ବାତ୍ୟା ଓ ଶୀତକୁ ନେଇ ପାଣିପାଗ ବିଭାଗର ପୂର୍ବାନୁମାନ : ଓଡ଼ିଶାରେ କ’ଣ ପ୍ରଭାବ ପଡ଼ିବ ଜାଣନ୍ତୁ

ଭୁବନେଶ୍ବର ୨୬।୧୧: ମାଲାକ୍କା ସମୁଦ୍ର ସନ୍ଧି ପାର୍ଶ୍ଵବର୍ତ୍ତୀ ଉତ୍ତର ପୂର୍ବ ଇଣ୍ଡୋନେସିଆରେ ବାତ୍ୟା ସୃଷ୍ଟି ହୋଇଛି । ଏହି ବାତ୍ୟାର ନାଁ ରହିଛି 'ସେନୟାର' । ଏହା ପଶ୍ଚିମ-ଦକ୍ଷିଣ ପଶ୍ଚିମ ଦିଗରେ ଗତି କରି ପୂର୍ବ ଦିଗରେ ଗତି କରିବ । ବୁଧବାର ଅପରାହ୍ନରେ ବାତ୍ୟା 'ସେନୟାର' ଇଣ୍ଡୋନେସିଆ ଉପକୂଳ ଅତିକ୍ରମ କରିବା ନେଇ ସମ୍ଭାବନା ରହିଛି ।

ସେପଟେ ଓଡ଼ିଶା ଉପରେ ବାତ୍ୟା ପ୍ରଭାବ ପକାଇବ ନାହିଁ ବୋଲି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ନିର୍ଦ୍ଦେଶକ ମନୋରମା ମହାନ୍ତି କହିଛନ୍ତି । ଆଗାମୀ ୭ ଦିନ ପାଇଁ ରାଜ୍ୟରେ ପାଗ ଶୁଖିଲା ରହିବ । ବର୍ଷା ସମ୍ଭାବନା ନାହିଁ । ବାତ୍ୟା ‘ସେନୟାର’ର ପ୍ରଭାବ ଓଡ଼ିଶା ଉପରେ କିଛି ନାହିଁ । ଏହାଛଡ଼ା ସୃଷ୍ଟି ହୋଇଥିବା ଆଉ ଏକ ଲଘୁଚାପର ମଧ୍ୟ ରାଜ୍ୟ ଉପରେ କିଛି ପ୍ରଭାବ ନଥିବା ସେ କହିଛନ୍ତି । କୁହୁଡ଼ି ପାଇଁ ଆଗାମୀ ୨୪ ଘଣ୍ଟା ପାଇଁ ପୂର୍ବାନୁମାନ କରିଛି ପାଣିପାଗ ବିଭାଗ । ସୁନ୍ଦରଗଡ଼, କଳାହାଣ୍ଡି ଏବଂ କନ୍ଧମାଳ ଜିଲ୍ଲାର ଗୋଟିଏ ଦୁଇଟି ସ୍ଥାନରେ ହାଲୁକାରୁ ମଧ୍ୟମ ଧରଣର କୁହୁଡ଼ି ପାଇଁ ସତର୍କ ସୂଚନା ଜାରି କରାଯାଇଛି । ରାଉରକେଲାରେ ସର୍ବନିମ୍ନ ୧୦.୧ ଡ଼ିଗ୍ରୀ ସେଲସିୟସ ରେକର୍ଡ଼ କରାଯାଇଛି ବୋଲି ପାଣିପାଗ ବିଜ୍ଞାନ କେନ୍ଦ୍ର ନିର୍ଦ୍ଦେଶକ କହିଛନ୍ତି ।

ସେହିପରି ସୋଆ ସିଇସି ନିର୍ଦ୍ଦେଶକ ଡ଼. ଶରତ ସାହୁ ମଧ୍ୟ ବାତ୍ୟା ଓ ଶୀତକୁ ନେଇ ପୂର୍ବାନୁମାନ କରିଛନ୍ତି । ଆସନ୍ତା ୩୦ରୁ ୨ ତାରିଖ ମଧ୍ୟରେ ଦକ୍ଷିଣ ଭାରତରେ ବର୍ଷା ହେବ ବୋଲି କହିଛନ୍ତି । କୋମୋରିନ ଓ ଶ୍ରୀଲଙ୍କା ଅଞ୍ଚଳସ୍ଥ ସକ୍ରିୟ ରହିଥିବା ଲଘୁଚାପ ପ୍ରଭାବରେ ଦକ୍ଷିଣ ଓଡ଼ିଶାରେ ଆସନ୍ତା ୩୦ରୁ ୨ ତାରିଖ ମଧ୍ୟରେ ବର୍ଷା ହେବା ନେଇ ଆକଳନ କରିଛନ୍ତି । ଏହା ଗଭୀର ଅବପାତ ଅବସ୍ଥାକୁ ଯାଇପାରେ । ଏହା ପ୍ରଭାବରେ ଗଞ୍ଜାମ, ଗଜପତି, କୋରାପୁଟ, ମାଲକାନଗିରି, ନୟାଗଡ, ଖୋର୍ଦ୍ଧା, ପୁରୀରେ ବର୍ଷା ହେବା ଆକଳନ କରାଯାଉଛି । ଏହା ଉତ୍ତର ଓ ଉତ୍ତର ପୂର୍ବ ଦିଗରେ ଗତି କରିବା ସମ୍ଭାବନା ଥିବାରୁ ଦକ୍ଷିଣ ଆନ୍ଧ୍ର ଓ ଉତ୍ତର ତାମିଲନାଡୁରେ ବର୍ଷା କରାଇବ । ୨୮ରୁ ୨୯ ରାଜ୍ୟରେ କୁହୁଡ଼ି ବଢିବା ସମ୍ଭାବନା ରହିଛି । ତେବେ ଗୁରୁବାର ଠାରୁ ଶୀତ ପ୍ରକୋପ ୧ ତାରିଖ ଯାଏ କମିବ ବୋଲି ଶରତ ସାହୁ ସୂଚନା ଦେଇଛନ୍ତି । ଏହାପରେ ଶୀତ ବଢିବ ବୋଲି ଶରତ ସାହୁ କହିଛନ୍ତି ।