ପାକିସ୍ତାନ ଠାରୁ ଔଷଧ ଆମଦାନୀ ବ୍ୟାନ କଲା ଆଫଗାନିସ୍ତାନ: କହିଲା, ଖରାପ ଔଷଧ ଦେଉଛି ପଡ଼ୋଶୀ

କାବୁଲ:ଆଫଗାନିସ୍ତାନ ଓ ପାକିସ୍ତାନ ମଧ୍ୟରେ ତିକ୍ତତା ବୃଦ୍ଧି ପାଉଛି। ଏଥିପାଇଁ ଦୁଇ ଦେଶ ମଧ୍ୟରେ ମଝିରେ ମଝିରେ ସାମରିକ ସଂଘର୍ଷ, ଆତ୍ମଘାତି ବିସ୍ଫୋରଣ, ସାଂସ୍କୃତିକ ଓ ବ୍ୟବସାୟିକ ସମ୍ପର୍କ ଛିନ୍ନ କରିବା ଭଳି ଘଟଣା ଦେଖିବାକୁ ମିଳୁଛି। ଏବେ ପାକିସ୍ତାନ ଠାରୁ ଔଷଧ ଆମଦାନୀ ନ କରିବାକୁ ଆଫଗାନିସ୍ତାନ ନିଷ୍ପତ୍ତି ନେଇଛି। ପାକିସ୍ତାନ ଠାରୁ ଆସୁଥିବା ସମସ୍ତ ଔଷଧ ଖରାପ ମାନର। ତେଣୁ ୩ ମାସ ମଧ୍ୟରେ ଔଷଧ ଆମଦାନୀକୁ ବନ୍ଦ କରିବାକୁ ଆଫଗାନିସ୍ତାନର ଅର୍ଥନୈତିକ ବ୍ୟାପାର ଉପପ୍ରଧାନମନ୍ତ୍ରୀ ମୁଲ୍ଲାହ ଅବଦୁଲ ଗନୀ ବରାଦର ନିର୍ଦ୍ଦେଶ ଦେଇଛନ୍ତି।

ଏହା ଛଡ଼ା ଆଫଗାନିସ୍ତାନ ଏଥିପାଇଁ ବିଦେଶ ଉପରେ ନିର୍ଭରଶୀଳତା କମାଇ ଆଞ୍ଚଳିକ ବାଣିଜ୍ୟ ସ୍ୱାଧୀନତା ଉପରେ ଗୁରୁତ୍ୱ ଦେଉଛି। ତେଣୁ ଏହି ପଦକ୍ଷେପ ତାର ଏକ ଅଂଶ ବୋଲି ଆଫଗାନିସ୍ତାନ ଦର୍ଶାଇଛି। ରାଜଧାନୀ କାବୁଲରେ ବ୍ୟବସାୟିକ ପ୍ରତିନିଧିମାନଙ୍କ ସହିତ ଆଲୋଚନା କରିବା ପରେ ପାକିସ୍ତାନରୁ ଔଷଧ ଆମଦାନୀ ନ କରିବାକୁ ନିଜ ଦେଶର ବ୍ୟବସାୟୀଙ୍କୁ ନିର୍ଦ୍ଦେଶ ଦେଇଛି ତାଲିବାନ। ଏନେଇ ଏକ ନିର୍ଦ୍ଦେଶନାମା ଜାରି କରାଯାଇଛି।

