ପୁଣି ଭାରତ ଆସିବ ମେଡ୍ ଇନ୍ ଚାଇନା ସାମଗ୍ରୀ: ଆମଦାନୀ ପାଇଁ ପ୍ରକ୍ରିୟା ଆରମ୍ଭ କଲେ ଭାରତ ସରକାର

ନୂଆଦିଲ୍ଲୀ: ପୁଣି ଚୀନରୁ ଆମଦାନୀ କରିବ ଭାରତ। ଚୀନ୍ ଏବଂ ଅନ୍ୟାନ୍ୟ ଦେଶରୁ ବିଭିନ୍ନ ସାମଗ୍ରୀ ଆମଦାନୀ ପାଇଁ ଅନୁମୋଦନ ପ୍ରକ୍ରିୟାକୁ ତ୍ୱରାନ୍ୱିତ କରିବାକୁ ଯାଉଛନ୍ତି ଭାରତ ସରକାର। ବେଜିଂ ସହିତ ସମ୍ପର୍କରେ ଉନ୍ନତି ଏବଂ ସମ୍ପ୍ରତି ଜିଏସ୍‌ଟି ହ୍ରାସ ଯୋଗୁ ଉପଭୋକ୍ତା ସାମଗ୍ରୀର ଚାହିଦା ବୃଦ୍ଧି ପାଇବା ପରେ ଏହି ପଦକ୍ଷେପ ନିଆଯାଇଛି। ଭାରତକୁ ରପ୍ତାନି ବୃଦ୍ଧି କରିବା ପାଇଁ ସରକାର ଚୀନ୍ ଏବଂ ଅନ୍ୟାନ୍ୟ ସ୍ଥାନରେ ଥିବା ପ୍ଲାଣ୍ଟଗୁଡ଼ିକ ପାଇଁ ବାଧ୍ୟତାମୂଳକ ପ୍ରମାଣପତ୍ର ଜାରି କରିବାକୁ ଲକ୍ଷ୍ୟ ରଖିଛନ୍ତି। କରୋନା ଓ ଲଦାଖ ସଂଘର୍ଷ ପରେ ଚୀନରୁ ଆମଦାନୀ ଉପରେ କଟକଣା ଲଗାଇଥିଲେ ଭାରତ ସରକାର। ହେଲେ ଏବେ ଦୁଇ ଦେଶ ମଧ୍ୟ ସମ୍ପର୍କ ଧୀରେଧୀରେ ସୁଧୁରିବା ପରେ ପୁଣିଥରେ ଚୀନରୁ ଆମଦାନୀ ବଢିବ। 

ଚୀନ୍ ଏବଂ ଅନ୍ୟାନ୍ୟ ଦେଶରୁ ଇଲେକ୍ଟ୍ରୋନିକ୍ସ ପାର୍ଟସ୍, ଜୋତା, ଦୈନନ୍ଦିନ ବ୍ୟବହାରର ଘରୋଇ ଜିନିଷ, ଇସ୍ପାତ ଉତ୍ପାଦ, କଞ୍ଚାମାଲ ଏବଂ ଅନ୍ୟାନ୍ୟ ସାମଗ୍ରୀ ଆମଦାନୀ କରିବା ପାଇଁ ସ୍ଥାନୀୟ କମ୍ପାନୀଗୁଡ଼ିକ ଆବେଦନ କରିଥିଲେ। ଭାରତ ସରକାର ଏବେ ସେହି ଆବେଦନଗୁଡ଼ିକର ଶୀଘ୍ର ସମାଧାନ କରିବାକୁ ଯୋଜନା କରୁଛି। ୨୦୨୦ ପ୍ରାରମ୍ଭରେ ସୀମା ସଂଘର୍ଷ ପରେ ଚୀନ୍ ସହିତ ସମ୍ପର୍କ ଖରାପ ହେବା ପରେ ଭାରତ ଏପରି ଆମଦାନୀକୁ ଅନୁମୋଦନ କରିବା ବନ୍ଦ କରିଦେଇଥିଲା।

ଶିଳ୍ପ ଏବଂ ଆଭ୍ୟନ୍ତରୀଣ ବାଣିଜ୍ୟ ପ୍ରୋତ୍ସାହନ ବିଭାଗ (DPIIT) ବିଦେଶୀ ନିର୍ମାତାଙ୍କ ପ୍ରମାଣପତ୍ର ଯୋଜନାରେ ବିଳମ୍ବ ବିଷୟରେ ବିବରଣୀ ପ୍ରଦାନ କରିବାକୁ ନିର୍ମାତାମାନଙ୍କୁ ଅନୁରୋଧ କରିଛି। ଏହି ଅନୁରୋଧ ପତ୍ର ଶିଳ୍ପ ସଂସ୍ଥା ଏବଂ ସଂଘଗୁଡ଼ିକୁ ପଠାଯାଇଛି। ଆମଦାନୀ ପ୍ରକ୍ରିୟାକୁ ସୁଗମ କରିବା ପାଇଁ ଏକ ବ୍ୟାପକ ପ୍ରୟାସ ବୋଲି କୁହାଯାଉଛି।
ଖୁବଶୀଘ୍ର ଚୀନ୍ ସମେତ ଏକାଧିକ ଦେଶର ସପ୍ଲାୟରମାନଙ୍କ ପାଇଁ ଲାଇସେନ୍ସ ପ୍ରଦାନ ଏବଂ ନବୀକରଣ ଆରମ୍ଭ କରିବୁ ବୋଲି ଏନେଇ ଜଣେ ବରିଷ୍ଠ ସରକାରୀ ଅଧିକାରୀ ଗଣମାଧ୍ୟମକୁ କହିଛନ୍ତି। ଜିଏସ୍‌ଟି ହ୍ରାସ ପରେ ସାମଗ୍ରୀଗୁଡ଼ିକ ଶସ୍ତା ହେବା ଓ ଫେଷ୍ଟିଭ ସିଜନରେ ଚାହିଦା ବଢ଼ିବା ଯୋଗୁ ସାମଗ୍ରୀଗୁଡ଼ିକର ଷ୍ଟକ ଶେଷ ହେବା ପରେ କମ୍ପାନୀଗୁଡ଼ିକ ଗ୍ରାହକଙ୍କୁ ସାମଗ୍ରୀ ଯୋଗାଇପାରୁ ନାହାନ୍ତି। ତେଣୁ ଘରୋଇ ଶିଳ୍ପଗୁଡ଼ିକୁ ସାହାଯ୍ୟ କରିବା ଉପରେ ସରକାର ଗୁରୁତ୍ୱ ଦେଉଛନ୍ତି।
ସେପ୍ଟେମ୍ବର ୨୨ରୁ କମ୍ପାନୀଗୁଡ଼ିକ ଟିକସ ଲାଭ ପ୍ରଦାନ କରିବା ପରେ ଅଟୋମୋବାଇଲ୍ ଏବଂ ଇଲେକ୍ଟ୍ରୋନିକ୍ସ ଭଳି ଜିନିଷଗୁଡ଼ିକର ବିକ୍ରୟ ବୃଦ୍ଧି ପାଇଛି। ବଡ଼ ସ୍କ୍ରିନ୍ ଟିଭି ଏବଂ ଡିସୱାସର ଭଳି ପ୍ରିମିୟମ୍ ଇଲେକ୍ଟ୍ରୋନିକ୍ସ ପାଇଁ ଗ୍ରାହକଙ୍କ ଅପେକ୍ଷା ରହିଛି। ଯାହା ସମାଧାନ ହେବାକୁ ସପ୍ତାହେ ସମୟ ଲାଗିପାରେ।