ଶବ ପୋତାହେବ ନା ପୋଡାହବ? ପୁଅ ଖ୍ରୀଷ୍ଟ ଧର୍ମ ଗ୍ରହଣ କରିଥିବାରୁ ହୋଇପାରୁନି ସତ୍କାର

ଜଳେଶ୍ୱର ୦୯/୦୧: ଧର୍ମାନ୍ତରୀକରଣ ଭେଦଭାବ ହେଲା କାଳ । ଗତ ବୁଧବାର ରାତିରୁ ଘରେ ପଡ଼ିରହିଛି ବୃଦ୍ଧଙ୍କ ମୃତଦେହ । ଦୁଇ ପୁଅଙ୍କ ଟଣା ଓଟରା ଯୋଗୁଁ ହୋଇ ପାରୁନି ଶବ ସତ୍କାର । ରାଇବଣିଆ ଥାନା ରଙ୍ଗାମାଟିଆ ଗାଁ ରୁ ଆସିଛି ଅଭାବନୀୟ ଦୃଶ୍ୟ । ସାନ ପୁଅ କ୍ଷ୍ରୀଷ୍ଟ ଧର୍ମ ଗ୍ରହଣ କରିଥିବାରୁ ବାପାଙ୍କ ଶବ ନିଜ ବାଡ଼ିରେ ପୋତିବା ପାଇଁ ଦାବି କରୁଥିବି ବେଳେ ପୋଡିବା ପାଇଁ ବଡ଼ପୁଅ ଜିଦ୍ କରିବାରୁ ହୋଇ ପାରୁନି ଶବ ସତ୍କାର । ଏହା ଭିତରେ ବିତିଗଲାଣି ଅନେକ ସମୟ, ତଥାପି ବାହାରିପାରୁନି ସମାଧାନ । ପୁଅ ଖ୍ରୀଷ୍ଟଧର୍ମ ଅନୁଯାୟୀ କବର ଦେବାକୁ ଜିଦ୍ ଧରିବାରୁ ଗ୍ରାମବାସୀ ବିରୋଧ କରୁଛନ୍ତି ।

ରାଇବଣିଆ ଥାନା ଅନ୍ତର୍ଗତ କାଳିକ ପଞ୍ଚାୟତ ରଙ୍ଗାମାଟିଆ ଗାଁର ଛୁଟା ହାଁସଦାଙ୍କର ଗତ ବୁଧବାର ମଧ୍ୟରାତ୍ରିରେ ମୃତ୍ୟୁ ହୋଇଛି । ସାନ ପୁଅ ଭୀମ ହାଁସଦାଙ୍କ ପରିବାର ଖ୍ରୀଷ୍ଟ ଧର୍ମ ଗ୍ରହଣ କରିଛନ୍ତି । ସେ ନିଜ ବାପାଙ୍କୁ ବାଡ଼ିରେ କବର ଦେବା ଓ ଖ୍ରୀଷ୍ଟ ଧର୍ମ ଅନୁଯାୟୀ ଅନ୍ତ୍ୟେଷ୍ଟି କ୍ରିୟା କରିବେ ବୋଲି କହିବାରୁ ସାନ୍ତାଳ ସମ୍ପ୍ରଦାୟର ଗ୍ରାମସଭା ସଭାପତି ମାସାଂଗ ହାଁସଦା, ସୋମରାୟ ହାଁସଦା, ମୋହନ ମାରାଣ୍ଡି, ବିରାମ ସୋରେନ, ରଳିଆ ମୁର୍ମୁ, ନାଇକେ ବାବା, ମଙ୍ଗଲ ମାଝୀଙ୍କ ସହ ଅନ୍ୟାନ୍ୟ କିଛି ଲୋକ ବିରୋଧ କରିଥିଲେ ।

ଏହାକୁ ନେଇ ଭୀମ ହାଁସଦା ରାଇବଣିଆ ଥାନାର ଦ୍ୱାରସ୍ଥ ହୋଇଥିଲେ । ଥାନାରୁ ଫେରି ନିଜ ବାଡ଼ିରେ କବର ଦେବାର ପ୍ରଶାସନଠୁ ଅନୁମତି ପାଇଁ ଘରବାଡ଼ି ପ୍ରମାଣପତ୍ର ନକଲ ଓଲମରା ରାଜସ୍ୱ ଅଧିକାରୀଙ୍କୁ ମଧ୍ୟ ପଠାଇଥିଲେ ବୋଲି ପରିବାର ପକ୍ଷରୁ ସୂଚନା ମିଳିଛି । ମୃତ ବୃଦ୍ଧଙ୍କ ସ୍ତ୍ରୀ ସ୍ୱର୍ଗତ ମାନକୀ ଦୁଇଟି ବିବାହ କରିଛନ୍ତି ।

ପ୍ରଥମ ସ୍ୱାମୀଙ୍କର ୩ ପୁଅ ମଧ୍ୟରୁ ଦୁଇ ପୁଅଙ୍କ ମୃତ୍ୟୁ ହୋଇଯାଇଛି । ସାନ ପୁଅ ସାନ ବାପାଙ୍କ କବରକୁ ବିରୋଧ କରୁଛନ୍ତି । ସନ୍ଧ୍ୟାରେ ଜଳେଶ୍ୱର ଏସଡିପିଓ ସୁବ୍ରତ କୁମାର ବେହେରା, ରାଇବଣିଆ ଥାନା ଆଇଆଇସି ଚମ୍ପାବତୀ ସୋରେନ ସଦଳବଳ ପହଞ୍ଚି ଉଭୟଙ୍କୁ ବୁଝାଶୁଝା କରିବା ସତ୍ତ୍ୱେ କୌଣସି ସମାଧାନ ହୋଇ ନ ଥିଲା ।