ଏପଷ୍ଟିନ ଫାଇଲରେ ହଜାରେରୁ ଅଧିକ ଥର ପୁଟିନଙ୍କ ନାଁ, ରୁଷ କହିଲା- ଆମେ ଭ୍ରୁକ୍ଷେପ କରୁନାହୁଁ

ନୂଆଦିଲ୍ଲୀ: ଆମେରିକା ନ୍ୟାୟ ବିଭାଗ ଦ୍ବାରା ଜାରି ଜେଫ୍ରି ଏପଷ୍ଟିନ ଫାଇଲ ପୂରା ଦୁନିଆରେ ହଇଚଇ ସୃଷ୍ଟି କରିଛି। ଏଥିରେ ବିଶ୍ବର ଅନେକ ବଡ଼ ବଡ଼ ଲୋକଙ୍କ ନାଁ ରହିଛି। ଯାହାକୁ ନେଇ ଚର୍ଚ୍ଚା ଲାଗିରହିଛି। ଆଉ ଏବେ ଏହି ଲକ୍ଷ ଲକ୍ଷ ଫର୍ଦ୍ଦର ଦସ୍ତାବିଜରେ ରୁଷ ରାଷ୍ଟ୍ରପତି ଭ୍ଲାଦିମୀର ପୁଟିନଙ୍କ ନାଁ ପ୍ରାୟ ୧୦୦୫ ଥର ଆସିଛି।

ରିପୋର୍ଟ ଅନୁସାରେ, ପୁଟିନଙ୍କ ନାଁର ଅଧିକାଂଶ ଉଲ୍ଲେଖ ନ୍ୟୁଜ୍ କ୍ଲିପିଂ କିମ୍ବା ରିପୋର୍ଟ ସହ ଜଡ଼ିତ। ଏସବୁ ଏପଷ୍ଟିନଙ୍କୁ ପଠାଯାଉଥିଲା। ଅବଶ୍ୟ କିଛି ଏଭଳି ଇମେଲ ମିଳିଛି ଯେଉଁଥିରେ ଏପଷ୍ଟିନ, ପୁଟିନଙ୍କୁ ସାକ୍ଷାତକାର କରିବା ପାଇଁ ବାରମ୍ବାର ବାରମ୍ବାର ଚେଷ୍ଟା କରୁଥିବା କୁହାଯାଇଛି। ଅବଶ୍ୟ ଏହି ଫାଇଲରେ ଉଭୟଙ୍କ ମଧ୍ୟରେ କୌଣସି ପ୍ରତ୍ୟକ୍ଷ ସାକ୍ଷାତକାର ହୋଇଥିବା ନେଇ ପ୍ରମାଣ ନାହିଁ।

ଆହୁରି ଜଣାପଡ଼ିଛି ଏପଷ୍ଟିନ ରୁଷ ଅଧିକାରୀ, ପୂର୍ବତନ ରାଷ୍ଟଦୂତ ଏମିତିକି ଏଫଏସବି ସହ ଜଡ଼ିତ ଲୋକଙ୍କୁ ଯୋଗାଯୋଗ କରିବାକୁ ଚେଷ୍ଟା କରିଥିଲେ। ଏହି ଖୁଲାସା ପରେ ହନିଟ୍ରାପ ଏବଂ ଗୁଇନ୍ଦା କଥା ଚର୍ଚ୍ଚାକୁ ଆସିଥିଲା।

ସେପଟେ, ରିପୋର୍ଟ ସାମ୍ନାକୁ ଆସିବା ପରେ ପୋଲାଣ୍ଡ ପ୍ରଧାନମନ୍ତ୍ରୀ ଡୋନାଲ୍ଡ ଟସ୍କ ଏହାକୁ ରୁଷ ଗୁଇନ୍ଦା ଏଜେନ୍ସୀ ସହ ଜଡ଼ିତ ବଡ଼ ଘୋଟାଲା ବୋଲି କହି ଯାଞ୍ଚ ଆରମ୍ଭ କରିବା ଘୋଷଣା କରିଥିଲେ। ଯେତେବେଳେକି କ୍ରେମଲିନ ଏହି ଦାବିକୁ ଅଯଥା କହି ଖାରଜ କରିଛି। କେମଲିନ ପ୍ରବକ୍ତା ଦିମିତ୍ରି ପେସକୋଭ କହିଛନ୍ତି ଏପଷ୍ଟିନ ଏବଂ ରୁଷ ଗୁଇନ୍ଦାର ଦାବିକୁ ଗୁରୁତର ସହ ନିଆଯାଇନାହିଁ।

କ’ଣ ରହିଛି ଦସ୍ତାବିଜ୍ରେ ?

