ମାଲକାନଗିରି ଦୁଇ ଗାଁ ବିବାଦ ଘଟଣା : ବିଭିନ୍ନ ଦିଗକୁ ତର୍ଜମା କରି ମୁଖ୍ୟମନ୍ତ୍ରୀଙ୍କୁ ରିପୋର୍ଟ ଦେଲେ ଉପମୁଖ୍ୟମନ୍ତ୍ରୀ

ଭୁବନେଶ୍ବର ୧୨।୧୨:ମାଲକାନଗିରି ଆଇନ ଶୃଙ୍ଖଳା ସ୍ଥିତି ନେଇ ମୁଖ୍ୟମନ୍ତ୍ରୀଙ୍କୁ ରିପୋର୍ଟ ଦେଲେ ଉପମୁଖ୍ୟମନ୍ତ୍ରୀ । ବିଭିନ୍ନ ଦିଗକୁ ତର୍ଜମା କରି ଫେରିବା ପରେ ଲୋକସେବା ଭବନରେ ମୁଖ୍ୟମନ୍ତ୍ରୀଙ୍କୁ ରିପୋର୍ଟ ପ୍ରଦାନ କରିଛନ୍ତି ଉପ ମୁଖ୍ୟମନ୍ତ୍ରୀ କେ.ଭି. ସିଂହଦେଓ ଓ ମତ୍ସ୍ୟ ସମ୍ପଦ ମନ୍ତ୍ରୀ ଗୋକୁଳା ନନ୍ଦ ମଲ୍ଲିକ ।

ମନ୍ତ୍ରୀ ଗୋକୁଳା ନନ୍ଦ ମଲ୍ଲିକ କହିଛନ୍ତି, ଜିଲ୍ଲା ପ୍ରଶାସନ ଓ ଉଭୟ ସଂପ୍ରଦାୟ ସହ ଆଲୋଚନା ହୋଇଛି । ସେହି ଅନୁସାରେ ରିପୋର୍ଟ ପ୍ରସ୍ତୁତ କରାଯାଇ ମୁଖ୍ୟମନ୍ତ୍ରୀଙ୍କୁ ପ୍ରଦାନ କରାଯାଇଛି । ଯାହା ଉଚିତ ମୁଖ୍ୟମନ୍ତ୍ରୀ ପଦକ୍ଷେପ ନେବେ । ଉଭୟ ସଂପ୍ରଦାୟ ଶାନ୍ତି ଚାହୁଁଛନ୍ତି । ବର୍ତ୍ତମାନ ସ୍ଥିତି ନିୟନ୍ତ୍ରଣରେ ଅଛି । ଅନେକ କାରଣ ରହିଛି । ସରଜମିନ ତଦନ୍ତ କରାଯାଇଛି । ଦୁଇ ସମ୍ପ୍ରଦାୟ ସହ ଜିଲ୍ଲା ପ୍ରଶାସନ ଓ ପୋଲିସ ପ୍ରଶାସନ ସହିତ ଆଲୋଚନା ହୋଇଛି । ସମସ୍ତେ ଶାନ୍ତି ଚାହୁଁଛନ୍ତି ।

ସେପଟେ, ମାଲକାନଗିରି ଏମ୍ଭି ୨୬ ଗାଁ ହିଂସାକାଣ୍ଡ ଘଟଣାର ୫ ଦିନ ପରେ ବି ବଦଳି ନାହିଁ ସ୍ଥିତି । କିଛି ଲୋକ ଘରକୁ ଫେରିଛନ୍ତି । କାନ୍ଦ ବୋବାଳିରେ ଫାଟି ପଡୁଛି ଏମ୍ଭି ୨୬ ଗାଁ । ହିଂସା ଘଟଣାର ପାଞ୍ଚ ଦିନ ପରେ ମହିଳା ମାନେ ଗାଁକୁ ଫେରିଛନ୍ତି । ହେଲେ ଘରକୁ ଅନାଇ ଦେଖିଲା ବେଳକୁ ସବୁ କିଛି ଛାରଖାର ହୋଇ ଯାଇଛି । ଟୋଲ, ମହୁଲ ଓ କେନ୍ଦୁପତ୍ର ସଂଗ୍ରହ କରି ଯେଉଁ ସବୁ ଆସବାବପତ୍ର କିଣିଥିଲେ ତାହା ସବୁ ହିଂସାର ନିଆଁରେ ପୋଡି ପାଉଁଶ ହୋଇଯାଇଛି । ଟିଭି, ଫ୍ରିଜ ଠାରୁ ଆରମ୍ଭ କରି କନ୍ଥା, କମ୍ବଳ ସବୁ ନଷ୍ଟ ହୋଇଯାଇଛି । ଛୋଟ ଛୋଟ ପିଲା ଛୁଆଙ୍କୁ ନେଇ ଲୋକେ ଘର ଦାଣ୍ଡରେ ବାହୁନି ବାହୁନି କାନ୍ଦୁଛନ୍ତି । ହିଂସା ଘଟଣା ପରେ ଏମ୍ଭି ୨୬ ଗାଁରେ ଏମିତି ବିକଳ ଚିତ୍ର ଦେଖିବାକୁ ମିଳୁଛି । ଲୋକଙ୍କୁ ପିନ୍ଧିବା ପାଇଁ କନା ଖଣ୍ଡେ ନଥିବା ବେଳେ ପେଟର ଦିମୁଠା ଦାନା ପାଇଁ ଗାଡି ପଛପଟେ ଦୌଡୁଛନ୍ତି ଲୋକେ । ପଡୋଶୀ ଗାଁ ମାନଙ୍କରୁ ଖାଇବା ପହଁଚିବା ପରେ ଲୋକେ ବିକଳ ହୋଇ ଟିକିଏ ଡାଲି ଭାତ ଖାଉଛନ୍ତି ।

