ବୁଲା କୁକୁର ବନ୍ଧ୍ୟା କରଣ ମାମଲା, ରାଜ୍ୟ ସରକାରମାନଙ୍କ ଉପରେ ବର୍ଷିଲେ ସୁପ୍ରିମକୋର୍ଟ

ନୂଆଦିଲ୍ଲୀ ୨୭।୧୦: ରାସ୍ତାରେ ବୁଲୁଥିବା ବୁଲା କୁକୁରଙ୍କୁ ଧରି ସେମାନଙ୍କ ବନ୍ଧ୍ୟାକରଣ କରିବାକୁ ସୁପ୍ରିମକୋର୍ଟଙ୍କ ଆଦେଶ ରାଜ୍ୟ ସରକାରମାନେ ପାଳନ କରି ନାହାନ୍ତି। ଏଣୁ ସୁପ୍ରିମକୋର୍ଟ ସୋମବାର ରାଜ୍ୟ ସରକାରମାନଙ୍କ କାର୍ଯ୍ୟରେ ଅସନ୍ତୋଷ ପ୍ରକାଶ କରିଛନ୍ତି। ସୁପ୍ରିମକୋର୍ଟ କହିଛନ୍ତି ଯେ ଏହା ଦ୍ୱାରା ସାରା ବିଶ୍ୱରେ ତୁମ ଦେଶର ଛବି ଖରାପ ହେଉଛି। ଏଥି ପାଇଁ ଦୁଇ ମାସ ସମୟ ଦିଆଗଲା, ହେଲେ ଏହି ସମୟରେ ରାଜ୍ୟ ସରକାରମାନେ  କିଛି କରି ନାହାନ୍ତି ବୋଲି କୋର୍ଟ ଭର୍ତ୍ସନା କରିଛନ୍ତି।

ସୁପ୍ରିମକୋର୍ଟ ବେଞ୍ଚ କହିଛନ୍ତି ଯେ ଗତ ଅଗଷ୍ଟରେ ଏ ନେଇ ଆମେ ଆଦେଶ ଜାରି କରିଥିଲୁ। ଏହା ସତ୍ତ୍ୱେ କୌଣସି କାର୍ଯ୍ୟାନୁଷ୍ଠାନ ହୋଇ ନାହିଁ ଓ କୁକୁର ଏବେବି ଲୋକଙ୍କୁ ସେମାନଙ୍କ ଶିକାର ବନଉଛନ୍ତି। ଏହାର ଉଦାହରଣ ଦେଇ ସୁପ୍ରିମକୋର୍ଟ ବେଞ୍ଚ କହିଛନ୍ତି ଯେ ମହାରାଷ୍ଟ୍ର ପୁଣେରେ କୁକୁର ଏକ ପିଲା ଉପରେ ଆକ୍ରମଣ କରିଥିଲା। ଏହା ପୂର୍ବରୁ ମହାରାଷ୍ଟ୍ରର ଭଣ୍ଡାରାରେ ୨୦ କକୁରଙ୍କ ଏକ ଦଳ ଏକ ଝିଅକୁ  ଆକ୍ରମଣ କରିଥିଲେ। ଏହା ଛଡା ଗତ ସପ୍ତାହରେ କେରଳରେ କୁକୁର ସେତେବେଳେ ଜଣେ ଲୋକକୁ ଆକ୍ରମଣ କରିଥିଲେ ଯେତେବେଳେ ସେ ବୁଲା କୁକୁରଙ୍କ ସମ୍ପର୍କରେ ଜନ ସଚେତନତା ପାଇଁ ପଥପ୍ରାନ୍ତ ନାଟକ କରୁଥିଲେ।

ଏତେ ସବୁ ପରେ ବି ରାଜ୍ୟ ସରକାରଙ୍କ ପକ୍ଷରୁ କୋର୍ଟଙ୍କୁ କୌଣସି ଜବାବ ମିଳୁ ନାହିଁ। ଆପଣମାନଙ୍କୁ ୨ ମାସ ଦିଆଗଲା ହେଲେ ଆପଣମାନେ କିଛି କଲେନି। ଏହି ମାମଲାରେ ସୁପ୍ରିମକୋର୍ଟ ଏବେ ସବୁ ରାଜ୍ୟ  ଓ କେନ୍ଦ୍ର ଶାସିତ ସରକାରଙ୍କୁ ଜବାବ ତଲବ କରିଛନ୍ତି। କୋର୍ଟ କହିଛନ୍ତି ଆପଣମାନେ ହୁଏତ ଖବର କାଗଜ ପଢୁ ନାହାନ୍ତି। ୨୨ ଅଗଷ୍ଟରେ ଆଦେଶ ଗୃହୀତ ହୋଇଥିଲା ଓ ଖବର ବେଶ୍ ଚାଲିଥିଲା। ଏବେ ସବୁ ରାଜ୍ୟଙ୍କ ମୁଖ୍ୟ ଶାସନ ସଚିବଙ୍କୁ ବ୍ୟକ୍ତିଗତ ରୂପେ କୋର୍ଟରେ ହାଜର ହେବାକୁ ପଡିବ ଓ ସେମାନଙ୍କୁ ବିଳମ୍ବର କାରଣ ଜଣାଇବାକୁ ପଡିବ ବୋଲି କୋର୍ଟ କହିଛନ୍ତି।

ବେଞ୍ଚ କହିଛନ୍ତି ମାମଲାରେ ଏପର୍ଯ୍ୟନ୍ତ କେବଳ ପଶ୍ଚିମବଙ୍ଗ ଓ ତେଲେଙ୍ଗାନା ସରକାର ଜବାବ ଦାଖଲ କରିଛନ୍ତି। ଏହା ଛଡା ଦିଲ୍ଲୀ ଏମସିଡି ପକ୍ଷରୁ ଜବାବ ଆସିଛି। ହେଲେ କୌଣସି ରାଜ୍ୟ ସରକାର ଏ ବାବଦେ କୌଣସି ପ୍ରତିକ୍ରିୟା ଦେଇ ନାହାନ୍ତି। କେବଳ ରାଜସ୍ଥାନ ସରକାର ବୁଲା କୁକୁରଙ୍କ ଲାଗି ଫିଡିଂ ପଏଣ୍ଟ ସ୍ଥାପନା କରିଛନ୍ତି। ଏହା ଛଡା ଆରଡବ୍ଲୁଏ ଓ ଆନିମଲ ୱେଲଫେୟାର ଅନୁଷ୍ଠାନମାନେ ମିଳିତ କାମ କରିବାକୁ ସ୍ଥାନୀୟ ସଂସ୍ଥାମାନଙ୍କୁ ପରାମର୍ଶ ଦେଇଛନ୍ତି।