ଏନେଇ ବରାଦର କହିଛନ୍ତି ଯେ ପାକିସ୍ତାନୀ ସାମଗ୍ରୀ ଉପରେ ଆଫଗାନିସ୍ତାନର ନିର୍ଭରଶୀଳତା ଦେଶର ସ୍ୱାସ୍ଥ୍ୟ କ୍ଷେତ୍ର ଏବଂ ଅର୍ଥନୈତିକ ସ୍ଥିରତାକୁ କ୍ଷତି ପହଞ୍ଚାଇଛି। ତେଣୁ ସେ ଆଫଗାନିସ୍ତାନର ବ୍ୟବସାୟୀଙ୍କୁ ଚେତାବନି ଦେଇ କହିଛନ୍ତି ଯେ ଯଦି ସମୟସୀମା ଶେଷ ହେବା ପରେ ପାକିସ୍ତାନ ସହିତ ବ୍ୟବସାୟ ଜାରି ରଖିବେ, ତେବେ ସେହି ବ୍ୟବସାୟୀମାନଙ୍କୁ ତାଲିବାନ ପ୍ରଶାସନ ସହଯୋଗ କିମ୍ବା ସମର୍ଥନ କରିବ ନାହିଁ ବୋଲି ସେ କହିଛନ୍ତି।

ଟୋଲୋ ନ୍ୟୁଜର ରିପୋର୍ଟ ଅନୁସାରେ, ବରାଦର କହିଛନ୍ତି“ଆମ ସ୍ୱାସ୍ଥ୍ୟ କ୍ଷେତ୍ରର ମୁଖ୍ୟ ସମସ୍ୟା ହେଉଛି ପାକିସ୍ତାନରୁ ନିମ୍ନମାନର ଔଷଧ ଆମଦାନୀ। ମୁଁ ସମସ୍ତ ଔଷଧ ଆମଦାନୀକାରୀଙ୍କୁ ତୁରନ୍ତ ବିକଳ୍ପ ଯୋଗାଣ ପଥ ଖୋଜିବାକୁ ଦୃଢ଼ ଭାବରେ ଅନୁରୋଧ କରୁଛି।”

ସେପଟେ ଦୁଇ ଦେଶ ମଧ୍ୟରେ ସୈନ୍ୟ ସଂଘର୍ଷ ଯୋଗୁ ବାରମ୍ବାର ସୀମା ବନ୍ଦ ରହୁଛି। ତେଣୁ ମାସାଧିକ କାଳ ହେଲା ବ୍ୟବସାୟ ବନ୍ଦ ରହିଛି।ସୀମାପାର ସାମଗ୍ରୀ ପରିବହନ ପ୍ରାୟ ବନ୍ଦ ହୋଇଯାଇଛି। ଯାହା ଫଳରେ ଉଭୟ ପାର୍ଶ୍ୱରେ ବଜାର ମୂଲ୍ୟରେ ଅନିୟନ୍ତ୍ରିତ ସ୍ଥିତିକୁ ଚାଲିଯାଇଛି

ପାକିସ୍ତାନରେ,ପନିପରିବା ମୂଲ୍ୟ ଅହେତୁକ ବୃଦ୍ଧି ପାଉଛି। ବିଶେଷକରି ଆଫଗାନିସ୍ତାନରୁ ଆମଦାନି ହେଉଥିବା ଟମାଟୋର ଦାମ ଆକାଶ ଛୁଆଁ ହୋଇଛି। କେଜି ୫୦୦ ଟଙ୍କା ପର୍ଯ୍ୟନ୍ତ ପହଞ୍ଚି ଯାଇଛି। ଏହି ସମୟରେ,ଆଫଗାନ ଚାଷୀମାନେ ପ୍ରବଳ କ୍ଷତିର ସମ୍ମୁଖୀନ ହେଉଛନ୍ତି। କାରଣ ଘରୋଇ ଉତ୍ପାଦନ ହୋଇଥିବା ଟମାଟୋ,ଡାଳିମ୍ବ,ଅଙ୍ଗୁର ଏବଂ ପିଆଜ ଭଳି ସାମଗ୍ରୀ ବିକ୍ରି ହୋଇ ନ ହୋଇ ପଡ଼ି ରହୁଛି। ତେଣୁ ଆଫଗାନିସ୍ତାନର ବର୍ତ୍ତମାନ ଅନ୍ୟ ବାଣିଜ୍ୟିକ ପାର୍ଟନର ସନ୍ଧାନରେ ରହିଛି।