ଭଦ୍ରକ: ଧାନକିଣା ସମୟରେ ହେଉଥିବା କଟନି ଛଟନିର ସତ୍ୟାସତ୍ୟ ଜାଣିବା ପାଇଁ ଚାଷୀ ବେଶରେ ବୁଲିଲେ ଭଦ୍ରକ ଜିଲ୍ଲାପାଳ। ଆଉ ଅନିୟମିତତାର ପ୍ରମାଣ ପାଇବା ପରେ ନେଲେ କାର୍ଯ୍ୟାନୁଷ୍ଠାନ। ଧାନ କିଣା ଦାୟିତ୍ୱରୁ ବିଦା ହେଲେ ମଣ୍ଡି ସମ୍ପାଦକ । ଚାଷୀଙ୍କ ଠାରୁ ଧାନ କିଣା ସମୟରେ କଟନି ଛଟନି କରୁଥିବାରୁ କଟସାହି ସମବାୟ ସମିତି ସହକାରୀ ସମ୍ପାଦକ ବିନୟ ଦଳାଇଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନେବା ସହ ତାଙ୍କୁ ଏହି ଦାୟିତ୍ବରୁ ବିଦା କଲେ ଜିଲ୍ଲାପାଳ।  

ସୂଚନାଥାଉକି, ସୋମବାର ଚାଷୀ ବେଶରେ ଭଦ୍ରକ ଜିଲ୍ଲାପାଳ ଦିଲୀପ ରାଉତରାଏ ଧାମନଗର ବ୍ଲକର କଟ ସାହି ମଣ୍ଡି ପରିଦର୍ଶନ କରିଥିଲେ। ଏଠାରେ ସରକାରୀ ଦରରେ ଧାନ କିଣା ବ୍ୟବସ୍ଥା ଓ ପରିଚାଳନା ସଠିକ୍ ଢଙ୍ଗରେ ହେଉଛି କି’ ତାହା ପରଖିଥିଲେ। ହେଲେ ଏହି ସମୟରେ ଧାନ କିଣା ସମୟରେ କଟନି ଛଟନି ସହ ଅନିୟମିତତାର ପ୍ରମାଣ ପାଇଥିଲେ।

ସେହି ଆଧାରରେ ୪୮ ଘଣ୍ଟା ମଧ୍ୟରେ ଉତ୍ତର ଦେବା ପାଇଁ ମଣ୍ଡି ସମ୍ପାଦକଙ୍କୁ କାରଣ ଦର୍ଶାଅ ନୋଟିସ୍ ଜାରି କରାଯାଇଥିଲା। ହେଲେ ସନ୍ତୋଷ ଜନକ ଉତ୍ତର ନ ମିଳିବାରୁ ଜିଲ୍ଲା ପ୍ରଶାସନ ଦ୍ବାରା ତାଙ୍କୁ ଧାନ କିଣା କାର୍ଯ୍ୟରୁ ବିରତ କରାଯାଇଛି । କଟ ସାହି ମଣ୍ଡି ଦାୟିତ୍ଵ ରେ ଥିବା ଭlରପ୍ରlପ୍ତ ତଥା ଧାନ କ୍ରୟ ଅଧିକାରୀ ସହକାରୀ ସମ୍ପାଦକ ବିନୟ କୁମାର ଦଳାଇଙ୍କୁ ଧାନ କିଣା ଦାୟିତ୍ଵରୁ ବିଦା କରାଯାଇ ଅନ୍ୟାଦେଶ ପର୍ଯ୍ୟନ୍ତ ଜିଲ୍ଲା ଉପନିବନ୍ଧକ କାର୍ଯ୍ୟାଳୟରେ ଉପସ୍ଥିତ ହେବାକୁ ପାଇଁ ନିର୍ଦ୍ଦେଶ ଦିଆଯାଇଛି ।