ଶୁଭମନ ଗିଲ୍‌ଙ୍କ ପ୍ରଥମ ପସନ୍ଦ ନୁହନ୍ତି ମହମ୍ମଦ ଶାମି, ଚୟନକର୍ତ୍ତାଙ୍କ ଉପରେ ଛାଡ଼ି ଦେଲେ ଦାୟିତ୍ଵ

କୋଲକାତା: ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଆସନ୍ତାକାଲି ଐତିହାସିକ ଇଡେନ ଗାର୍ଡେନରେ ଖେଳାଯିବ ପ୍ରଥମ ଟେଷ୍ଟ। ସିରିଜ୍ ପାଇଁ ଦୁଇ ଦଳ ପ୍ରସ୍ତୁତ। ଏହା ପୂର୍ବରୁ ଗୁରୁବାର ଆୟୋଜିତ ସାମ୍ବାଦିକ ସମ୍ମିଳନୀରେ ବଡ଼ ବୟାନ ଦେଇଛନ୍ତି ଭାରତୀୟ ଟେଷ୍ଟ ଦଳର ଅଧିନାୟକ ଶୁଭମନ ଗିଲ୍। ସେ କହିଛନ୍ତି ଆଗାମୀ ଦକ୍ଷିଣ ଆଫ୍ରିକା ଟେଷ୍ଟ ସିରିଜ୍ ପାଇଁ ଚୟନ ଦଳରୁ ମହମ୍ମଦ ଶାମିଙ୍କୁ ବାହାରେ ରଖିବା ମୁସ୍କିଲ ନିଷ୍ପତ୍ତି ଥିଲା।

ଗିଲ୍ ନିଜ ବୟାନରେ ଯୁବ ଦ୍ରୁତ ବୋଲରଙ୍କ ଦମଦାର ପ୍ରଦର୍ଶନ ଓ ଭବିଷ୍ୟତ ଯୋଜନା ଉପରେ ଗୁରୁତ୍ଵାରୋପ କରିଛନ୍ତି। ଏଥିରୁ ସଙ୍କେତ ମିଳିଛି ଯେ, ଶାମିଙ୍କ ଟେଷ୍ଟ କ୍ୟାରିୟର ଅସ୍ତଗାମୀ ହେବାକୁ ଯାଉଛି। ଦକ୍ଷିଣ ଆଫ୍ରିକା ବିପକ୍ଷ ଦୁଇ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ପାଇଁ ଚୟନ ଦଳରେ ମହମ୍ମଦ ଶାମିଙ୍କୁ ସାମିଲ୍ କରା ନ ଯିବା ନେଇ ବିତର୍କ ହୋଇଥିଲା। ଅନ୍ୟପଟେ ଏହି ଅନୁଭବୀ ଦ୍ରୁତ ବୋଲର ପଶ୍ଚିମବଙ୍ଗ ପାଇଁ ରଣଜୀ ଟ୍ରଫିରେ ଦମଦାର ପ୍ରଦର୍ଶନ କରିଥିଲେ। ଗିଲ୍ କହିଛନ୍ତି ଶାମିଙ୍କ ପରି କୁଶଳୀ ଅନୁଭବୀ ଦ୍ରୁତ ବୋଲରଙ୍କ ଚୟନ ନ ହୋଇ ପାରିବ ସର୍ବଦା ମୁସ୍କିଲ ରହିଥାଏ।

ଭାରତ ଅଧିନାୟକ ଗିଲ୍ କହିଛନ୍ତି, ଅଧିକାଂଶ ବୋଲର ତାଙ୍କ ସ୍ତରର ନୁହନ୍ତି। ମାତ୍ର ଯେଉଁ ବୋଲର ଏବେ ଖେଳୁଛନ୍ତି ସେମାନେ ବି ଦମଦାର ପ୍ରଦର୍ଶନ କରିଛନ୍ତି। କେବେ କେବେ ଶାମି ଭାଇଙ୍କ ପରି ଖେଳାଳିଙ୍କୁ ଦଳରୁ ବାହାରେ ରଖିବା ମୁସ୍କିଲ ହୋଇଥାଏ। ଚୟନକର୍ତ୍ତା ହିଁ ଆପଣଙ୍କୁ ଏଥିରୁ ଆହୁରି ଭଲ ଉତ୍ତର ଦେଇ ପାରିବେ।

ମହମ୍ମଦ ଶାମି ଚଳିତ ରଣଜୀ ସିଜିନର ପ୍ରଥମ ଦୁଇଟି ଟେଷ୍ଟରେ ଦମଦାର ପ୍ରଦର୍ଶନ କରି ୧୫ ଓ୍ଵିକେଟ୍ ନେଇଥିଲେ। ଏହା ସତ୍ତ୍ଵେ ତାଙ୍କୁ ଅଣଦେଖା କରାଯାଇଛି। ଶାମି ନିକଟରେ ତାଙ୍କ ଫିଟନେସ୍କୁ ନେଇ ଉଠୁଥିବା ପ୍ରଶ୍ନ ଉପରେ ମୁହଁତୋଡ଼ ଜବାବ ଦେଇଥିଲେ। ଚୟନକର୍ତ୍ତାଙ୍କୁ ମଧ୍ୟ ଟାର୍ଗେଟ୍ କରିଥିଲେ। କାରଣ ଚୟନକର୍ତ୍ତା ଦକ୍ଷିଣ ଆଫ୍ରିକା ବିପକ୍ଷ ଟେଷ୍ଟ ସିରିଜ୍ ପାଇଁ ତାଙ୍କୁ ଦଳରେ ଅଣଦେଖା କରିଥିଲେ। ଶାମି ଶେଷ ଥର ଚଳିତ ବର୍ଷ ମାର୍ଚ୍ଚରେ ଭାରତ ପକ୍ଷରୁ ଚାମ୍ପିଅନ୍ସ ଟ୍ରଫି ଖେଳିଥିଲେ।