ଜର୍ମାନୀରେ ବଡ ଧରଣର ବିକ୍ଷୋଭ, ରାସ୍ତାକୁ ଓହ୍ଲାଇଲେ ୩୦ ହଜାର ଯୁବକ

ବର୍ଲିନ, ୩୦/୧୧: ଜର୍ମାନୀରେ ବଡ ଧରଣର ବିକ୍ଷୋଭ । ଏଏଫଡି ବା ଅଲଟରନେଟ୍ ଫର୍ ଜର୍ମାନୀ ପାର୍ଟିର ଯୁବ ସମ୍ମିଳନୀ ପୂର୍ବରୁ ଦେଶରେ ଏତେ ବଡ ବିକ୍ଷୋଭ ଚିନ୍ତାର କାରଣ ପାଲଟିଛି । ଯାହାର ଫଟୋ ସୋସିଆଲ ମିଡିଆରେ ଭାଇରାଲ ହେଉଛି । କେତେକ ସ୍ଥାନରେ ବିକ୍ଷୋଭକାରୀ ଏବଂ ପୋଲିସ ମୁହାଁମୁହିଁ ହୋଇଛନ୍ତି । ଅନେକ ସ୍ଥାନରେ ଗମନାଗମନ ବାଧାପ୍ରାପ୍ତ ହେବା ସହ ବିପୁଳ ପରିମାଣରେ ଫୋର୍ସ ମୁତୟନ ହୋଇଛନ୍ତି ।

ସ୍ଥାନୀୟ ଅଧିକାରୀଙ୍କ କହିବାନୁସାରେ ପ୍ରଦର୍ଶନରେ ୨୦ରୁ ୩୦ ହଜାର ଯୁବକ ସାମିଲ ହୋଇଛନ୍ତି । ଜାଇସେନ୍ ସହରରେ ପ୍ରତିବାଦ ଏବଂ ଶୋଭାଯାତ୍ରା କାରଣରୁ ଅନେକ ସ୍ଥାନରେ ଟ୍ରାଫିକ୍ ଜାମ୍ ଲାଗିଛି । ଟ୍ରେନ୍ ଚଳାଚଳ ମଧ୍ୟ ବାଧାପ୍ରାପ୍ତ ହୋଇଛି । ପ୍ରଦର୍ଶନକାରୀଙ୍କ କହିବାନୁସାରେ, ଏଏଫଡି ନିଜ ନୀତି ନିୟମ ଏବଂ ଯୁବ ସଙ୍ଗଠନ ଦ୍ୱାରା ଦେଶରେ କଠୋର ଦକ୍ଷିଣପନ୍ଥୀକୁ ପ୍ରୋତ୍ସାହନ ଦେବ । ଯାହା ଜର୍ମାନୀର ଗଣତନ୍ତ୍ର ପାଇଁ ବିପଦ ସୃଷ୍ଟି କରିବ ।

ବିକ୍ଷୋଭ ଆରମ୍ଭ ସମୟରେ ପ୍ରଥମେ ପୋଲିସ ଶାନ୍ତି ରକ୍ଷା ପାଇଁ ଅପିଲ କରିଥିଲା । କିନ୍ତୁ ସ୍ଥିତି ନିୟନ୍ତ୍ରଣ ବାହାରକୁ ଚାଲିଯାଇଥିଲା । ଫଳରେ ବ୍ୟାରିକେଡ୍ ଲଗାଇ ବଳ ପ୍ରୟୋଗ କରାଯାଇଥିଲା । ଅନେକ ବ୍ୟକ୍ତି ଜାଣିଶୁଣି ହିଂସା ସୃଷ୍ଟି କରୁଥିବା ପୋଲିସ କହିଛି ।

ସୂଚନାଯୋଗ୍ୟ, ଏଏଫଡିର ନୂଆ ଯୁବସଙ୍ଘ ଛାତ୍ରସ୍ତରରୁ ଦଳକୁ ଶକ୍ତିଶାଳୀ କରିବା ପାଇଁ ଚେଷ୍ଟା କରୁଛି । ଏହାଦ୍ୱାରା ଦେଶରେ ଦକ୍ଷିଣପନ୍ଥୀ ଚିନ୍ତାଧାରା ବଢିପାରେ । ଯାହାକୁ ସେଠାକାର ଅନେକ ବ୍ୟକ୍ତି ବିରୋଧ କରି ଆସୁଛନ୍ତି । କାରଣ ଏଏଫଡି ନାଜିବାଦୀର କଥା କହେ । ଦଳର ନେତା ପୂର୍ବରୁ ଭେଦଭାବକୁ ସମର୍ଥନ କରି ବୟାନବାଜି କରିଛନ୍ତି । ଯାହା ଜର୍ମାନୀବାସୀଙ୍କୁ ପସନ୍ଦ ଆସିନି ।