ଏମ୍ଭି ୨୬ ଗାଁ ହିଂସାକାଣ୍ଡ ପରେ ବି ବିଭିନ୍ନ ସ୍ଥାନରେ ଲାଗିରହିଛି ଚାପା ଉତ୍ତେଜନା । ମାଲକାନଗିରି ଜିଲ୍ଲାରେ ୨୧୪ଟି ବଙ୍ଗୀୟ ଗାଁ ରହିଥିବା ବେଳେ ଅନେକ ଗାଁର ଲୋକେ ଏବେ ଆତଙ୍କିତ ଅବସ୍ଥାରେ ରହିଛନ୍ତି । କେଉଁଠି ଗାଁରେ ଲୋକେ ଠିକ୍ ଭାବେ ଦୋକାନ ବଜାର ଖୋଲୁ ନାହାନ୍ତି ତ ଆଉ କେଉଁଠି ରାତି ହେଲେ ତାଟି କବାଟ ବନ୍ଦ କରି ଅନ୍ୟତ୍ର ଚାଲିଯାଉଛନ୍ତି । ହେଲେ ପରିସ୍ଥିତିକୁ ନିୟନ୍ତ୍ରଣ କରିବା ଲାଗି ଏମ୍ଭି ୨୬ ଓ ଆଖପାଖ ଅଞ୍ଚଳରେ ୨୦ କମ୍ପାନୀ ସିଆରପିଏଫ୍ ଜବାନ ମୁତୟନ କରାଯାଇଛି । ଗାଁ ଭିତରେ ସୁରକ୍ଷା ଦେଉଛନ୍ତି ବିଏସଏଫ ଓ ଜିଲ୍ଲା ପୋଲିସ । ଉଭୟ ଗାଁରେ ଶାନ୍ତି ଫେରିବା ପାଇଁ ଆଦିବାସୀ ଓ ବଙ୍ଗାଳୀ ସମାଜ ପକ୍ଷରୁ ପ୍ରୟାସ ଜାରି ରହିଛି । ସେପଟେ ଜିଲ୍ଲା ପ୍ରଶାସନ ପକ୍ଷରୁ ଏମ୍ଭି ୨୬ ଗାଁରେ କ୍ଷୟକ୍ଷତିର ଆକଳନ କରାଯାଇଛି । ବିଭାଗୀୟ ଯନ୍ତ୍ରୀ ମାନେ ଭଙ୍ଗାରୁଜା ଘରର ମାପ ଚୁପ କରୁଥିବା ବେଳେ ରାଜସ୍ବ ବିଭାଗ ପକ୍ଷରୁ ପୋଡା ଜଳା ସମ୍ପତ୍ତିର ଆକଳନ କରାଯାଇଛି । ଗର୍ଭବତୀ ମହିଳା ଓ ଶିଶୁଙ୍କ ପାଇଁ ICDS ପକ୍ଷରୁ ଖାଦ୍ୟ ସାମଗ୍ରୀ ବଣ୍ଟନ କରାଯାଇଛି । କିଛି ସ୍ଥାନରେ ଜିଲ୍ଲା ପ୍ରଶାସନ ତରଫରୁ ରନ୍ଧା ଖାଦ୍ୟ ମଧ୍ୟ ବ୍ୟବସ୍ଥା କରାଯାଇଛି । ଦକ୍ଷିଣାଞ୍ଚଳ RDC ମାଲକାନଗିରି ଜିଲ୍ଲାପାଳଙ୍କ ସହ ରାତିରେ ଚାଲି ଚାଲି ଏମ୍ଭି ୨୬ ଗାଁ ବୁଲି ସ୍ଥିତି ଅନୁଧ୍ୟାନ କରିଛନ୍ତି ।