ଜାରି ଦସ୍ତାବିଜ ଅନୁସାରେ, ଏପଷ୍ଟିନ ନ୍ୟୁୟର୍କରେ ରୁଷର ପୂର୍ବତନ ରାଷ୍ଟ୍ରଦୂତ ଭିଟାଲୀ ଚର୍କିନଙ୍କ ସହ ନିୟମିତ ଭାବରେ ଦେଖାକରୁଥିଲା। ଏପଷ୍ଟିନ, ଚର୍କିନଙ୍କ ପୁଅ ମ୍ୟାକ୍ସିମଙ୍କୁ ନ୍ୟୁୟର୍କର ଏକ ପ୍ରମୁଖ ଆର୍ଥିକ କାରବାର କରୁଥିବା କମ୍ପାନିରେ ଚାକିରି ଦେବାକୁ ଅଫର ମଧ୍ୟ ଦେଇଥିଲା। ହେଲେ ୨୦୧୭ରେ ଚର୍କିନଙ୍କ ଆକସ୍ମିକ ମୃତ୍ୟୁ ପରେ ଏପଷ୍ଟିନ ରୁଷ ସହ ସମ୍ପର୍କ ବଜାୟ ରଖିବା ପାଇଁ ନୂଆ ରାସ୍ତା ଆପଣାଇଥିଲା।

୨୦୧୮ ଜୁନରେ ଏପଷ୍ଟିନ, ସେ ସମୟରେ କାଉନ୍ସିଲ ଅଫ୍ ୟୁରୋପର ସେକ୍ରେଟାରୀ ଜେନେରାଲ ନରଓ୍ବେ ରାଜନେତା ଥୋରବଜର୍ନ ଜାଗଲ୍ୟାଣ୍ଡକୁ ଇମେଲ କରିଥିଲେ। ଏହି ଇମେଲରେ ସେ ଜାଗଲ୍ୟାଣ୍ଡଙ୍କୁ କହିଥିଲେ ପୁଟିନଙ୍କୁ ପରାମର୍ଶ ଦେବା ଦରକାର ଯେ, ପୁଟିନ ତାଙ୍କ ବିଦେଶ ମନ୍ତ୍ରୀ ସର୍ଗେଇ ଲାଭରୋଭଙ୍କୁ ଏପଷ୍ଟିନଙ୍କ ଠାରୁ କଥା ହୋଇ ତଥ୍ୟ ନେଇପାରିବେ। ଜାଗଲ୍ୟାଣ୍ଡ ଜବାବ ଦେଇଥିଲେ ଯେ, ସେ ଲାଭରୋଭଙ୍କ ଆସିଷ୍ଟାଣ୍ଟଙ୍କୁ ଭେଟି ଏକଥା ପହଞ୍ଚାଇଦେବେ।

ଆହୁରି ମଧ୍ୟ ରିପୋର୍ଟ କୁହାଯାଇଛି ଯେ, ଏପଷ୍ଟିନଙ୍କ ସମ୍ପର୍କ ସର୍ଗେଇ ବେଲ୍ୟାକୋଭଙ୍କ ଭଳି ଅଧିକାରୀଙ୍କ ସହ ମଧ୍ୟ ଥିଲା। ଯାହାଙ୍କର ଲିଙ୍କ ରୁଷର ଗୁଇନ୍ଦା ଏଜେନ୍ସୀ (ଏଫଏସବି) ସହ ଥିବା କୁହାଯାଏ। ସେ ସେଣ୍ଟ ପିଟର୍ସବର୍ଗ ଇଣ୍ଟରନାସନାଲ ଇକୋନୋମିକ ଫୋରମରେ ମଧ୍ୟ ସାମିଲ ହୋଇଥିଲା ଏବଂ ରୁଷ ଅଧିକାରୀଙ୍କୁ ପଶ୍ଚିମ ଦେଶମାନଙ୍କୁ ନିବେଶ ଆଣିବାକୁ ପରାମର୍ଶ ଦେଉଥିଲା।

ରିପୋର୍ଟ ଅନୁସାରେ, ଏପଷ୍ଟିନ ୨୦୧୯ ପର୍ଯ୍ୟନ୍ତ ରୁଷର ଭିସା ପାଇଁ ମଧ୍ୟ ଚେଷ୍ଟା କରୁଥିଲା। ଅବଶ୍ୟ ଏହି ଦସ୍ତାବିଜରେ ଏଭଳି କୌଣସି ଦୃଢ଼ ପ୍ରମାଣ ମିଳିନାହିଁ। ଯାହାଦ୍ବାରା ଏହା ପ୍ରମାଣ ହୋଇପାରିବ ଯେ, ଏପଷ୍ଟିନଙ୍କ ପୁଟିନଙ୍କ ସହ କେବେ ସାକ୍ଷାତ ହୋଇଥିଲା।