁ ଏହା ଅତ୍ୟଧିକ କୁଶଳ ଓ ଶକ୍ତିଶାଳୀ ହୋଇପାରିଛି।
ଆକାଶ ସିଷ୍ଟମ ୨୦ କିଲୋମିଟର ଉଚ୍ଚତାରେ ଲକ୍ଷ୍ୟକୁ ଟାର୍ଗେଟ୍ କରିପାରେ। ଏହାର ପ୍ରତ୍ୟେକ ଲଞ୍ଚରରେ ୩ଟି ମିସାଇଲ ଥାଏ। ଏହା ଫାୟର ଆଣ୍ଡ ଫର୍ଗେଟ ମୋଡରେ କାମ କରିଥାଏ। ଆକାଶ ସିଷ୍ଟମକୁ ୬ ହଜାର କୋଟି ଟଙ୍କାରେ ଆର୍ମେନିୟାକୁ ରପ୍ତାନୀ କରାଯାଇଥିଲା। ଡ. ରାମାରାଓ କହିଛନ୍ତି ଯେ ଏହି ମିସାଇଲ ଡିଫେନ୍ସ ସିଷ୍ଟମ ଲାଗି ତାଙ୍କର ଟ୍ୟାଗ୍ ଲାଇନ ଥିଲା ‘ସାରା ଆକାଶ ହମାରା ହୈ’, ଯାହା ତାର ନିର୍ମାଣର ଉଦ୍ଦେଶ୍ୟକୁ ସଫଳ କରିଛି।
