ନେପାଳରେ ପୁଣି ଜେନ ‘Z’ ବିକ୍ଷୋଭ, ଭିଡକୁ ଘଉଡାଇବାକୁ ଲୁହବୁହା ବାସ୍ପ ପ୍ରୟୋଗ କଲା ପୋଲିସ

କାଠମାଂଡୁ ୨୦।୧୧: ନେପାଳରେ ପୁଣି ଯୁବକଙ୍କ ବିରୋଧ ‘ଜେନ-ଜେଡ’ ଆରମ୍ଭ ହୋଇଯାଇଛି। ଏଣୁ ଦେଶର ଅନେକ ଅଞ୍ଚଳରେ ଉତ୍ତେଜନା ଦେଖା ଦେଇଛି। ବଢୁଥିବା ବିରୋଧକୁ ଦୃଷ୍ଟିରେ ରଖି ପ୍ରଶାସନ ଗୁରୁବାର ସମ୍ବେଦନଶୀଳ ଅଞ୍ଚଳରେ କର୍ଫ୍ୟୁ ଜାରି କରିଛି। ‘କାଠମାଂଡୁ ପୋଷ୍ଟ’ ରିପୋର୍ଟ ଅନୁସାରେ ଗୁରୁବାର ପୂର୍ବାହ୍ନ ପ୍ରାୟ ୧୧ଟା ବେଳେ ବହୁ ସଂଖ୍ୟାରେ ପ୍ରଦର୍ଶନକାରୀ ସିମରା ଚୌକରେ ଏକତ୍ର ହୋଇଥିଲେ। ଏଣୁ ଭିଡକୁ ଆୟତ୍ତ କରିବା ପାଇଁ ପୋଲିସକୁ ବଳ ପ୍ରୟୋଗ କରିବାକୁ ପଡିଥିଲା ଓ ପରେ ସମ୍ପୃକ୍ତ ଅଞ୍ଚଳରେ କର୍ଫ୍ୟୁ ଜାରି କରାଯାଇଛି।

କୁହାଯାଉଛି ସିମରା ଏୟାରପୋର୍ଟ ନିକଟରେ ଉତ୍ତେଜନା ବଢିବାରୁ ପୋଲିସ ଲୁହବୁହା ବାସ୍ପ ପ୍ରୟୋଗ କରିଥିଲା ଓ ପରେ ଅଞ୍ଚଳରେ କର୍ଫ୍ୟୁ ଜାରି ହୋଇଥିଲା। ଏଠାରେ ପୋଲିସ ଓ ବିକ୍ଷୋଭକାରୀଙ୍କ ମଧ୍ୟରେ ସଂଘର୍ଷ ହେବା ଯୋଗୁ ଅନେକ ପ୍ରଦର୍ଶନକାରୀ ଆହତ ହୋଇଥିବା ଜଣାପଡିଛି। ଏହି ସଂଘର୍ଷ ପରେ ଏୟାରପୋର୍ଟର ପରିଚାଳନା ରୋକି ଦିଆଯାଇଛି। ଜାରି କର୍ଫ୍ୟୁ ମଧ୍ୟାହ୍ନ ୧୨ଟା ୪୫ ମିନିଟରେ ଲାଗୁ ହୋଇଥିବା ବେଳେ ରାତି ୮ଟା ପର୍ଯ୍ୟନ୍ତ ବଳବତ୍ତର ରହିପାରେ। ତେବେ ଜେନ-ଜେଡ୍ ସମୂହର ଅଭିଯୋଗ ହେଉଛି ବୁଧବାର ହୋଇଥିବା ସଂଘର୍ଷରେ ପୋଲିସ ଅପରାଧିଙ୍କୁ ଗିରଫ କରିବାରେ ବିଫଳ ହୋଇଛି।

ନଭେମ୍ବର ୧୯ ତାରିଖରେ ସିମରା ଏୟାରପୋର୍ଟ ନିକଟରେ ହୋଇଥିବା ସଂଘର୍ଷରେ ୬ ଜଣ ଜେନ-ଜେଡ୍ ସମର୍ଥକ ଆହତ ହୋଇଥିଲେ। ଏହି ଘଟଣା ପରେ ସମର୍ଥକ ୬ ଜଣ ୟୁଏମଏଲ କାର୍ଯ୍ୟକର୍ତ୍ତାଙ୍କ ବିରୋଧରେ ପୋଲିସରେ ଏତଲା ଦେଇଛନ୍ତି। ରିପୋର୍ଟ ଅନୁସାରେ ଉତ୍ତେଜନା ସେତେବେଳେ ବଢିଥିଲା ଯେତେବେଳେ ୟୁନାଇଟେଡ ମାର୍କସବାଦୀ ଓ ଲେନିନ ବାଦୀ (ୟୁଏମଏଲ) ନେତା ୫ମାର୍ଚ୍ଚ ୨୦୨୬ରେ ପ୍ରସ୍ତାବିତ ନିର୍ବାଚନ ପୂର୍ବରୁ ଜିଲ୍ଲା ଗସ୍ତ ଯୋଜନା କରିଛନ୍ତି।

ଉଲ୍ଲେଖଯୋଗ୍ୟ ଯେ ଆଜିର ଏହି ପ୍ରଦର୍ଶନ ନେପାଳରେ ସେପ୍ଟେମ୍ବର ମାସରେ ହୋଇଥିବା ଭୀଷଣ ଆନ୍ଦୋଳନର ୨ ମାସ ପରେ ହୋଇଛି। ସେପ୍ଟେମ୍ବରର ବିରୋଧ ଯୋଗୁ ତତ୍କାଳୀନ ପ୍ରଧାନମନ୍ତ୍ରୀ ଓ ତାଙ୍କ ମନ୍ତ୍ରୀମଣ୍ଡଳକୁ ଇସ୍ତଫା ଦେବାକୁ ପଡିଥିଲା। ଓଲିଙ୍କ ନେତୃତ୍ୱାଧୀନ ସରକାରଙ୍କ ପତନ ପରେ ପୂର୍ବତନ ପ୍ରଧାନ ବିଚାରପତି ସୁଶୀଲା କାର୍କୀଙ୍କ ନେତୃତ୍ୱରେ ନୂଆ ସରକାରର ଗଠନ ହୋଇଛି। ନୂଆ ସରକାର ଦାୟିତ୍ୱ ଗ୍ରହଣ କରିବା ଦିନ ସଂସଦ ଭଙ୍ଗ କରିବାକୁ ସୁପାରିଶ କରିବା ସହ ଦେଶରେ ନିର୍ବାଚନ ଆହ୍ୱାନ ଦେଇଥିଲେ।